التدين المفروض

الـحـلـقـه الـثـانـيـه 2

#التدين_المفروض

الـحـلـقـه الـثـانـيـه2

🔥الـكـاتـبـه صـفـاء رجـب🔥.

شهد: نرجس بنحكيلك حاجه
نرجس قعدت تشوفلها: ها شن في؟
شهد: خشينا نا وايه لدار سماح ولقينا ذهب امي
نرجس: ككيففف؟؟؟
شهد: وحقربي تخيلي مزلت نذكر شكل ذهب امي
نرجس: تعالي وريه ليا
عدت نرجس مع شهد وايه لدار سماح وقعدن يفتشن
شهد: اههو بحتي
نرجس ملامح الصدمه على وجها: كيف صار قصدي مش امي قبل ماتموت قالت بيعوه وديرولي بيه زكاه؟؟؟
ايه بهزوه: محد قالها الا خوك
شهد: بس طارق مستحيل يطعن في الوصيه
نرجس: اطلعن اطلعن وهيا نردو دبشها بسرعه 
نضمن كل حاجه زي ما كانت وقعدن في دارهن ويفكرن كيف صار وانه في حاجه مش عارفاتها

ـــــــــــــــــــــــــــــــــــــــــــــــ

الساعه 10 في الليل

مهدي وضناه مقعمزين كلهم في الصاله

فضل: قتلك يا باتي
مهدي: ها!
فضل: الاسبوع الجاي بتبدا المدرسه را
مهدي مستغرب: وباه!
فضل: نبي ناخذ تقوى ونشريلها دبش للثانوي
مهدي قلب عيونه وسكت
فضل: ها شن يصير
سعاد: ماشور شي تشريلها دبش دبشها القديم مزال يمسك
محمد بأستفزاز: كان انتي متعوده انه يمسكك دبشك القديم هذي مشكلتك مش مشكلتنا
مهدي فنص عيونه: محمد
محمد: نحكي جديات را سد نا وفضل ماكملنش قرايتنا خليها تقرا
مهدي: تمام دير رايك
فضل: ميه ميه
تقوى فرحانه وسعاد قالبه وجها
فضل: هيا نا طالع
مهدي: وين ماشي؟
فضل: نكسد مع الجماعه
مهدي: قبل ال12 تجي
فضل طلع وماردش عليه
محمد صبا: تقوى خشي ارقدي
تقوى: تمام
سعاد: لا مزالن عوايز العشاء ماغسلتهنش
محمد بعصبيه: البنت اليوم كله تجري وتعبانه اغسليهن انتي
مهدي الشر في عيونه: مححمد احترم روحك
محمد بصوت عالي: يا باتي البنت مش خدامه را عليش متزوج انت عشان تخدمنا ولا عشان نحنا نخدموها
سعاد دموعها ينزلن: عمري قصرت معاكم في حاجه نا؟
محمد: يييي بدينا
مهدي يعيط: محمد سكر فمك
محمد: سكرته نا واختي تخش ترقد ومحد يعيطلها
مهدي: ماتحرقليش دميي
محمد: يا باتي مزلت نقولك اختي مش خدامه
مهدي صبا وجا هجم على محمد: ونا مرتي بتقعد خدامه لككم ولا كيف
تقوى قعدت تبكي وتحز بينهم وسعاد تتفرج وتمسح في دموع التماسيح
محمد نزل راسه مايبيش يرفع يده على بوه
مهدي: بعد المره نسمع صوتك عالي نقتلك بين يدي
محمد عيونه حمر: تمام ياباتي
مهدي طلقه: هيا درق وجكك عليا
محمد: امشي قدامي انتي
عدت تقوى لدارها ومعاها محمد
محمد: اقفلي الدار ويطقو عليك ماتفتحيش
تقوى: تمام 
خشت وقفلت الدار وقعدت على فراشها تبكي على حظها قعدت على الحال هذا ربع ساعه وبعدها مسكت التلفون وقعدت تحكي مع صاحبتها
تقوى بصوت واطي: شخبارك ياحنه
ايه: اخبار العدو وانتي؟
تقوى: نفس الجو
ايه: شن صاير معاك
تقوى: زي العاده عرايك مع مرات باتي وباتي
ايه تضحك: عليش؟
تقوى: هذا ياحنه... وقعدت تحكيلها
ايه: ينعليي منه محمد وخلاص
تقوى: كان ما صايع را خذيتك له
ايه تضحك: خيره في غيره
تقوى: وهذن اخباري وانتي؟
ايه: نفس الجو اليوم خوي ومرته عدو للبحر مزالو ماجو
تقوى: ماخذوكنش؟
ايه بهزوه: لا خذونا وغيرنا جونا تخيلي وقالو المره الجايه في المالديف
تقوى تضحك: ححيوانه وحقربي
ايه: حقيرين وحقربي شر من بعضهم نا في خوي الي داير روحه سلفي ومرته دبشها ضابط وتطلع معاه ولا كأنه
تقوى: اسس نفس باتي
ايه: وهذن الاخبار
تقوى: مشيتي جبتي دبش ولا لا؟
ايه: مزلت مش عارفه مع من نطلع
تقوى: شن رايك نمشو مع بعضنا؟
ايه: خوي الحيوان مانضنيش يوافق
تقوى: جربي معاه انتي
ايه: تمام توا نجرب.. اسمعي شكلهم جو
تقوى: تمام عدي بحتيلهم وردي عليا
ايه: تمام.. وسكرت
صبت ايه ومشت لخواتها تجري
ايه: اهم جو
نرجس: دسي تلفونك يا شهد
شهد: طمرته ينعلي ياعوينك يا ايه دايرلك تلفون طارق
ايه: هابا عليك تلفون يخيتي
شهد: عدي افتحيلهم
مشت ايه فتحتلهم الباب وكان جوهم ملاخير وفرحانين
طارق: السلام عليكم
ايه: وعليكم السلام نورتو
طارق مبتسم: بنورك
ايه: مشاءالله ربي يدوم الضحكه يا سموحه
سماح: سلمك ياعمري
طارق: تعشيتي؟
ايه: اهها الحمدلله
طارق: تمام نا نبي نخش ندوش ونرقد
ايه: طارق تعال نبيك شوي
طارق استغرب: شن صاير؟
ايه ابتسمت ومسكت يد طارق: بناخذ منك خوي شوي
سماح ابتسمت بمجامله
وايه خذت طارق للكوجينه وقعدت تحكي معاه
طارق: ها شن تبي؟
ايه ببراءه: مش نا اختك؟
طارق يضحك: يييي بدينا شن تبي؟
ايه ابتسمت: نطلب منك طلب
طارق: شنو؟
ايه: حكيت مع صاحبتي بنت مهدي را عرفته؟
طارق: اهها وبه؟
ايه: المهم قالتلي نبي نطلع نجيب دبش مدرسه لانها قريب فهمت كيف ونا مزلت ماشريت شي وانت مش فاضي في الصبح وقالتلي تعالي معاي بالمره
طارق عقد حواجبه: وايمتا تبن تمشن؟
ايه: بكره ان شاءالله
طارق: ومع من؟
ايه: مش عارفه منبيش نكذب عليك اكيد مع واحد من خوتها
طارق: لا فوتي
ايه قريب تبكي: عليش يا طارق والله عارفتك مش حتفضالي وبعدها خوتها محترمين وبوهم راجل سلفي ومتدين يعني مضمون
طارق سكت شوي: تمام تمام
ايه: نجك نججك
طارق يضحك: راجيني نجيبلك فلوس ونجي
ايه تضحك: ههيا به
عدا طارق لداره وشاف سماح تراجي فيه
سماح رافعه خشمها: شن تبي ايه؟
طارق قاعد يطلع في فلوس: ازعما يسدنها 500؟؟
سماح شهقت: ععليش؟؟؟
طارق: البنت تبي تمشي تشري دبش للمدرسه حرام
سماح: ومع من؟
طارق: مع صاحبتها
سماح: وانت موافق؟
طارق: اككيد
سماح قلبت وجها
طارق طلع ومشا ل ايه
طارق: 500 يسدن؟؟
ايه بفرحه: تمام بس بنقولك حاجه
طارق: شنو
ايه: وخواتي وين؟؟
طارق قلب عيونه: مش لازم نضني
ايه: حرام راا
طارق: اووففف راججي هن
خش للدار وقالب وجه وسماح استغربت قعد يعد في الفلوس وطلع ألف ججنيه لنرجس وشهد
سماح: ينعليي لمن تبي تعطيهن
طارق: لخواتي
سماح: مش من جدك؟
طارق قالب وجه: الله غالب... وطلع وسماح قريب نجلطت

طارق: هاا عطيهن هذن كل وحده فيكن تاخذ 500
ايه ابتسمت: نعنك ماتغيب
طارق: سلمك هيا خشي ارقدي... وعدا
ايه خشت على خواتها وترطز وفرحانه
نرجس شافت ليديها: ححي من وين الفلوس
ايه قعدت تحكيلهن
شهد: مش مصدقه اححلفي؟
ايه تضحك: وححقرببي
نرجس: واخيراا بنطلعو بككرا
شهد فرحانه: وووككك ععليااا
نرجس: الحمدلله في وحده فينا يحبها طارق
ايه تضحك: تخيلن مش عارفه عليش يحبني ومايرفضليش في طلب متأكده في حاجه
شهد: بلكي عشان انتي اصغر وحده ؟؟؟
ايه: اهها يمكن
نرجس: احكي مع تقوى توا بسرعه
ايه رفعت تلفونها ورنت على تقوى
...
تقوى: ها شن صار معاك؟
ايه: وافق وافق لولولولييي
تقوى تضحك: واخخيراا
ايه تحشمت: بنقولك يا تقوى
تقوى: هاا
ايه: خواتي شهد ونرجس يبن يمشن معانا را
تقوى: وععادي اححسن را
ايه: مايضايقوش خوتك؟؟
تقوى: لالا بلا هبال
ايه: نمشي نوتي لبسه من توا نا
تقوى تضحك: عدي عدي... وسكرت

🔥الـكـاتـبـه صـفـاء رجـب🔥.

ـــــــــــــــــــــــــــــــــــــــــــــــ

سماح: نحنا مش قاعدين على بنكك يا طارق
طارق: سماح بالله عليك خلاص
سماح تعيط: مش معقوله تعطي كل وحده500 خسرت راا واجد
طارق: نا بروحي كنت بنعطي ايه بس لاكن قلت نعطيهن عشان نريح راسي ونقعد عادل
سماح: تمام خلي ضميرك ينفعك لما تفلس... ورقدت
طارق خذا نفس وخش مرقده

ــــــــــــــــــــــــــــــــــــــــــــــــ

الساعه 1 في الليل

فضل خش للحوش وشاف بوه في الصاله
فضل: السلام عليكم
مهدي بعصبيه: وعليكم السلام
فضل: ان شاءالله خير ليش مزلت واعي؟؟
مهدي: نراجي فيك يا استاذ
فضل: عارف روحي تأخرت
مهدي: اخرلك مره راا معش في طلوع للوقت هذ.. وخش لداره يخبط
فضل: لا حول الله .. وعدا يبرم على تقوى ومحمد
جا عند دار تقوى لقاها مقفوله استغرب وخاف وقعد يطق
فضل: تقوى افتححي
تقوى سمعت صوت فضل فتحت الباب
فضل: كنك قافله؟؟
تقوى: صارت عركه بين محمد وباتي من بدري وقالي اقفلي الباب وماتطلعيش
فضل: وعليش؟
تقوى قعدت تحكيله
فضل: تعالي نبحتو ل محمد
عدو لدار محمد الي قاعد يصنت على اغاني 
فضل: اووييي
محمد : هها كنك
فضل: اصحا يحقك بوك يقتلك ويقطعلك ذانكك
محمد : يرا يمشي يملح
فضل يضحك: تافه
محمد: باه كنكم شن تبو؟
تقوى: من يبي يشيلني بكرا؟
فضل: نا
تقوى: بنقولك صحباتي بيمشن معاي را
فضل: وين يسكنن؟
تقوى: هن ثلاث خوات ومش بعيد را
محمد صبا: انت تريح يا فضل توا نشيلهن نا
فضل يضحك: موضوع فيه بنات واتيي
محمد يضحك: خلاص بكرا نا نشيلكن
تقوى: تمام... وعدت
محمد : كنت تدخن؟
فضل: اهها
محمد : اصحا يشمك بوك
فضل: لا مدورش
محمد يضحك: تعرف مضايقتني لحيتي نبي نحلقها
فضل يضحك: اصحا اديرها بس
محمد: واللهي شنو جو الشيوخ هذا قصدي لازم برضاك تقعد سلفي ومتدين مش غصبن عنك
فضل خذا نفس وطلقه: جت على هذي
محمد: بالله درق وجك عليا
فضل طلع ومضايق بس صابر عَ هم الدنيا💔.

ــــــــــــــــــــــــــــــــــــــــــ

الساعه 2 في الظهر

مهدي: سعاد ياسعاد
سعاد جت تجري: ها؟
مهدي: جبتلك خضره ولحم وتموين بالكامل اليوم عشاء الجمعيه عندي
سعاد شهقت: ينعلي كيف نبي نلحق؟
مهدي: ديري جوك كل حاجه عندك
سعاد: وبنتك تبي تعدي را من يبي يساعدني؟؟
محمد يسمع فيهم وساكت
مهدي رفع عينه في محمد ألي يفنص فيه
مهدي:..... يتبع
سعاد تشوفله وفاتحه فمها...