في داخلي جمر انتظارك مستعر

سامحيه يا غاليه

٠
٠
•
في السيارة مسافرين لرياض ابو سعد مع نايف وسلطان
ومعهم ام سعد اللى دمعتها ما وقفت من الصباح
كان سلطان يسوق وعمه بجنبه ونايف جالس مع امه وراء
ابو سعد يتنهد بحسره وحزن
سلطان يلتفت على عمه : اذكروا الله ، بحول الله تكون سليمه ويقوم بالسلامه
التفت ابو سعد لنايف : رد عليك عساف
نايف : لا
ابو سعد : وين راح هذا ، دق على مصعب
نايف : دقيت ما يرد هو بعد
ام سعد بحزن : مات اكيد مات
ابو سعد بعصبيه : تعوذي من ابليس لا تقولين كذا
سلطان : يا خاله انا كلمت واحد اعرفه في المستشفي
قال لي سعد كان في العمليات والحين نايم علشان باقي تاثير البنج فيه لا تخافين العمليه انجحت واكيد بصحى
ام سعد بحزن : تكفي يا سلطان سامح سعد ، خلوه يرجع لي ، ما راح يقرب منكم بس سامحوه
سلطان : مسامحه يا خاله انت تكفين سامحيني
ام سعد : مسموح يا ولدي ، مسموح انت ولد عم سلطان وحسبه اخوه
سلطان كان يكذب عليهم ، سعد حالته حرجه جدا حتى ان الدكتور قال : اذا ما مات يمكن يعيش مشلول طول عمره

ام سلطان على سجادتها تدعي وتبكي : ربي سامحني ، يارب لا تفجع قلب ام في ولدها ، والله سامحته بس الشيطان غرر فيني والغضب والقهر اعماني ، يارب تشفيه وتقومه بالسلامه
ام سلطان من اول ما علمها سلطان عن حالة سعد وهي تبكي عليه وتدعي له ، حتى كانت تبغي تروح معهم بس سلطان : يمه مافيه مكان باخذ عمي وخالتي ونايف
بس راح اكلمك وطمنكم
ام سلطان : قول لعمك يجيب البنات عندي

نورة وريم وصلهم نايف لبيت عمه قبل يروح مع سلطان لرياض ، نورة وامها كانوا مقاطعه بيت ابو سلطان من اول ما طردوا سعد ، ولا تكلمهم ابد ، كانت ريم وحور بس يزورون بعض ويسهرون مع بعض ، اليوم راحت عندهم وهي خايفه ولا تفكر في شي غير سعد ، استقبلتهم ام سلطان برحابة صدر حضنتها ومسحت على ظهرها وهي تدعي ربها ان سعد يقوم بالسلامه
غاليه ما طلعت من غرفتها ابدا ولا قابلت بنات عمها وهذا اللى زعل نورة

غاليه في غرفتها تعيش صراع في داخلها مو قادره توقف وتحدد مكانها ، سعد اللى قهرها وسبب فعله في تشويه سمعتها ، ولا سعد ولد عمها اللى حاول يحافظ على صورة ابوهم ومكانتها في عيونهم ، سعد اللى خوفها وهانها ، ولا سعد اللى دافع عنها بكل قوه
دق جوالها وكان رقم غريب وردت عليه : نعم
جاءها صوت بسمه : مرحبا ، انا بسمه ، اخذت رقمك من سلطان
غاليه : هلا ومرحبا فيك
بسمه : ممكن تطلعين معي مشوار ، انا استئذنت من سلطان اخذك مشوار
غاليه باستغراب : مشوار ، ليش
بسمه : انا برى انتظرك
وقفلت
غاليه اخذت عباتها وطلعت لغرفة امها واستأذنت منها
وطلعت مرت من الصالة ، كانت نورة وريم جالسين مع حور ، قربت من نورة واخذتها في حضنها نورة على طول بكت : سعد يا غاليه بيروح منا للابد ، سعد اللى قهرته الدنيا وقهروه اهله
مسحت غاليه على ظهر نورة : ادعي له
نورة : تكفين سامحيه يا غاليه ، تكفين
تركت غاليه نورة وحضنت ريم اللى طلبتها نفس طلب نورة
غاليه : انا عندي شغل بطلع
وطلعت من غير ما تنفذ طلب بنات عمها ، حصلت بسمه في السيارة ركبت معها
بسمه : مرحبا ياغاليه ، كيفك
غاليه : بخير ، كيفك انت

جلست جدة سلطان مع البنات وهي تطمنهم : قومن صلن واقروا قران اذكر والله وادعوا لا تخلون بليس يسيطر عليكم
نورة : لا اله الا الله
جدة سلطان : ايه يمك ربي رحيم يستجيب دعوة العبد
واخوك بار بوالديه وهذا عمل خير يدفع فيه الله الشر عنه
ريم : والله سعد طيب وحنون حتى لو عصب وهاوش قلبه طيب
حور : والله اني احبه مثل سلطان ، دائما يجيب لنا هدايا اذا جيناكم الديرة ويشتري لنا حلويات وياخذنا لنياق
نور في داخلها : وهذا ما شفع له عند اختك حتى ما هان عليها تكذب على وتقول سامحته

انزلت بسمه وغاليه عند البحر
بسمه : انا سمحت لنفسي اتدخل ، لاني حبيتك وشفت فيك بنت قويه ذكرتيني في نفسي كثير ما انهزمت ابدا ولا سمحتى لاحد يوقفك كملتي ودرستي ونجحتي ، بس انا متاكده ان باقي في قلبك نقطه سوده تتعبك وتشتت تفكيرك ، سامحي يا غاليه علشان نفسك ، علشان ترتاحين ، انا سامحت ولد عمي وعمي وهو سوو في الكثير اضربوني واحبسوني وهانوني ، بس سامحتهم علشان نفسي
والحين كلنا نعيش مرتاحين
غاليه : انا مو عارفه ايش ابغي مو قادره افهم نفسي ، هل انا زعلانه على سعد علشان اللى سواه ولا علشان نفسي
بسمه : كيف ما فهمت
غاليه : يقولون سعد يحبني ، بس انا ما شفت حب في عيونه
شفت قسوه وغضب
بسمه : يمكن ما فهمتي عليه
غاليه : هاني قدام الرجال صرخ على ، ودفني ، رفض اروح معهم للمستشفي مسك يدي يجرني من غير حق ، ليش ، يسوي كذا اذا كان يحبني ...
ابتسمت بسمه وهذا خل غاليه تسكت وتسال : ليش تضحكين
بسمه : انت كنت تحسبين راح يسمع كلامك ويكون خاضع لك علشانه يحبك
غاليه : مو كذا
بسمه : هنا مربط الفرس ، سعد رجال شرقي وبدوي بعد الحب عنده افعال وهو في ذاك الوقت يحميك ويحمي قلبك من الصدمه ما يبغاك تسمعين او تشوفين ابوك ضعيف ومنهار او يوضح فشله ويشكي همه ، اما ليش لحقه كان بس بيخوفك ويبغاك تبعدين عنه ، يمكن بعد كان يمزح ، وانت تعرفين مزح الرجال ثقيل فهمتي الحين
غاليه انهارت بكي معاد تقدر تتكلم ، جلست بسمه معها ساكته ، وبعد ماهدت سالت : وش بينك انت وسلطان
بسمه : ولا شي بس صداقه بعد عداوه
غاليه بتعجب : بالله
بسمه بخجل : مو اللى في بالك اقصد تفاهم ، ضرب بسمه غاليه وهي تقول : هيه وش النظره هذه
غاليه وخرت عينها عنها وفي عقلها مئة سوال

هيا دخلت المستشفي انهارت لما سمعت عن سعد
عمتها ام مصعب معها ومصعب بعد ، دخلت الدكتورة : كيفك يا هيا
هيا وعيونها مو قادره توقف بكا : طيبه
الدكتورة تنظر فيها وهي تبتسم : اذا جبتي ولد سميه سعد على اخوك ، واذا بنت سميها سعده
سكتوا الثلاثه ينظرن للدكتورة بتعجب
الدكتورة تنظر في مصعب : مبروك المدام حامل
فز مصعب من الفرح بغي يبوس الدكتورة بس امه صاحت : ولد وش فيك
التفت على هيا وباس راسها : مبروك حبيبتي والله لسميه سعد
هيا : لا سعد ما مات علشان اسمي عليه
ام مصعب : ايه ما مات بيطيب ويرجع لنا متعافي ويجيب السمواه لولدنا ان شاء الله
راح مصعب لامه وحضنها وباس راسها
ام مصعب بحزن وفرح مجتمع : مبروك يمك الله يتمم لكم ويرزقكم بالولد المتعافي والصالح
مصعب : لو بنت اسمها على اسمك يمه شيخه
ام مصعب : امها اللى تسميها
هيا تنظر في مصعب الفرحان ودها تفرح مثله بس قلبها موجوع على اخوها ، قرب منها مصعب فهم عليها مسك يدها وباسها : سعد بحول الله بيتعافي ويرجع لنا
هيا : امين