شذرة الشاهين

البارت ٣٤

حياكم الله 🩵
الكاتبة // ميــس آل صـلاح

...
حلو مثل الخميس ابين الأيام
و ترف مثل المطر لو باوس الجام
حساس ودمعتك تترس العين
من ليغاد أشوف بگلبك شضام
هلا يا فرحة الما نام مرتاح
بوكت ما بيه وفه حسيتك ايمام

...

ضجت هذني شبيهن ميستحن ؟؟!
علقت ( شگد شايف روحك عابت )

وره دقيقه دزلي مسج عالخاص فتحتها كاتب امسحي التعليق بسرعه اخوتج كلهم متابعين حسابي اذا يوسف شاف تعليقج ما الحگ عليچ...

شهگت : صخاااام شلون نسيت!!!

رحت گبل بدون تفكير مسحت التعليق بس سمعت بإسم يوسف.. بعدين صفنت هاي شبيه اني ! كتبتله 💬: تره انت تگدر تسمح التعليق و تفضها؟

قسور💬: خليتچ تمسحين التعليق بأيدج مثل الحبابة وانتي الممنونة !

إتصلت عليه من كمية الاستفزاز مالته سمعت صوت عريان السيد خلف من بعيد يقرأ ابيات قصيدته بحنية

(( و يلوموني ..
واحسك تكبر بروحي و يلوموني...
وآنه بلا شوفتك شينفعاً عيوني...))

ما إجاني صوته وكأنما چان ديغيير مكانه لان صوت القصيدة إبتعد كلش .. سألته بدون مقدمات !

سمر : وأنت منين عرفت اني منو؟

قسور : أعرف حسابچ

سمر: بس أني لو كل بنات عمنا ؟

قسور: لا كلهم

سمر : ها عبالي بس اني !

قسور : اي مو أنتي ...

سمر: اني شنو ؟ كملها انتي قحط قصدك مووو!

قسور : انتي خلقچ و كسر القالب !

سمر : يا ادبسزز !

قسور : هههههههاي

سمر : ضحكتك مستفزة ...

قسور : سمرره... !

سمر: باااي !

سديت الموبايل وشمرته على ميز التيپل لامپ ..
وصفنت على السگف ..

عضيت شفتي الجوة تذكرت صوته من ضحك.. چانت ضحكته حلوة كلش مو مستفزه مثل ما گتله بس ما أدري ليش أحنا البنات نحچي عكس ما نقصد و نريد المقابل يفهم القصد اللي بداخلنا مو اللي نطقنا بيه ..

ابتسمت و غطيت وجهي بالغطا أخفي ابتسامتي..

...

گعدت الصبح و صدت عيني على ايه اليوم عرسها يعني راح افارگها و يظل مكانها خالي ...شلون راح أگدر اصبر على فراگها ...

ليش البنية من تتزوج تترك هذا الفراغ الچبير ببيت أهلها... عبالك ياخذون گلبك من مكانه و يگلولك عيش بدونه !