التدين المفروض

الـحـلـقـه الاولـه 1

#التدين_المفروض

الـحـلـقـه واحـد 1

🔥الـكـاتـبـه صـفـاء رجـب🔥.

رافع راسي للسقف والدمعه في عيني قاعد مزلت مش مصدق كيف كنت مقتنع انه الي صار كله حلم وكيف كنت هبل ومصدق الشي هذا كان عقلي مشوش ومفيش شي في بالي كل مانغمض عيوني يخطر عليا كيف ماتت امي كيف كانت تعيط و. 💔💔

ــــــــــــــــــــــــــــــــــــــــــــــــــ

تقوى تمسح في دموعها: فضل فضل
فضل وهو راقد: هممم؟
تقوى: باتي قالك صبي لصلاه الجمعه
فضل حس بتقوى تبكي رفع راسه وشاف علامه يد على وجها
فضل منفجع: شنو من ضربكك انتي؟
تقوى: محد غير صبي بسرعه
فضل حط راسه بين يديه: عليش ضربك؟؟
تقوى خنقتها العبره: عشان سعاد  مريضه ومفيش حد يدير الغداء
فضل عيونه حمر ومتنرفز وماسك اعصابه
تقوى: هيا عدي وتي روحك.. ونزلت

(عائله ال مهدي راجل متدين ومرته سعاد وعياله فضل عمره22 ومحمد 21 وتقوى 17 امهم الحقيقه ميته تزوج بوهم قبل 5 سنوات من سعاد الي كانت ارمله وعندها بنت متزوجه)

مهدي بعصبيه: وين خوك؟
محمد قلب عيونه: توا يجي
نزل فضل وكان مش طايق يشوف بوه
طلع مهدي وطلعو وراه محمد وفضل للجامع

تقوى كانت في الكوجينه تنصب في الغداء لبوها وتخش عليها سعاد
سعاد: اسمعي ديريلي صفره بروحي حاسه روحي مريضه وابرمي على الحوش
تقوى: تمام
سعاد: وحطيلي مشروب ماتنسيش
تقوى: حاضر
طلعت سعاد لدارها وقعدت ع التلفون الي محروم عند عيال مهدي

بعد صلاه الجمعه

مهدي: الغداء وين؟
تقوى: هيا واتي
مهدي: سقدي بس
عدت تقوى جابت الصفره وحطتها قدامهم ومشت تودي في صفره مرت بوها وردت
مهدي: كيف ماتبيش تجي سعاد؟
تقوى: لالا درتلها صفره
مهدي: تمام
السكوت عم بيناتهم

بعد الغداء

مهدي: ماشي نرقد اشوي وعوني الساعه 2
تقوى: تمام
وعدا مهدي
محمد: ان شاءلله مرقد بوكك
فضل ضحك: ان شاءلله
تقوى كانت تغسل في العوايز وقاعدين معاها في الكوجينه
محمد: وانتي يا مفتوحه الفم معقوله اديريلها صفره وجو ولا تشيليه لها؟
تقوى: تبيه يضربني كيف اليوم؟
محمد خذا نفس وطلقه وسكت
فضل: خلاص هانت فتره وتعدي
محمد بأبتسامه هزوه: لنا من قبل ماتموت امي ونحنا نقولو فيها
فضل: لا اله الا الله خلي املك في ربي قوي 
محمد: اسمعي يا تقوى اصحا يفطن لتلفونك وديريه صامت فاهمه؟
تقوى: تمام باتي ساهله الدعوه في مرته
فضل: انتي بس ماتطلعيش واجد
تقوى: تمام
فضل: ماشي بنقعد ع النت نا في داري... وعدا
تقوى: وانت وين ماشي؟
محمد يضحك: نبحت لكبيداتي وين بنمشي يعني
تقوى: خخزي وحقربي
طلع محمد وتقوى كملت العوايز وقعدت في دارها