تُمطر حُباً

14

#تُمطر_حُباً14
بقلم: سمر مختار

"مختطفات"

"لن أخاصمك، أنا لا أرفع سيفاً في وجه شخص أحببته، ولا تهون عليّ العُشرة، ولن أنساه الفضل بيننا ،لكن حين تصل الأمور إلى طريق مسدود ويسقط شيء من الاحترام والثقة،  أتوضا وأصلي ركعتين ثم أقول:
اللهم أربط على قلبي، وأبدلها خيراً مني وأبدلني خيراً منها"

- قاصد شنو بالرسالة دي؟
* قصدو واضح يا خلود..
- ح يتخلى عني بالسهولة دي؟
كدا خلاص يعني وصلنا لطريق مسدود؟

* من الأول مش دا كان قرارك، جاية تتبكي ليه ؟
- انا م عايزة اتطلق منو يا رحمة أنا أنا...
* م ح ينفعك الكلام لو بالجد م عايزة الطلاق امشي ليه وواجهي بالكلام دا وفهمي انو الشافو كلو غلط وسوء تفاهم م اكتر..

- تفتكري ح ينفع الكلام د؟
* جربي صدقيني وهو اصلا بحبك من زمان يا خلود، هو اصلا م عايز غير يحس انك بالجد متمسكة بيه، تعب بالجد من معاملتك السخيفة والقاسية، وكونوا شاف المنظر دا سبب كافي يفسر تصرفاتك القديمة ليهو..

قومي امشي وانقذي بيتك، الراجل شاريك وخاتيك ف عيونو وقلبو، قومي يا خلود م تخسريهو خالص يلا قومي...

"نحن بحاجة لمن يأتي إلينا من تلقاء قلبه"🖤

_____

"عودة للأحداث"
السودان

نور...

* مصطفى ياخ قوم خلينا نمشي الدكتور، رجلك دي حالتها ماشة ف زيادة..
- عيون مصطفى كفاية إنك جمبي..
* خلاص ح اتصل على منال تجي تشوفها ليك..
- ماف داعي يا نور انا كويس والله بس عايز انوم شوية
* انت م شايف نفسك محموم كيف؟
جرحك د ح يعمل ليك تلوث بعد شوية احسن تسمع كلامي..

- م قادر اتحرك يا نور من هنا للحمام خلي امشي المستشفى..
* معناها ح اتصل على منال..

عاين لي بنظرة فهمت إنو خجلان من منال والتصرفات الكان بعملها ليها، هو ممكن مصطفى اتغير تعاملياً بس للان م واجه ولا اعتذر ل زول، قاعد يهلك نفسو بالتصرفات دلالة على اعتذارو للناس وأولهم امو...

ضغطت على ايدو بمعنى م تشيل هم، شلت تلفوني وطلعت برا فعلا أتصلت على منال واعتذرت منها إنو الوقت اتاخر شوية وازعجتها وطلبت منها تجيب اللازم وما تظهر لي امها حاجة لأنو مصطفى رافض يكلمها لأنها ح تتوتر..

أنا ومصطفى عايشين مع خالتو منى بطلب مني طبعا بعد منال مشت مع راجلها ومحمد سافر لي شغل قال م حيقعد أقل من ستة شهور البيت بقى ليها فاضي وكان لازم اقنعو نعيش معاها عشان اقل شي علاقتهم تتحسن ويقدر يخش ف اهلو بدل ما نعيش ف شقة مقفولة وما معاي ونيس..

نزلت تحت استقبلت منال مع فارس وضيفتهم، اتونسنا شوية كدا منال قالت لي عايزاك تساعديني ف غرفتي شوية ممكن؟