بعد مرور شهرين على أبطالنا..
☆ السودان_البيت الكبير
على لسان خلود
كنا ف البيت الكبير بعد الغدا كعادة كل جمعة ف البيت الكبير شاي وقهوة، ونسة وضحك هنا مشاغلة وهنا تصوير، جدو عز الدين قال لينا يا اولادي العمر ما مضمون، أن عايز افرح بيكم قبل اموت..
هبة ضمتو وقالت ليهو بعد عمر طويل ان شاء الله قال ليها يا بتي برضو م مضمون وانا عايز افرح بيكم قبل اموت لو في زول جاهز للعرس يقول عايز..
مصطفى قال ليهو كنت ح افاتحكم ف الموضوع بكرة بس طالما فتحتو انت خلاص..
جدو قال ليهو طيب يا مصطفى عايز منو ونحن الجمعة الجاية ح نمشي ناس عقد عديل..
كنت مبسوطة ومتشوقة اسمع مصطفى ح يقول اسمي انا متأكدة لأني واثقة ب حبو لي زي م بحبو انا...
- إسمها نور أخت صحبي ف الشغل..
ما عارفة شعوري ف اللحظة دي لدرجة م حسيت ولا سمعت حرف في القعدة بس لقيت نفسي في غرفتي ببكي وتاني م حسيت ب حاجة..
فتحت عيوني لقيت نفسي ف المستشفى ومركبين لي دِرب أمي على يميني وبابا وخالد ومؤيد كلهم في الغرفة دموعي نزلت بس ماما مسحتها لي..
بابا قال لي حمد لله على سلامتك يا قلب أبوها اصلك م بتاكلي بس تاني ح يكون عندك جدول اكل يلا ح اكمل إجراءات الخروج اجهزوا...
وصلنا البيت كنت ف غرفتي ودموعي بتنزل براها، مصطفى الوحيد الحبيتو واتمنيت يكون لي في يوم، مستحيل م يكون شاف أو شعر بالحب الفي عيوني، ياخ هو ماف زول م عارف اني بحبو من نظراتي وف الاخير يمشي يجيبهها من برا؟
باب الغرفة ضرب وجاتني ماما شايلة كباية عصير مسحت دموعي بحركة سريعة وقعدت ف نص السرير، جات قعدت جنبي وقالت لي مصطفى ما خير ليك..
صدمة!
بالنسبة لي صدمة كبيرة اني اسمع كلام زي د من ماما، د كلو براهو وماما طلعت مركزة معاي ومهتمة ب تفاصيلي د براهو خالص...
دموعي نزلت زيادة وضميتها شدييد قلت ليها اختار غيري!!
قالت لي خلود يمكن م تستوعبي كلامي دا بس مصطفى وانتي م بتشبهو بعض، بتي حنينة وما بديها لأي زول وكلامي د م معناها انو مصطفى كعب لا بس هو قاسي شوية وكلنا بنعرف تعاملو وكلامو مع الناس يمكن من الظروف الواجهها او موت ابوهو مؤثر عليهو أو يمكن العسكرية غيرتو!!
قلت ليها ماما انتي عرفتي دا كيف؟
- انتي بتي يا خلود ف طبيعي اكون صحبة قبل أكون أم، م انتي بس حتى خالد ومؤيد انا بعرفهم انتو كلكم عندي واحد م تفتكروا اني بفضّل واحد على التاني خالص عرفتي!!
بس المهم انك م تنكسري لمجرد احساس من جواك انتي م متأكدة منو، احتمال مصطفى عاجبك ك شخصية بس أما من جوا ولو قعدتي مع نفسك وكلمتيها اكيد م عاجبك ساي خلي لمن تحبيهو وح يجي يوم تعرفي كلامي دا..
