آمر لوجين

Part 28

البارت الثامن والعشرون..

____🥺🤍____

ڪما قال أحدهم :
‏من الصعب جداً وضع الشعور في الكلمات ♥."

--------------------------------

بقى يومين البيت مخبوص وهو يدخل يصيح ويطلع يصيح..

ثالث يوم
اجه من الصبح سويت إله ريوك
بقى ياكل بهدوء اخر شي
كال..
_ اريد احجي وياج

_ شنو

_ كعدي

كعدت مقابيله بتوتر منتظرة يكمل كلامه
_منو زرع براسج فكرت الزواج
صار شكد هنا مقصر بشي وياج او وي الجهال؟

_ لا ما اريد ازوج

_ هذا الحجي الزين لا تعبيني وما عليج بحجي امي موتني من القهر يومين مشايف النوم الله يرضاها

سكتت ما رديت علية..
تنهد وكال..
_الي يحاجيج بهذا الموضوع كليلي كلامك وي آمر

_ ان شاء الله

ابتسم وصفن بوجهي ..
_ ان شاء الله خير

هزيت راسي وسكتت
لان فعلا ما اريد ازوج صح كلام عمتي واقعي
بس أطفالي بعدهم اصغار متعودين على آمر
ما اريد احرمهم منه مثل ما نحرموا من ابوهم
يبقى كاظم يبقى كاظم غريب
ما اعرف الزمن شنو ضام وياه ولا سامح الله اي شي يصير وي الجهال اكون اني مسؤوله مثل ما صار بوكعه دمعه.
أهلي وصاروا بالف سوال وجواب
الغريب اشلون لذلك اكتفيت بالرفض

بقى يتودد الي ولـ عمتي
يسولف ويضحك
بين قوسين يدك ناعم حتى ننسى سالفة

طبعا ما سولفت لعمتي وما احس الا غمتني
_ قشمرج يا العوبه بس دواء يمي الا اخلي يمشي ويحجي وي روحه..

سكتت ما حجيت وفعلا صارت تبسمر بي
ومن اجت ام نوال يمنا لان بتها اكثر اوقات يمنا لان آمر يمنا يروح بس بالليل الها
كعدت عمتي تسولف الها عن خطوبة ورفض آمر وزادت شوية ابهارات على سالفة

وجهت ام نوال كلامها لـ آمر..
_ ليش واكف بقسمتها وحرام عليك وصاحبت أيتام لا تشيل خطيتها

_ حجيه السالفه عائليه ما أحب احد يدخل بيها

تفشلت المره خطيه وسكتت ونوال شرار يطلع من اعيونها..

مر يومين على هل نقاش وانسد من قبل آمر
وصار على زواج آمر 8 ايام

بيومها العصر كاعدين واندك الباب
جانو الولد يمنا بس آمر طالع بشغل
ما نشوف الا زلم معكله تارسه الاستقبال
من عمام ابوهم واقاربهم الكل لحد ما نملئ الاستقبال بناس اكبار وسادة وشيوخ
استقبلوهم الولد علما اتصلوا على آمر حتى يجي