شذرة الشاهين

الشذرة التاسعة 🩵

حياكم الله 🩵

••
‏إنما هو حبٌ واحد وطاهر ، يهبط كما الربيع فيطرق سقف حزنك بحياء، صُدفةٌ دون ميعاد، رسالةٌ منه تعيد لروحك الحياة ، ونظرة من عينيّه تقتلع من صدرك مرارة السنين وحزن أيّامها ، إنما هو حبٌ واحد يأتي لينتشلك من فقر شغفك بالحياة ،ليجعلك تُغني له ♥️

....

إجتني زغيرة ما تعرف شلون تحــب
وگلتلها العيون الفاهيــة تسَلِـــبْ
گالت والحضــن گلتلها للحلفـان
اليـمد أيده عليه ما يـرهم يچـذب

للشاعر الكبير (أيمن الزرگاني)

شذر: حط چف أيده على ايدي وعصرها حيل لحد ما انتفضت شرايين ايده بقوة وضاع كفي بخطوط كفوفه وسرت بجسمي رجفة هزت كياني بدون تفسير.. وخدودي اشتعلت بنار خجل بريء اول مرة أعيش هاي المشاعر .. دفـو ايده يتسابق ويه دفـو عيونه بنظراته الي... وگلبي دخل سباق خيل والكل مراهنة عليه وصار يسابق الزمن حتى يوصل خط النهاية غير واضح المعالم ..

إرتفعت تفاحة آدم ونزلت معلنة عن ارتباكه ولهفته الواضحة ... قطرات العرق على جبينه تظهر صدق مشاعره وحنيته ... ردت اضم روحي بحضنه وانسى العالم كله.. انسى كل الحواجز والعادات والتقاليد واقفز مثل فراشة طايرة بين الورود بحديقة مزروعه حب و مسقية بماء الحنية ...

ابتسم وبانت غمازته الساحرة وسأل بمُكر

شاهين: شنو امنيتچ بهاللحظة؟

شذر: مااا اگول

شاهين: گولي ... حتى أخذج لمدينة الألعاب

شذر( بفرح) : الله مدينة الألعاب!!!

شاهين: بس بعد ما اتجاوبين على سؤالي يلا بسرعه

شذر (جاوبت بمكر بنات حواء) : امممم أتمنى أمرر اصابعي على صدرك و أحس دگاته

أخذ ايدي بعنف جميل وباسه من الباطن وخلاه على صدره حسيت گلبه راح يطلع من ضلوعه وگال گلبي يركض من يوم اللي شافچ تركضين بليلة ظلمة چان تايه ما يعرف المن يدگ ... وينعصر من يشوف عيونچ حزينه ويرفرف من تنرسم ضحكة على شفافيچ

سحبت أيدي برقة من ارتباكي وانحبست بصدري غصة فرح ما مرت على گلبي بيوم من الأيام

تنهد بحسرة وغير الموضوع وسألني شنو اريد اطلب على الغدا وبين ما يجهز الطلب ظل يعلمني على الموبايل و فعل حسابات الي على الفيس و الانستا .. شنو من عالم جبير وحلو بهذا النت توسع بؤبؤ عيني من شفت صوره على الانستا طالع يخبل

شذر: حلوة صورك... أكدر انزل مثلها عندي

شاهين: اذا تريدين تنزلين صور خليها خاصة بس البنات واني فقط خاف ياخذون صورچ او شي لهذا السبب بس اخاف عليچ

شذر: اي عادي مو مشكله هو راح اخلي بس انت و اية وسمرة ما عندي احد

شاهين : من راح تكملين دراستچ راح تتوسع دائرة معارفج لذلك انطيج تحذير حتى تنتبهين لا أكثر