في داخلي جمر انتظارك مستعر

ليلة الملكة

٠
٠
•
ليلة الملكه كان الجو حلو فقرر ابو سعد يسوي مخيم كبير عند النياق للحريم والرجال
ام سعد جهزت المواعين علشان ياخذها نايف وبدر للمخيم ، كان سعد واقف في الحوش على عكازه ويشرف عليهم ويعطيهم اوامر
عساف بقهر : هين والله لردها لك
سعد : اخلص ، ماعندنا وقت ، بعدين هذه ملكتك
قرب سلطان واعطى عساف صندوق : خذ هذه عدة القهوة
وترى انت اللي بتسويها
عساف : اخس عليكم تبغوني اكرف في ملكتي
سلطان : ايه لانا راح نكرف في زواجك وانت بترتاح
عساف بخبث : ايه صح ، بحط الزواج في الديرة ولا راح اجيب قهوجين انت وهو بتقهوون المعازيم
سعد : اخلص ابوي جاي
هرب عساف وسلطان قبل يوصل لهم ابو سعد

لبسوا البنات وتزينوا نورة لبست فستان كحلي طويل ضيق من الصدر وواسع من تحت وعلشان برد لبست فرو ابيض وسوت شعرها ويفي
هيا فستان اسود واسع لان كرشتها بدات تكبر ارسل لها مصعب فروة مع نايف بعد ما ارسل في الجوال يسالها : بردانه
درت : شويات
مصعب : برسل لك فروتي ما احتاجها
حور وريم لبسوا فساتين واسعه تشبه بعض والكل يضحك عليهم ويناديهم : قهوجيات
غاليه لبست فستان عنابي ضيق وكان شتوي وسوت شعرها ذيل مرفوع
بنوا للحريم خيمتين وحده فرشوها زل ومساند
والثانيه استاجروا لها كراسي

مخيم الرجال كان بيت شعر كبير حطوا فيه مساند ومراكي
وشبوا نار نايف استلم القهوة وبدر الشاي اما مصعب وعساف كانو يصبون القهوة وقف سعد معهم يساعدهم لكن رجله تعبت وجلس
سال واحد من ارجال الديرة : سعد ، من زمان ما جيت هنا
سعد : رحت الرياض ادرس في الجامعة
رجال ثاني : ماشاء الله اجل دخلت الجامعة زين وانا عمك التعليم مهم
ابو سعد بكل فخر : ايه وراح يصير محامي ان شاء الله
رد شايب : الحامي الله يا بو سعد
ضحكوا العيال لكن اسكتوا بعد ماشافوا نظرات ابو سعد لهم
بعد العشاء قرب عساف من سعد وهمس : متى اشوف زوجتي
سعد : يوم العرس
عسال : سعد بالله لا تقول كذا
عطاه سعد نظره تخوف : تبغي تموت او تعرس
كشر عساف وراح يجلس بجنب سلطان ويتحلطم انفجر سلطان ضحك عليه

البنات كانو مشغولات مره يضيفون ويحيون مبتلشين
دخلت  نوره خيمة المطبخ تسوي قهوه علشان تساعدهم
دخلت حور : بالله هذه العروس الحين ياعزتي لك
دخلت هيا : نورة اتركي من يدك
نورة : لا انت روحي انت تعبانه
دخلت غاليه : نورة خير اطلعي انا اسوي القهوة
نورة : بنات عادي طفشت قاعده لحالي في الخيمه
هيا ارفعت جوالها تنظر فيه جاتها رساله ، بعدين قالت : خلاص اجل خليك وانتم بنات اطلعوا
غاليه باستغراب : من جدك هيا
هيا تدف البنات : اطلعوا ، خلاص اطلعوا
غاليه : انا بقعد معها
قربت هيا من غاليه وقعدت تغمز بعينها : غاليه .. اطلعي
غاليه ما فهمت عليها وطلعت

سعد قرب من عساف وهمس : رجلي تعورني ، نسيت اشرب علاجي
عساف : عارف انك بزر لازم احد ينتبه لك فين علاجك
سعد : في الخيمة القديمة
عساف : اللى مطبخ
سعد : ايه ، في شنطة صغيره لونها كحلي
عساف طلع وتوجه للخيمة وهو يتافف من اهمال سعد
دخل وهو يكلم نفسه : لونها كحلي صغير ، فين احصلها
جمد مكانه اول ما شاف بنت في الداخل وطلع دق سعد
ورد عساف عليه : الله ياخذك ورطتني
سعد :  قول لنورة تعطيك اياه تحصلها في الخيمة وضحك وسكر الخط
دخل عساف وحصل نورة متجمده مكانها هي تعرف عساف سبق وشافته بس اول مره تشوف من قريب ، كان لبس ثوب اسود وعليه سديري بيج ومشخص بشماغ
كان جسمه رياضي له شارب خفيف بس
دخل عساف وقرب منها وهو يقول : سعد يقول قل لنورة تعطيك علاجي
نورة باحراج : قربت من شنطه معلقه على عامود الخيمة وطلعت العلاج ومدت لعساف اللى قرب منها اكثر وهو يتاملها كانت جميله جدا جدا لدرجه انعقد لسانه وده يقول مبروك ووده يسال عن اخبارها بس ما قدر 
نورة : كيفك يا عساف
ابتسم عساف : بافضل حال مدامك صرتي لي
دق جواله وكان سعد فرد عليه : سعد بعصبيه : شكلك نمت هناك ، اطلع لجيك
عساف قفل الخط في وجهه ونظر في نورة : كنت جايب لك هدية بس تركتها في السيارة ، ما توقعت اقابلك هنا
، بروح اجيبها وارجع لك ، لا تروحين
طلع وحصل سعد متوجه لهم عطاه العلاج وكمل طريقه لسيارته ، سعد يناديه : عساف ، هيه ، ولد
عساف : جايك ، جايك
دخل سعد الخيمة وحصل نورة داخل ابتسم لها وقال : مبروك يا نورة
نورة : عقبالك يا سعد
رجع سعد العلاج لنورة وكان بيطلع بس دخل عساف
سعد فتح عيونه  : هيه انهبلت
تعداه عساف وهو شايل بيده شي
انهبل سعد من تجاهل عساف له  : عساف ، اطلع
عساف عطي نورة الهدية : مبروك علينا ان شاء الله تعجبك
سعد مسك كتفه يشده ، عساف : خلاص ياخي بطلع .. بس والله لوريك .
التفت لنورة وكمل : شدي حيلك وخلصي دراسه علشان نعرس بسرعة
سعد لف يده على رقبة عساف : اقول اطلع
تحرك عساف وطاحت عكازة سعد وبغي هو يطيح بعد ، طلع من سعد صوت الم
لكن عساف ثبته : انتبه ياحمار
اخذت نورة العكاز ومدتها لعساف اللى اخذها وهو يبتسم
سعد سحب العكاز : اخلص .. طلعنا  ، الشرهه على انا اللى عطيتك وجه
باس عساف راس سعد وطلع قبله ، الحقه سعد وهو ينادي : عساف ،، وقف ، انتظرني ،، انهبل رسمي
طلعوا الاثنين وبقت نورة لوحدها مرتبكه وخايفه فتحت الهديه وكانت سلسال ذهب ناعم فيه تعليق قلب داخله ورده سكرت العلبة وهي تبتسم
دخلت هيا وغاليه وهو يضحكون : ان شاء الله اعجبتك
نورة : وجع كنتم تسمعون
هيا : يا قلبي ياخوي بغيتوا تذبحونه انت وزوجك
غاليه : ماتوقعت من سعد هذه الحركات
نورة : سعد طيب مره بس حظه اقشر
انحرجت غاليه وطلعت على طول من الخيمة وشافت سعد واقف من بعيد مستند على عكازه

راحو المعازيم بس ال سعد نامو في المخيم
صحى ابو سعد واذن بعدين صحي العيال واخوه عبداللطيف يصلون
سعد بعد الصلاة عجن وخبز ( قرص) ونايف سوى الشاي والحليب ، حطوا الفطور كان معلبات وقرص
نايف بحسره : البارح مفاطيح ولحم  ولا ذقتها والحين اكل معلبات
ابو سعد : نعمه ، اكل و حمد ربك
عساف : انا قربوا مني القرص والشاي
سلطان باحراج : عمي ، انت الحين كبيرنا وفي مكانة ابوي
ابغاك تخطب لي
عساف ضحك : غار ، غار الدكتور
ضحك سلطان وضرب عساف في كتفه : انطم
عساف : باقي سعد اخطبوا له بعد
سعد ناظر في عساف بعصبيه : عساف ، على شحم
ابو سعد : ابشر وانا عمك
ابو بدر :وانا مالي دور
نايف باس راس عمه : انت تخطب لي انا
مسح ابو بدر راسه : وجع وصختني بفمك كله قشطه

ام سعد صحت بدري وسوت قهوة وشاي وبدات تصحي البنات بس ما احد صحي منهم لانهم نامو متاخر ، كانوا طول الليل سوالف وضحك ورقص واستهبال
صحت ام سلطان وام بدر والجده وام مصعب وام عساف
قعدوا يسولفون ويفطرون على مهل
اول من صحي هيا نادتها عمتها ام مصعب : تعالي افطري لا يزعل على مصعب يقول ماتهتمين في زوجتي
هيا : ماعليك منه ، انت مافيه افضل منك ومن اهتمام
بعدها صحت غاليه ونوره اما حور وريم ودانه باقي نايمين
بعد الفطور قالت غاليه ودي اطلع امشي من يجي معي
هيا : والله ارجولي توجعني مالي حيل
نورة : انا اطلع معك
لبسوا عباياتهم وطلعوا يمشون قربون من شبك النياق
نورة اشرت على وحده من النياق : هذيك الناقه اسمها : عاليه ، سعد مسميها
هزت غاليه راسها باستغراب ، كملت نورة : طبعا كلنا نعرف ان الحرف الاساسي (غ) بس نسوي نفسنا ما نفهم
ناظرت غاليه فيها ببلاهه
ضحكت نورة ومسكت يدها : مشينا مشينا
مشت الثنتين وغاليه باقي تفكر في كلام نورة (غ) الحرف الاساسي ، عاليه ... غاليه .. استوعبت غاليه اخيرا والتفتت لناقه وهي تبتسم من تحت نقابها وتقول في نفسها : عاد من زينها علشان يسميها على