#تُمطر_حُباً23
بقلم سمر مختار
السودان..
بلسان خلود..
حسيت ب يد ف خدي وأنس بقول لي خلود قومي الصلاة أنا ماشي الجامع
" هممممم طيب "
بعد فات قمت صليت ورجعت رقدتا حسيت بيهو بتحاوم ف الغرفة بعد مسافة وتاني م صحيت إلا وهو برش ف العطر عاين لي مسافة وقال صباح الخير ابتسمت ورديت صباح الخير، الساعة كم؟
_ 6 لسة عندك وقت قومي بتلحقي شغلك
" لا أنا أصلا شغالة الساعة 9 بس أنت لي طالع بدري كدا؟ "
_ أصلا بطلع كدا، الليلة بجي متأخر شوية الفترة دي ضاغطة
" في مشاكل؟ "
_ ربنا يسهل بس، أنا ح أمشي خلي بالك من نفسك عايزة حاجة؟
" ايواااا دقيقة بس، قبل كدا "
عاين لي ب استغراب وقبل على الدولاب انا شلت توبي لبستو وقلت ليهو خلاص أتلفت قبل علي وابتسم
" دقيقة بس عايزة حاجة برجع ليك بعد شوية"
طلعت المطبخ شلت برتقال خلطو ب سرعة وكان في كرواسون كتير نوعي البحبو شكلو جاب الحاجات دي ب اسمي عديل ختيت ليهو اتنين ف صحن وديتهم ليهو..
عاين لي وعيونو بتلمع، بعد ختيت الصينية قدامو ابتسم شال قطعة كرواسون واحدة مع كباية العصير وقال لي كدا أنا ماشي عايزة حاجة تاني؟؟
لا خلاص، بعد كدا امشي لي بعدين، باس راسي وراني الطبل بتاعت الغرف والمطبخ أما باب الشارع بفتح ب مفتاح ساي، أداني نسخ من المفاتيح وطلع فات، اتسوكت و شربت من العصير مع قطعة الكرواسون التانية بعدها لميت البيت كان عايز نظافة بسيطة خلصتها قلت أحسن أجهز الأكل من أسي فعلا لقيت طبق سمك مقطع ونضيف بدون شوك عملت تتبيلة وقسطرتها خليتها ف التلاجة ...
يخوانا الطبيخ دا مهاراتي فما تستغربوا لأني توب شيف اتعلمت من ماما أطبخ بكل حب، بعدها عجنت عجنة بيتزا وخليتها ف التلاجة برضو سخنت مكرونة أمس الباقية وشلتها ف بوكس وباقي عصير البرتقال شلتو ف البوتل بتاعي حتى استحميت ومشيت أجهز نفسي...
بدلة رمادية مع حجاب وقميص أبيض وهيلز كعبو مربع بالابيض سرحت حواجبي وآيلاينز وقلوس بعد عملت مسك أبيض ف مكان النبض، ختيت أوراقي والجهاز والبوكس ف شنطة الظهر الرمادية، والبوتل ف الجيب الخارجي، ختيت تلفوني والقلوس اللاينر والمراية والمسك ف الشنطة البيضاء الصغيرة المربعة بتاعت اليد تبع اللوك وبكدا أنا جاهزة.🖤
بعد ما قفلت البيت وأنا ف الشارع لاقتني خالتو اعتدال وماريا سلمت عليهم كانو طالعين شكلهم بس ماريا ملامحها متغيرة وحتى صوتهاا..
" ما شاء الله يا بتي شغالة؟ "
_ ايوا يا خالتو، وقبل اقول ليها حرف مؤيد أتصل علي نبهني إنو قريب مني م اتحرك..
