شذرة الشاهين

الشذرة الثامنة 🩵

حياكم الله 🩵

ثاري الگلب مبيوگ بوگــه
والطابله مشلع عروگــه
يا شدة الينكسر سوگــه
من تخلي زايد حمل فوگــه
چا غير كون يتوب ويچــن
مصخم يالأبهر دومـك تحـــن

للشاعر المبدع ( علي مالك الموسوي)
..
...

قبل خروج شاهين من التوقيف بعد عقد المحكمة

سمر
( شبح الخوف سيطر عليه وما اعرف شنو راح يكون مصيري .. غلطت غلطة لا تغتفر ما اعتقد يوسف راح يكدر يسامحني بيوم من الايام ... الغلط هو خيانتي لثقة أهلي بيه صح اني ما متجاوزة حدود الاخلاق ضمن هاي العلاقة لكن اسمها علاقة غير محددة المعاني و بوقت غير مناسب .. گدامي مستقبل طويل لكن استعجالي بدخول علاقة حالياً وبهذا العمر هو الخطأ بعينه ...

شنو ممكن يكون تصرف يوسف ... حضرت بعقلي هواي سيناريوهات مثلاً يحچي لإخوتي او ابوية اووووف اذا عرف بابا شراح يسوي بيه.. يذبحني والله يذبحني ويحسبني ما إجيت على الدنيا... بابا بالنسبة اله كلشي ولا السمعة واني خنت الثقة و ما صنت الأمانة...

بوقتها سيف فكر بكلشي وفهمني ان اكتب اسمه بأسم اخته حتى اذا انكشف الامر اگول لاهلي ما اعرف هذا رقمه وعبالي رقم اخته لان دائماً تتواصل ويايه من خلاله وانه دائماً أمسح المحادثات وما أخلي اي أثر ...

بس يبقى السؤال هو هل راح يقتنعون بهذا الكلام بوقتها ما فكرت بهذا الشيء كل اللي چان مهم عندي انه اني دا أعيش قصة حب و مسحورة بالكلام الناعم والغزل وما فكرت باللي دا اسوي أكبر غلط .. غلط ممكن يدمر مستقبلي ويدمر أهلي

ظليت أفكر هواااي شنو ممكن يصير وشنو راح يسوي سيف حتى يبعد الشبهة عني .. سمعته من حچى هو و يوسف جان يگوله ( سمر ما سوت شي) هل راح يدافع عني و يخلصني من مصيبتي ..؟ لو راح يتخلى عني ويتركني ؟

دخلت اية لغرفتي و شافتني عيوني منفخات من البچي حضنتني ولامتني لان ما چانت تعرف بالموضوع وليش ما سولفتلها على كل القصة من البداية وشلون اتصرف هيج تصرف من كيفي

سمر: صدگيني عبالي رقمها لمريم شمدريني يطلع أخوها والله فد گملتي بيضة لان بس گتلها افتحيلي كاميرا ادري بيج تسوين مقلب بيه من فتح الكاميرا دخل يوسف

أية: سمرررة هذا الحچي تحچي ليوسف مو الي گملتچ بيضة گلتيلي موو .... ولج انت شصخم وجهج وتاخذين رقمه منو دخل بعقلچ هاي السوالف ولج اني بگدچ حاطة وجهي بالكتاب اربعه وعشرين ساعه ... شلون تكسرين ثقة أهلي بشنو مقصرين وياج؟؟ ما وگفت كدامچ عيون بابا وثقته بيج ؟

سمر: انتي منو گلچ؟

اية: چنت ويه ليث من اتصلت امي بليث وحچتله على اللي صار لان ظل بالها على يوسف وخافت تكبر السالفة تريده يتدخل حتى يفض الموضوع