සන්තානේ - දෙහදක් 2
කතු අවසරයකින් තොරව උපුටා ගැනීම සපුරා තහනම්‼️
💜️62 කොටස💜️
ස්ටූඩියෝ එකේ පරිඝණකය ඉදිරියෙන් වාඩි වෙලා ඉන්න සාරංගගේ ගෙල වටා දෑත් යවන් අහිංසා බලන් ඉන්නේ පරිඝණක තිරය දිහා.ශාදිගේ ෆොටෝ ශූට් එකේ ඡායාරූප කිහිපයක් ඔහු ඔහුගේ සහ අහිංසාගේ මුහුණු පොතේ පිටු වලට දැම්මේ මීට පැයකට විතර කළින්.නමුත් මේ වෙද්දි ඒ ඡායාරූප පෙළට ප්රතිචාර ගලාගෙන එන්නේ අහිංසාවත් පුදුම කරමින්.
"මං පේජ් එකේ දැම්ම ෆොටෝ එකකට මෙච්චර ලයික් ගොඩක් වැටුනමයි..."
අහිංසා කිව්වේ ශාදිගේ සොඳුරු ඡායාරූපයක් දිහා බලාගෙන.
"බැක්ග්රවුන්ඩ් එකට මොඩල්ව ගාණට මැච් උනා...ඒකයි උනේ...අනික ශාදිගේ ෆේශල් එක්ස්ප්රෙශන් හරිම තාත්ත්විකයි"
සාරංග කිව්වේ ශාදිව මඳකට වර්ණනා කරමින්.ආගන්තුක උනත් ඇය ඡායාරූප වලට මුහුණ දුන්නු විදිය ඇත්තටම ඇගේ ගමන් මඟ ගැන පැහැදිලි ඉඟියක් දීලයි තිබුනේ.තොල් පෙරලමින් එයට අහිංසා දුන්නු ප්රතිචාරය සාරංග නොදැක්කත් ඇය හුස්ම ගන්න විදියෙන්ම ඔහුට තේරුනා අහිංසාට ඊරිසියාවක් දැනුනා කියලා.ඔහු හිනා උනේ හිතෙන්.ඊළඟ තප්පරේ අහිංසා සාරංග වාඩි වී සිටි පුටුව කරකවා ඔහුව තමන්ගේ පැත්තට හරවගෙන එහි පුටු ඇන්ඳට දෑත් තබා බලන් උන්නේ ඔහුගේ දෑස් දිහා.ඔහු ඇහැක් සිහින් කළේ 'මොකද?' කියලා අහන්න වගේ.
"එච්චර ලයික් කමෙන්ට් වැටෙන්නේ බියුටීශියන්ට ෆොටෝග්රැෆර් මැච් උනු නිසා වෙන්න බැරිද?"
අහිංසා අහන්නේ දෙතොල් උල් කර කර.සාරංග අහිංසාගේ වත දෙස දෑස් ගෙනිච්චේ අහිංසාගෙ හිත මඳකට චංචල වෙද්දි.ඇයව නොමරා මරන්නේ සාරංගගේ ඒ බැල්ම.මහා ආදරයක් එක්ක නුරාවත් දඟකාරකමත් ඒ බැල්මේ මහ ගොඩක් කැටි වෙලා තිබුනා.ඉතින් කටකාරයගෙන් ඇහුවේ වැරදි ප්රශ්ණයක් බව තේරුම් ගත්ත අහිංසා ඔහුගේ ආසනය නැවත හරවන්න හදද්දිම සාරංග ඇගේ බඳ වටා දෑත් යවා ඇයව ඇදලා අරන් ඔඩොක්කුවෙන් ඉන්ඳවගත්තේ අහිංසා හයියෙන් හිනා වෙද්දි.
