شذرة الشاهين

الشذرة السابعة 🩵

حياكم الله 🩵🩵

حينَ النَظر أليها أجد عمري الذي مضى هباءً ،
وأحلامي الغَريبه ونَفسي الضائِعه ، كإنها مَلجأ لي ..
. . . .

كُل تَفاصيلهُ قابله للحُب ، هدوئهُ الذي يشبه هدوء شيخ
، صوتهُ ، ، أبتسامتهُ وتلك الحفرة على خديه، ويداهُ حينَ ترتجفان
وأخيراً ...

منين انت من يا غصن جاي؟
اهلك بيا بستان؟
نوع من الورد ..كائن جديد انت؟
شكو بروحك ندى و يتبعك الفراش !!!
لا يمنه خضار و لا وگع وكته !!

للكبيرالشاعر ( رائد ابو فتيان)

شذر:( باجر عقد المحكمة وخالة ام شاهين تواصلت ويايه بخصوص انه لازم اشتري ملابس تليق بالعقد وشرحتلها عدم معرفتي بهذه التفاصيل و گالت اطلعي للسوگ ويه أيه حتى تساعدني بالاختيار وخلي فهد يوصلكم .. الام بهيج مواقف شكد مكانها خالي تفتقدها بكل لحظة .. افكر لو چانت موجودة متخليني محتارة وما اعرف شسوي .. اتذكرها چانت كلش انيقة و جميلة جداً رغم شدة حرصها ويايه لكن مليانه حنية . . ماكو شخص بالدنيا يحبنا مثل امهاتنا .. يمدون ابناءهم بحب فطري من دون انتظار مقابل)

شعور غريب انه ارتبط بإنسان ما عندي فكرة عن شخصيته و تفاصيله الأخرى... هواي تساؤلات ببالي بس اللي متأكده منه انه اني مرتاحة لوجوده بحياتي صارلي سند حقيقي رغم هو يعرف ما عندي اي شي اقدمه اله بالمقابل بس ما اريد ارسم ببالي أمل كبير بقصتي وياه لان ممكن يصيبني الخذلان

كل اللي اريده هو ان اكمل وياه الطريق مهما كانت العواقب لان الشخص مهما كان قدره صعب لازم يحاول يغيره حتى لو ما حقق التغيير يكون فاز بشرف المحاولة

شاهين ظهر بحياتي بصورة أمل حقيقي انتشلني من اسوء شعور مرّ عليه بحياتي وهو شعور الضياع والتشتت

ظهر بحياتي بوقت كانت سفينة حياتي بلا مرساة تترنح على امواج بحر بلا ميناء و ضعفي وقلة حيلتي همه ربان السفينة.. بالوقت اللي جنت بي بلا إشارات او اتجاهات ظهر شاهين من العدم ورسملي بوصلة تحدد طريقي

كملنا مشترياتنا وجهزنا كل الامور حتى يشوفني بأجمل صورة باجر نزولاً لرغبات خالة ام شاهين بس ما أنكر لذتي بإصطياد قلبه و الفوز بنظراته المتلهفة

اية: امي مثبورة خطيه من الخطار و سمرة ويوسف صايرين دم متعاركين ومتريد ابويه يدري خاف تكبر السالفة

شذر: اسم الله الرحمن شبيهم سمرة و يوسف اول تالي يتعاركون؟

اية: سوء فهم وصار هسه قبل شوية اتصلت بليث وفهمني .. يمعوده هاي سمرة متعرف تتصرف زعطوطة مو قصدي لا تاخذين على نفسج صح انتي اكبر منها بسنة بس انتي تختلفين عنها هيه عقلها زغير انتي واعية اكثر مدري الدنيا كبرتچ

شذر : اني الدنيا عجنتني عجن الله وكيلچ ههههه
يلا ان شاء الله شغلة بسيطة وتروح لحالها