The Legend Of The Phoenix:The Limit

အခန်း(၄၂)

'ဖီးနစ်ငှက်ရဲ့ရာဇဝင်'

အခန်း(၄၂)

"တွေ့ရတာဝမ်းသာပါတယ် ဒေါ်နှင်းဆီဆူး"

လုလင် လက်ဆွဲနှုတ်ဆက်ပြီးအရွယ်တင်လှပနုပျိုနေသည့် အမျိုးသမီးကိုအကဲခတ်နေသည်။ လင်းတကြွေမည်ဆိုလည်း ကြွေလောက်စရာပါ။ နှင်းဆီဆူးက စားပွဲပေါ်တင်ထားသည့်ကတ္တီပါဘူးထဲမှ မောင်းကွင်းလက်စွပ်တွေကို တစ်ကွင်းချင်း စွပ်နေရင်း လုလင်ကိုမေးဆတ်၏။

"ကျွန်မကိုတွေ့ချင်တာဘာကိစ္စလဲ..ရှင် ကျွန်မကိုသိလို့လား..."

"ဆိုပါတော့.. ခင်ဗျားရဲ့လိပ်စာကိုခင်ဗျားရဲ့ကိုယ်ရံတော်နာဂဆီကစုံစမ်းလာခဲ့တာပါ.."

"နာဂကိုဖမ်းသွားတဲ့ ဒုရဲအုပ်ဆိုတာရှင်လား.."

နှင်းဆီဆူးက အံ့သြဟန်တစ်ချက်ဖြင့် မေး၏။

"ဟုတ်ပါတယ်.. အခုခင်ဗျားဆီလာတာ တောင်ညိုမှာအသတ်ခံရတဲ့ လင်းတအကြောင်းနည်းနည်းမေးချင်လို့ပါ..ကျွန်တော်ဦးသီဟစက်ဆီရောက်ခဲ့ပြီးပါပြီ..ကျွန်တော်မေးသမျှ ဘာမှမဖြေဘူး.."

သီဟစက်ဆိုသည့်နာမည်ကြားသည်နှင့် နှင်းဆီဆူးနှုတ်ခမ်းမဲ့သွား၏။

"သီဟစက်ကိုသွားမေးတာ အိပ်ချင်ယောင်ဆောင်နေတဲ့သူကိုသွားနှိုးသလိုပဲဖြစ်မှာပေါ့.."

လုလင်က ဆက်တီလက်ရန်းပေါ်လက်တင်လိုက်ရင်း

"လင်းတအသတ်ခံရတဲ့ကိစ္စက ဦးသီဟစက်နဲ့သက်ဆိုင်မှုရှိတယ်လို့ခင်ဗျားထင်လား.."

လုလင်မေးခွန်းကြောင့် နှင်းဆီဆူးက ခြောက်ကပ်ကပ်ရယ်သည်။

"သူသတ်တာပဲလေ..သူကလွဲပြီးဘယ်သူရှိရဦးမလဲ..ဘာကြောင့်သတ်သလဲတော့ငါမသိဘူး၊ ငါသိတာကတော့ သူသတ်ခဲ့တာလင်းတတစ်ယောက်တည်းမဟုတ်ဘူးဆိုတာပဲ.."

ရှင်တွေကျွန်မတွေမဟုတ်တော့ဘဲ ငါဟုပြော၍ နှင်းဆီဆူး နာကြည်းရိပ်တို့နှင့်အံကြိတ်နေသည်။

"ဦးသီဟစက်က ကြိုးကိုင်နေတဲ့သူပါဒေါ်နှင်းဆီဆူး၊ လင်းတကိုသတ်တာလင်းယုန်ဆိုတဲ့တစ်ယောက်ပဲလို့ကျွန်တော်အတိအကျခန့်မှန်းထားတယ်..ခင်ဗျားလင်းယုန်ကိုရော သိသလား.."