تُمطر حُباً

6

☆ لندن السابعة صباحاً

كنت لسة جمب القسم صحيت ب أصوات العربات قمت بسرعة دخلت المركز طوالي على مكتب المدير فتحت الباب سمعتو بقول..

داير أحاول اجي السودان عشان اشوف الموضوع بنفسي يا فارس لكن عايز شوية وقت...

سكت لمن شافني وقال ليهو برجع ليك بعدين قفل وقال لي منو سمح ليك تدخلي؟؟؟؟

كنت مصدومة بعاين ليهو، طلع سوداني وبرطن معاي من امس لشنو طيب؟

قلت ليهو انت سوداني يعني؟
- ضروري تعرفي اي شي يعني؟
وبعدين دا اسمو باب وفي حاجة اسمها استئذان لو ناسية..

* خلينا من الاستئذان و...
- م عايز استهتار معاك اتفضلي اطلعي برا لو في جديد رقمك عند القسم..

* أنا متأكدة إني شفتك في مكان!
دقيقة أتذكر اااااااا امممممم

- اللهم طولك يا روح، انتي م بتفهمي؟
* أييييي بس اتذكرتك انت الضربتني ب عربيتك طلعت شرطي يعني وهربت ؟

- شايفك عايشة م مُتي وبعدين هربت كيف وانا وديتك المستشفى واتفضلي برااا
* يعني كنت متذكرني مما شفتني وحبيت تكفر عن ذنبك العملتو فيني وأنا أقول مالو الزول عامل رسمي ف شغلو..

- لا حول ولا قوة الا بالله العلي العظيم، يا بت الناس اي كنت عارفك وما ضروري أوريك اي شي واسي اتفضلي برا م عندك قلب انتي؟؟؟

قبل أرد عليهو الباب ضرب ودخل شرطي قال ليهو: سيدي لقد تم ابلاغنا بأنه تم العثور على فتاة مرمية في مجاري المياه والآن نطلب تصريحاً بالتحرك..

حيلي برد ويداب وعيت أنا هنا لي ولينا اختي وبسس دموعي نزلت قلت ليهو بتكون ياها انا قلبي م متطمن خليني امشي معاكم م بقدر اصبر الا اشوفها...

سفهني وقال ليهو: حسناً تحركوا سآتي خلفكم حالما يأتي النائب ليستلم مكاني..

الشرطي فات قلت ليهو انت م سامعني انا ماشة معاهم اتحركت على الباب قال لي بنبرة حادة اقيفي حقيقي خفت منو واصل كلامو: م سمعتي كلامي؟؟
ح تمشي معاي بعد النائب يوصل وف الوقت دا بتكون الضحية وصلت المستشفى نلحقهم هناك..

كوركت فيهو انت فاكر نفسك منو؟
دي اختي الوحيدة، شكلك م عارف يعني شنو اخت وإلا م كنت ح تكون بالبرود دا، انت اقعد ل نائبك وانا ح امشي وقفني لو قدرت..

طلعت من المكتب وضربت الباب طاااااخ اتوجهت على المخرج بس ف شرطيين وقفوا لي ف الباب قلت ليهم ابتعدوا عن وجهي واحد منهم قال لي آسفون لا نستطيع فقد أمر الرئيس أن نوقفك..

كنت ح اكورك فيهم بس سمعت صوتو بقول ليهم الآن يمكنكم الذهاب، لدون م يعاين لي قال هيا لنذهب..

مشيت وراهو لاني م عارفة حاجة ولا معلومة ولا حتى المكان وين والمستشفى ياتها بس لحدي م وصلنا ماف واحد قال ولا حرف...