شذرة الشاهين

مشهد من الماضي

حياكم الله 🩵

كل واحد بينا عنده قصه بهالحياة

مرات الانسان يختار قصته بنفسه

و مرات القدر يرسم ملامح قصتنا

وهنا نكون مجبورين نعيش داخل هاي اللوحة اللي رسمها القدر النا ..

بس يجي يوم ونعيش صراع بداخلنا و تساؤلات

الى متى راح نظل نعيش بلوحة راسمها القدر ؟

و لشوكت راح نگدر نتحمل و نصبر ؟

يجي يوم ونرمي الالوان بطريقة فوضوية ع هاي اللوحة

حتى نرسم لوحة مليانه الوان و فرح ونعيش قدرنا إللي أخترناه بنفسنا و ما مجبرين عليه
.
چنت بعمر ٨ سنوات راجعة من المدرسة

امشي ع الرصيف مثل ما بابا علمني

و اباوع ع ورقة امتحان الاملاء

أخذت عشرة من عشرة و المعلمة كاتبة ( احسنتِ يا وردة الصف)
طايرة من الفرحة بس اريد اوصل البيت

حتى بابا يشوف ورقة الاملاء مالتي

واتخيل شنو راح يگول هالمرة

( عفية بنور عيوني) لو ( حبيبة ابوها وشذرته)

وصلت لفرعنا و اسمع صياح و الناس ملمومين يم بيتنا

ركضت اريد اعرف شصاير

وصلت وادفع برجلين الناس

اريد افوت للبيت بالگوة طبيت

و اشوف ٣ صناديق خشب

اثنين كبار و واحد اصغر منهم

والناس كلها تبچي و تصيح

واني ما مفتهمه شي جرتني بيبي و گعدتني بحضنها وگالت ...

بيبي : ولج يمه شذره سودا عليه يمممممه

وادگ ع وجهها و اني صافنه هاي شبيها بيبي ليش هيج تسوي سألتها

شذر: بيبي وين بابا ؟

و النسوان صارت تصيح يبوووو

ويبچون چان مرت عمي گالت

:: هذا ابوج نايم هنا

اشرت ع واحد من الصناديگ

بيبي كامت تحجي عليها بس ما اسمع شي

بالي صار كله يم بابا

حطيت ورقة الاملاء ع الصندوگ و شاورته بهمس

شذر: بابا تسمعني ؟ اخذت عشرة وهاي بيبي مدري شبيها بس تبجي اني خايفه بابا يلا گوم حتى يروحون كلهم لان اني جوعانه و نعسانه يلا حباب بسرعه مو تتأخر ..

وبابا تأخر عليه هواي

ومشت السنين بيه

وعرفت وفاتهم چانت بسبب انفجار بالسوگ  ..
واني كل يوم شكل الصناديگ الثلاثة (بابا و ماما و طه اخوية حبيبي) ما راح من ذاكرتي
...