شذرة الشاهين

البارت ٤٣

حياكم الله 🩵
الكاتبة // ميــس آل صـلاح
ملاحظة مهمه (اكو بارت إضافي بعد هذا البارت روحو اقروااا ضروري لان يجنن )
...
منك ما شبع گلبي ... و لا مال
عدل وياك ميزاني ... ولا مال
ذهب ما اريد بالدنيا ... ولا مال
اريد وياك بس نگعد سويه

...

شذر

مرت شهرين بخلالها تغييرت
هواي امور قسور  انفصل عن نجلاء
و صديق شاهين اللي طلبها للزواج
كمل معامله العقد بالمحكمة
وراحت لبيته وظلت بس العجوز وعلاوي بالبيت
ويه قسور

صديق شاهين يمدح بيها وباخلاقها
وكلش مرتاح وياها خصوصا بنته
حبت نجلاء وتعلقت بيها و يگول
تعرف شلون تتعامل وياها
لان يتيمه مثلها صارت تعاملها مثل بنتها
وعلاوي ظل بين امه وبين قسور

مرات قسور يأخذه لأمه
ومرات زوجها يأخذه إلها
والحمد لله رهمت الامور بيناتهم بالحسنى

وصار يوم مشية قسور على سمره
وكل أحنا مخبوصين وفرحانين بيهم
اباوع عليها طالعه تجنن لابسه فستان ابيض
والشيخ يعقدلهم و آني أصور
بقسور من فتحة الباب

من گالت نعم وانت وكيلي
غرغرت عيونه وأبتسم
لازم اوثق هاي اللحظات الحلوة
وعلت الهلاهل بالبيت والصفگات و الهوسات

...
سمر

من أحلى واصعب اللحظات
اللي تمر بحياتنا هيه لحظات العقد
تحس بشعور الانسلاخ  بينك وبين العائله
اللي ربيت بنصهم و شعور الاندماج وسط
عائله جديده راح ترسم ملامحها
بايدك و تشارك بتكوينها حجر على حجر

بين فرحة و بين حزن مشاعر مختلطه
متعرف شلون تعبر عنها غير بالدموع
امي وخواتي اللي من ضمنهم شذره
دموعهم چانت وسيلتهم للتعبير عن الفرح
وعن الحزن لابتعادي الموعود عنهم

واني اللي راح أطلع من حضن والدي
لحضن رجل راح يشاركني كل حياتي المستقبليه
مشاعر جديده و حب جديد دافي و حنون

گاعده بالكوشه بفساتي الابيض
ودخل هو لابس
زي عربي كامل باللون الأبيض
دخل والابتسامه والفرحة ما سايعه صدره
وكل النسوان التمت عليه
هاي اللي تباركله والذيچ اللي تهلهل

هو صاح : عمي الله بالخير عليكم
اريد مرتي اخذها وأروح انطونه طريق

الحجية : ولك اثگل حتى مدگول ذابح روحه عليه
وتشيل خشمها عليك

قسور : طيرتي يلوگلها حجية

الحجية : وين صگر عنك !

كلنا ضحكنا على سوالف الحجية
اللي تتذكر صگر بكل مناسبه
وما ناسيته ابدا...