#تُمطر_حُباً
بقلم سمر مختار
•11•
☆ لندن
"على لسان منال"
كنت مبسوطة شديد بعد العرس وصلنا مطار الدوحة وكنا في طريقنا لي لندن وكل شوية بعاين لي فارس كأني م مصدقة اننا بقينا سوا، قال لي ما كنت عارف نفسي سمح كدا لمن م قادرة تشيلي عينك مني!!!
خجلت منو وقبلت إتجاه الشباك م كنت قايلاهو شايفني بعاين ليهو، قلت ليهو بعد مسافة:
انا مبسوطة شديد علشان ربنا سهل لينا وبقينا مع بعض، كنت بعاين ليك كل شوية عشان أصدق انو فعلا بقينا مع بعض وانا ما بحلم..
مسك يدي ودي كانت أول مسكة يد لي، قلبي كان بضرب شديييد قال لي انا مبسوط انك في حياتي، كنتِ حلم وحققتو بعد جهد جهيد، ولسة راجيانا حياة اكتر مع بعض لو ربنا مد في العمر...
كمية فرحة شدييدة كانت جواي، وصلنا المطار استقبلنا تقريباً صحبو سديم الكان بحكي لي عنو، قال لي سلام عليكم رديت ليهو وسلم على فارس بالاحضان..
- ابو فراااس
* يعني الزول لو اشتاق ليك يجي يشوفك؟
- لازم تشرفني والا ح ازعل وانت عارف
* المفروض يزعل منو، انت الما جيت عرسي ولا انا؟
قبل يرد عليهو في واحد كدا نادى فارس شكلو صديق قديم اجنبي فارس مشى ليهو بقيت واقفة مع سديم براي وبعاين لأجواء لندن الرهيبة دي وبتبسم قلت يا سلام الجو هنا حلوو شديد ابتسم وقال لي ح تغيري رايك بعد البرد يجي، شال الشنطة من جنبي وداها على العربية تلفونو اتصل شكلو شغل لانو اعتذر وقال ح يرجع متأخر...
شويتين فارس جا واتحركنا، وصلنا بعد نص ساعة كدا فندق فخم اتكلم مع الرسبشن شال المفتاح منهم واداهو لي فارس مشا معاهو حد الباب اتكلمو شوية بعديها اتحرك وفارس جاني مشينا على الجناح..
_____
☆السودان_البيت الكبير...
"على لسان هبة"
كنت طالعة على الجامعة بعد فطرت وبوست راس حبوبة نادتني ماما مشيت عليها..
- هبة بعدين وانتي جاية امشي على خالتك منى دي عيانة شوية وشايفة منال ليها اسبوعين ماف ومصطفى برضو، محمد د اليوم كلو مشغول بتكون براها امشي عليها طيب؟
* يعني ابيت معاها ولا كيف؟
- لو اضطر اقعدي ليك معاها يومين تلاتة..
* كدا ح اضطر ارجع اشيل لي ملابس بس ح اتأخر!!!
- لالا م مشكلة امشي كدي لمن نشوف!!
طلعت للجامعة والزعلة بعد وصلت الدكتور لقيتو دخل قدامي وقفل الباب ف وشي زعلت شديييد قعدت جمب القاعة لمن المحاضرة خلصت طلع الدكتور لقاني قال لي المرة الجاية بدري لويت خشمي والغيظ عايز يخليني اطق..
