في داخلي جمر انتظارك مستعر

خاب ظني

.
.
•

ثاني ايام العيد الظهر الجد ابو راجح جالس سرحان ويفكر ولا هو منتبه لعياله واحفاده حوله
ثم رفع راسه وسال : عبدالرحمن
عبدالرحمن ( ابو سلطان ) سم يبه
ابو راجح : بنتك خلصت دراسه
ابو سلطان باستغراب : اي وحده تقصد
ابو راجح بزفرة : الكبيرة
انشد الجميع لكلام الجد وهو مستغربين
ابو سلطان : باقي لها ترم ، اقصد باقي لها اربع اشهر
التفت الجد بسرعة لسعد وقال : وانت مهرك جاهز
سعد باستغراب : كيف
ابو سعد : ايه جاهز
سعد ناظر في ابوه بقلق لانه مايدري هل فعل جاهز المهر او لا
ابو راجح : اجل ادفعه علشان البنت تجهز نفسها والعرس بعد خمس اشهر
سعد بغي يطير من الفرح اخيرا راح يحنون عليه من الانتظار  ويحققوا له الحلم اللي من ثمانية وعشرين سنه ينتظره  من لما كان عمره ست سنين اول ماشافها بين يدين جده وهي طفلة في عمر سنه قام يبغى يبوس راس جده بس وقف يوم سمع عمه يقول
ابو سلطان بغضب : مهر ايش وزواج ايش
ابو راجح : زواج سعد وغاليه
ابو سلطان : ومن قال
ناظر سعد  في عمه بقلق
ابو راجح بغضب : بعد كلامي مافيه كلام
ابو سلطان : اسمح لي يا بوي ، انا مو موافق ، بعدين اصلا ناصر وولده ما خطبوا مني
ابو راجح : نخطب منك ، انت عارف من زمان ان سعد لغالية وسلطان لهيا
سلطان بعصبيه : على كيفكم تزوجوني انتم
صرخ ابو راجح : اقضب اللسانك يا ولد
حاول سلطان يتكلم لاكن ابوه وقفه : يبه انا ماعلى من الكلام اللي ينقال ، بعدين كانوا صغار ، والحين تغير كل شي
انا مربي عيالي على الغالي وعلى الحرية في الاختيار
ابو سعد بزعل : وعيالي ارخاص يا عبدالرحمن
ابو سلطان : ماقلت شي في عيالك ، بس ما يصلحون لعيالي
فز ابو سعد وهو يقول : وعيالي مايشرفني ازوجهم عيالك
صرخ ابو راجح : تهاوشون وانا بينكم ما عاد تستحون او تحشموني
تدخل عبداللطيف : تعوذوا من ابليس ، بعدين المواضيع هذه ما تجي بالهواش
ابو سلطان : فهمهم
ابو راجح بعصبيه : انا ولد ابوي ، الحين انا ما افهم
بو سلطان : محشوم يبه ، بس تكفي لا تزعل ، اسوي اللي تبغى بس هذا الموضوع اسمح لي فيه
التفت ابو سلطان لولده وقال : كلم امك واخواتك بنمشي
بعدين طلع من المجلس بعد ما حب راس ابوه
جلس ابو سعد وهو معصب ويتحلطم
سعد لعمه عبداللطيف : عمي تكفي ، لا يطلع زعلان
ابو سعد : سعد ، والله ان تكلمت معه لاغضب عليك
سعد : يبه ، ترى احنا الغلطانين  ، نبغى يزوجونا من غير مانخطيب
ابو راجح : سعد روح لشبك الغنم انت والعيال
عرف سعد ان جده يبغي يصرفه من المكان لكذا طلع وطلعوا العيال معه

مشى ابو سلطان لدمام وهو معصب وطول الطريق ساكت
ام سلطان جالسه مع بناتها وراء وسلطان يسوق فيهم
وصلوا البيت وبعد ما دخل ابو سلطان لغرفة
سالته ام سلطان : وش صاير ، واضح زعلان
خبر ابو سلطان زوجته باللي صار
ام سلطان افتحت عيونها بتعجب : من جده عمه يبغي ازوج عيالي عيال عبدالرحمن ، ولدي دكتور ياخذ قرويه ما كملت تعليمها ، اكبر همها تعرس وتجيب عيال تمسكهم الغنم
ولا سعد الطعس اللي ما يعرف غير النياق والغنم ياخذ الغالية
ابو سلطان بعصبيه : خلاص ياحرمه انهيت الموضوع
ام سلطان : ابو سلطان تكفي لا تضعف
ابو سلطان : مستحيل افرط في مستقبل اعيالي

رجع سعد والعيال بعد صلاة العشاء وحصلوا جدهم نايم
وابو سعد وابو بدر في المجلس
ابو بدر : بدر وانا ابوك بنمشي اجهزوا
سعد جلس بجنب عمه وقال بعتب : حتى انت بتمشي يا عمي ، تو العيد ماخلص
ابو بدر : ماعليه نجيكم مره ثانية
شالوا نايف وبدر العفش وحطوه في السيارة ومشي عبداللطيف لبيته
ابو سعد : نايف خل امك تفرش فراشي
نايف : ابشر
سعد : يبه
ابو سعد : سعد والله ان عاد فتحت هذا الموضوع مرة ثانية لطردك من البيت
قام ابو سعد وراح ينام في غرفته
دخلت ريم وسالت : تبغون عشاء ، تعالوا في الصاله
جلس نايف وسعد مع امهم واخواتهم على السفرة وبدوا يتعشون
ام سعد : سعد اعمامك ليش راحو
سعد : يقولون عندهم شغل
نورة : روحت عمي عبدالرحمن واضح فيها زعل
سعد : تعشي وانت ساكته
نورة تاففت وخزتها امها بنظره سكتتها
بعد العشاء طلع سعد للمجلس وجلس لوحده يفكر في اللي صار ويتسائل : ليش عمي سوى كذا ، ليش بعد ما وعدونا واحنا صغار غيروا رايهم ، انا رجال مايضرني ، 
لكن هيا ايش ذنبها عمرها الحين سته وعشرين من ياخذها الحين
تنهد وقال بحزن : معقولة ياسعد انتهي حلمك قبل يبدي ومات حبك قبل تتكلم عنه ، خلاص غالية اللي انتظرتها كثير معاد هي لك

دخلت غاليه غرفة سلطان اللي كان منسدح على سريره يطقطق بجواله ، جلست على الكنبه قبال السرير
سلطان بتذمر : وش تبغين
غاليه : وش صاير
جلس سلطان وقفل جواله وقال : تخيلي ان جدي يبغي يزوجني هيا بنت عمي ناصر  وانت بيزوجك سعد
غاليه : كيف
سلطان : لا تخافين ابوي وقف لهم ورفض هذه المهزلة
غاليه : اكيد جدي زعل
سلطان : يزعل ويرضي
غاليه : جدي اذا زعل صعب يرضي
سلطان بتشكيك : لايكون تبغين سعد
غاليه : مستحيل ، صاحي انت تقول كذا
سلطان : مدري عنك كانك زعلتي
غاليه : زعلت على جدي وعمي
سلطان : اجل تزوجي سعد
دخلت ام سلطان وقالت : ما احد متزوج وهذا الموضوع قفلوه تفهمون
.
.
•