ثبت على يديه

الجزء1🤍📍

البارت 1🤍📍

كالسين فالمجمع ديالهم وسط الحومة كيفما تعودو كل نهار مركزين مع حديثهم ولكن عينيهم حاضيين الغادي والجاي خصوصا النساء ... فينما دوز شي وحدة يعلقو عليها 

زكرياء كيدوز بيدو على لحيتو طويلة : هاد الحومة توسخات غير بهادو وليت نحشم نقول راني ساكن هنا

- نطق رجل اخر : خاصنا نديرو حد لهادشي

زكارياء : عندك الحق خاص تنقا دنيا خاص رجال لي نهدرو معهم يحكمو لعيلات ويحجبهم ولا خرجات شوحدة بلا متستر نفدو فيها شرع

الرجل :عندك لحق رجال لي خاصهم احكمو نسائهم 

- زكرياء :  خت محسين عرفتوها

- : مالها جاتك شي خبار عليها 

زكرياء : هديك فاتت لحدود  د ... لعرا والخدمة وزيد كيوصلوها طموبيلات خاصنا نحطو ليها حد

- : البارح حطاتها  طوموبيل فالخرجة دالحومة

زكرياء : نهدرو مع خوها هو احكمها

الرجل الثالث شاف وحدة دايزة لابسة دجين مزير على مفاتينها وتيشورت قصير بقى حاضيها بعينيه  هو يحدر راسو بزربة : اللهم ان هذا لا منكر

زكرياء حدر عينيه تاهو : آش هاد المنكر ولا فهاد البلاد  لاحول ولا قوه الا بالله

- : الاخوان غضوا بصركم ، الرسول صلى الله عليه وسلم  قال : " اصدقو اذا حدثتم ، واوفو اذا وعدتم ... ( قاطعو زكرياء )

زكرياء : وغضوا ابصاركم ، وكفو ايديكم "

- : مابانش ليكم محسين اليوم

زكرياء : غايكون فدارو

- شاف وليد صغير دايز من حداهم هو يعيط ليه : عصام اجي عندي

عصام تقدم لعندو : نعام اعمي

زكرياء خنز فيه : فين هي التحية لي كنت علمتك

عصام سرط ريقو ونطقها بزربة : السلام عليكم ورحمة الله تعالى وبركاته

زكرياء : احسنت 

- : سمعني غاتمشي لدار محسين العماري وقوليه الاخوان كيتسناوك فالمجمع ديالهم

عصام : وخا

مشا داك الولد كايجري  لدار محسن ، وقف كينهج وبدا يدق فالباب لي كان مفتوح وكيعيط عليه ...

عصام : خويا محسين صحابك بغاوك تجي عندهم دبا

فاطمة الام : اشكون هادو ا عصام

عصام : دوك  لي دايرين اللحية اخالتي

فاطمة : صافي غير سير انا غانفيقو

دخلت عندو لبيت  كيف توقعات لقاتو باقي ناعس حلات سراجم يتنفس البيت ومشات عند راسو كتفيقو

فاطمة : فيق المسخووط فيق  راها طناش ونتا مزال ناعس قرانك خدامين ونت مجبد لينا هنا لا خدمة لا ردمة

محسين دار مخدة مغطي بيها وجهو : صافي دبا نوض غير سيري

فاطمة كتجر عليه ليزار : حتى العصر ؟؟؟ ... نوض تكعد نوض دوك الكفارة بالله كيعيطو ليك

محسين حيد المخدة من وجهو كيشوف فيها بعين وحدة : شكون ؟؟

فاطمة : شكوون من غير هادوك لي محمقيينك شي نهار يخليوك تجري فزنقة بلا حوايج ...

البارت 2🤍📍
محسين ناض كالس كيرد فشعرو للور : هادوك هوما لي كيعرفو فالدين وكيتقااو الله ماشي بحال داك البنت لي عندك كاع دنوب القوم  كتجمعهم على كتافها ملي تخرج من الدار والملائكة كتلعن فيها

فاطمة : هاديك لي كدوي عليا دايرا النفس فراسها ومعززة راسها ماتمدش يدها وتكول عطيني ... هديك هي الراجل تاع الدار اما كون عولت عليك نتا كون ضربنا لخلا

محسين   : دبا مالنا على هاد الهدرة .. بنت ليك انا كرهت الخدمة !!  ... راه الخدمة لي  مبغاتنيش عييت ماندفع سيڤيات تاواحد ماعيط ليا

فاطمة : نهار تحيد هاد اللحية عليك وتولي بحالك بحال عباد الله غاتخدم .... ماحدك هكا ماغيقبل عليك حد

محسين : الواليدة بدلي ساعة بخرا صباح هدا

فاطمة كلسات فوق النموسية : عار ربي لما قوليا دوك لمساخط كيفاش تاردوك هاكا 

محسين :  واش دابا حتى لي بغا يشد طريق الله اتبقاو تابعينو ؟؟؟

فاطمة : منهار داخلتي معهم ونتا حاط على ختك مكنتيش هاكا معها

محسين : والى مبغاتش تحشم غاندير فيها كثر نعطيها لعصا تاتشد  معيا الطريق مغنبقاش  نسكت ليها تاتجيب لينا شي فضيحة باركة غير شوهة لي دايرا لينا فالدرب

فاطمة :  واش لي بانت ليكم كتلبس هكاك راه خايبة !!!

محسين : تستر راسها والى مفهمتش هدرتي بالخاطر انفهمها ليها بطريقة خرى حتى دخلها لدماغها ولا نشقوه لوالديها وندخلوها ليه بزز

فاطمة : الله يرد بيك هدا مانكوليك

وناضت الكوزينة تشوف شغلها ومحسين دخل لدوش يدوش منهار تخالط مع هادوك وفاطمة ممهنيااش عليه لحقاش عارفة دوك نوع شنو باغيين منو .... محسين داك الولد لي كان وخا منحارف ولكن عندو صمعة زوينة عمرو وصل شي واحد بالعيب ... كان محبوب عند جيران كاملين ولكن ملي تعارف على زكرياء ولا بحالهم لا من ناحية طريقتهم فتفكير ولا فلباسهم وحتى فالهدرة ديالهم .. حتى من ختو ولا غير حاط عليها وفينما يلقى الفرصة يضربها  ....  
خرج من دوش كينشف فشعرو مشا الماريو جبد حوايجو عبارة عن شورت وپيل سماطي بيض لبس فوقهم فوقية قصيرة وخرج
لقا مو حطات ليه لفطور ، خدا فطورو هز سوارتو وتيليفونو وخرج الوجهة ديالو ....