البارت 6🤍📍
نور كتبكي بحرقة : عيييت اماما عييت ... قلبي عااامر مبقى عندو فين يزيد يخبي .. ( بعدات عليها ) انا كرهت هاد العيشة وكرهت هاد الدنيا كلها بزاف على الحگرة مالي شنو درت الولد مسكين بحال خويا هو بوحدو لي لقيت فيه الخير كيوصلني موفر عليا فلوس طرونسبور .... ونت فراسك كوولشي كون كانت شي حاجة بيناتنا وش فنظرك انخليه يدخلني حتى الحومة !! ...
فاطمة : عارفة ابنتي عارفة وانا كنتيق فيك ، خليه يكول لي بغا يكول ماتديش على هدرتو .... ( غيرات نبرة صوتها ) راه ماكاين لي كيعمرو قد دوك الكفارة بالله
نور بعصبية : هدري معهم .. يبعدو مني ويقيلوني عليهم راه والله تاندير شي موصيبة فشي واحد فيهم انا مكنجبد تاواحد ... و ماكنسعى على حد .. حوايجي كنشريهم بفلوسي راه مكنجيبهمش من زنقة راه كنحرق عليهم دم جوفي ... عاد كنشدهم
فاطمة : آش غانهدر عيت مانهدر ... النهار ومطال وهوما عاسين فالدروبا على عباد الله وخاضيين الغادي والجاي
ماشي غير نت لي كتشكااي منهم راه كولشي ابنتي
نور : راااه انا لي كناااكل العصى ، انا للي رافدة الهم ماشي الناس .. رحمووني .. رحموووني ... قبل مانووووض ندير شي حااااجة فرااااسي
فاطمة وسعات عينيها ومشات عندها بزربة شداتها وجلساتها فوق السداري وجلسات حداها
فاطمة : اعود بالله من الشيطان الرجيم .. اش هاد الهضرة ...
نور : حيييت تقههرت ... بزاف عليا هادشي بزاااااف ....
تاحد مابغى يفهمني شوية زعما ؟
فاطمة عنقتها عندها حاطة دقنها على راس بنتها : انا ميمتك وانا فاهماك ... خلي البشار يهدر خليهم ينبحو بحال الكلاب انا هي لي كنحكم فيك وانا للي عندي الحق نقول على بنتي شنو للي دير وشنو ماديرش ... وهاد المرة لاعاود داك المسخوووط حط يدو عليك غانرجع نديكلاري بيه ونصيفتو واحد العام يتبرى .. وخا تاهو ولد كرشي ولكن تالظلم منسكتش عليه
نور هزات راسها فيها : انا غاندخل نعس شوية هاد الليلة نوبتي فالبيرمانونس
فاطمة : نوضي ترتاحي تايوحد لغدا ونفيقك
نور وقفات : وخا ماما
فاطمة : الله يشوف من حالك ياربي يسهل عليك بولد الناس يهنيك من هاد تمارة
نور بتاسمت ليها ومشات بلاما تجاوبها .. وفاطمة تنهدات بحرقة و ناضت الكوزينة تنصب لغدا وقلبها واكلها على بنتها كاتشوف حياتها ... تقلبات منهار تعرف ولدها على زكرياء بدل تعاملو مع ختو ولا كيضربها بحجة ان لباسها معري وكيجيب ليهم شوهة والعار قدام الناس ... و دين الاسلامي ديالنا نعل المرأة لي كتعري عورتها قدام الناس وباغي ختو يجحبها باي طريقة ولكن هو ماعرفش انا التوبة والهداية كاتجي منعند الله سبحانه وتعالى
نور هي البنت صغيرة فدار وخا عمرها مكيتجاوز 25 عام الا انها هازة عائلة ... قرات وخدمات انفيغمييغ فكلينيك وهي لي مقاتلة مع زمان باش تعيش عائلتها كونما هي كون خرجو اسعاو برا ... ولدها كيعمروه ديما على ختو وفينما يلقى الفرصة ينوض يضربها وشحال من مرة وصلات حتى السبيطار بسباب لعصى لي كيعطيها
هاد الفئة لي مابينها وبين دين غير الخير والاحسان كيحرمو مبغاو ويحللو مبغاو فدين وياخدو نص تاع ايات قرآنية اخدمهم فهدرتهم وكينساو نص لاخور هوما كيعرفو فدين غير القتل وتعصب نساو بلي دين الاسلام دين تسامح والمحبة دين اليسر وماشي العسر ... ودين عندو صحابو لي كيفقهو فيه اما هدا الفئة كيخليو غير بنادم انفر من دين بسبابهم ولات للحية لي كانت علامة وهواية كل مسلم بسبابهم ولات علامة ارهابية شوهو دين وخلاو كولشي يقول على دين الاسلام دين القتل وتطرف
البارت 7🤍📍
فالليل ....
كانت قدام مرايتها واقفة كتصاوب مكياجها دوزات كلوس على شفايفها هزات صاكها وطبليتها وخرجات لقات ماماها كالسة قدام تلفازة شادة المسلسل لي متبعاه ...
نور : ماما انا غادة الخدمة
فاطمة وقفاات : بلاتي نوصل معك لطاكسي
نور : يالاه
قادت فاطمة الدرة على راسها وخرجات مع بنتها حتى الخرجة دالحومة وقفو تادازت طاكسي ركبات ومشات لخدمتها وفاطمة رجعات لدارها تنعس .. لانها كانت العشرة دالليل
وصلات نور الكلينيك دخلات ولي شافها يبتاسم ليها نور محبوبة الكل بطبعها وتعاملها مع زملائها فالعمل دارت بلاصتها بيناتهم .... وخا قاصحة ومزاجية ولكن فاش توقف عليها تلقااها راجل معك دخلات لواحد المكتب كتلبس فطبيلتها تادخل عليها فؤاد
فؤاد : سمحيليا كانت عندي اوبيغاسيون داكشي باش ماقديتش نجي موراك
نور : ماعليش راني خديت طاكسي وصلني
فؤاد : انا غادي دبا مع 9 دصباح غاندوز موراك نديك عاد نجي لخدمتي
نور : وخا
جا خارج هو يتلفت عندها ....
فؤاد : نور
نور : وي فؤاد
فؤاد : خفت نقولها وتقلقي
نور : هي شي حاجة غاتقلقني
فؤاد : صراحة البارح صاحبي لي كناخد من عندو طوموبيلات ( سرط ريقو ) عجبني واحد الموديل ودفعت ليك فوحدة ( نور خرجات فيه عينيها شافها غاتنطق قاطعها ) خليني نكمل هدرتي بعدا .... طوموبيل عجباتني ودفعت ليك فيها النص بقى النص الى بغيتيها ووافقتي خوديها وكل شهر غيقتاطعو ليك واحد المقدار من فلوسك حتى تكمليها بالخلاص
نور : فؤاد نت خويا وعزيز عليا ولكن سمحليا مغنقبلهاش منك نتا كتعرفني مكنبغيش نشد شي حاجة ماشي ديالي نهار يسهل الله تا انا غنشد طوموبيل غير نكمل الكريدي لي بقى الواليد الله يرحمو ونشوف ليا طوموبيل
فؤاد : راسك قاصح والله
نور : ماكاين ماقصح من راسك سير رجع فلوسك ودعي مع ختك يسهل عليها الله تاخد تاهي طوموبيل
فؤاد : الله يسهل عليك
نور : امين
خرجات هي وفؤاد من المكتب هو مشا فحالو وهي مشات تشوف المرضى كاين لي كمل ليه سيروم خاصها تقاد ليه واحد جديد وكاين لي وصل وقت دواه كتعطيه ليه بقات هكاك من مريض لمريض حتى صبح عليها صباح ....
أنت تقرأ
ثبت على يديه
Kısa Hikaye#قصة_دينية #قصة_مغربية_بالدرجة #قصة_رمضانية ✍️ بقلم : ايمان العماري لا شك أننا أصبحنا في زمن مليء بالفتن والملهيات عن طريق الله ونحتاج جميعاً لتجديد التوبة وتجديد العهد مع الله -جل و علاه- فمهما عَظُم ذنبُك، لا يلعب بك الشيطان، ويبعدك عن باب الت...
