لمرة دي تبكي بي جاي والتانية بتبكي بي هناك أي وحدة جاية تعزي مني بتلقاها مافي مني وين!؟ مشت وين البت دي ...مني في المستشفى ما قدرت تتحمل الصدمة...حيييه يابتي مسكينة امها الوحيدة الكانت بتقيف معاها خلتها تتعلم لمن اتخرجت هسي الح يقيف معاها منو...
ده كان جزء من حديث النسوان الجوا لي بكي منال ام مني ... منال المعروفة بي طيبتها وإنو كل الناس بتعرفها منال الماحصل سمعوا منها كعبة ... الوحيدة الوقفت في صف التقاليد الماليها داعي راجلها طلقها لمن خيرها بين دراسة بتو وبين إنو بتو تتزوج ود عمها منال بي بساطة اختارت سعادة بتها الوحيدة وسط العائلة الكانت واقفة مع بتها درستها وعلمتها واتخرجت مني من جامعة مرموقة من كلية الطب قبل شهر في اخر امتحانات ليها امها ما كانت بتتصل ليها زي زمان استغربت أمي مالة!؟ زمان من ينتهي وقت الامتحان بتضرب لي حصل ليها شي!؟ كانت مافاهمة لي أمها مابتضرب ليها بس مرات مرات خالتها منيرة تتكلم معاها وإنو منال كويسة بس شوية عندها لوز ولمن مني تقول اديني ليها خالتها تحجج بي اي شي واهمها إنها ماقادرة تتكلم... مني ما اقتنعت بالكلام ده وإنو لو صاح ما كان بتتصل لي بعد كل يومين إلا لو حاصل شي مني كانت بتقيم مع خالها هو برضو ما كان راضي بس مابقدر يقول لا لي منال هي اختو الكبيرة وبحترمها شديد يعني بي بساطة مافي زول واقف مع مني غير أمها ....حتي خالها ما وراها مرض امها الحقيقي سافر وهي ماكانت عارفة مشي وين قايلاهو مشي السعوديه زي ما كل مرة يمشي مني انتهت من الإمتحانات وماكانت مرتاحة طول الفترة أمها ماضربت ليها الحصل شنو ماعارفة ...بعد انتهت خالها رجع قالت لي: مشيت وين ...قال ليها: البلد قالت لي بي إستغرب لي في حاجة؟! قال ليها: ارح لمن تمشي ح تعرفي ....مني قلبها دقة في شنو مالهم أهلي هم داسين مني شي وما دايرين يوروني طيب أمي كيف؟ ...
ستفوا شنطهم ورجعوا قريتهم هي مابعيدة وفي الخرطوم بس من الأماكن الطرفية...وصلو زي الساعة ١١ مني من العربية وقفت نزلت وجري دخلت البيت وهمها كلو كان أمها فتشت في الديوان في الاوضتين في العريشة بس مافي!!! أمي وين يا ناس!!! مشت وين....خالها دخل جاتو جارية وبي لهفة وخوف خالي امي وين.... اخد نفس وقال ليها: أمك في المستشفى يا مني جاتها مبادئ جلطة بس اتحسنت ولمن وقعت قالت إنو مانوريك عشان إنتِ ممتحنة....مني بقت تبكي قالت ليهو: طيب هسي هي كيف وحالتها كيف وديني ليها هسي دي ماشة ليها هسسي...قال ليها: اهدي أصلاً كنت دايرة اوديك بس قلت اجيبك هنا عشان ماتتخلعي...مني جرت ركبت في العربية وهي اساساً حقو بوكسي... وصلوا المستشفي الكانت في المدينة تبعد من قريتهم حوالي نص ساعة .... نزلوا وركبوا الطابع التاني من وصلوا لقت عماتها وحدة منهم اسمها نفسية قالت : شوفوا بالله آخر الجري وراء الجامعات همها الجامعة ولافكرت في امها المرمية هنا ليها أسبوع.... التانية واسمها احسان قالت ليها: كلامك بالحييبل صح يا نفيسية التعليم غير بضر المرة مابعمل ليها شي تاني...مني اتجاهلت كلامهم ودخلت الغرفة الفيها أمها ما كان بدخلوا إلا نفر واحد من دخلت ختت يدها في خشمها وبقت تبكي منظر امها وهي راقدة في السرير وماقادرة تتحرك ده وجع قلبها ...قعدت جنبها وبقت تبكي بي حرقة فجأة الأجهزة صفرت والدكاترة بقوا يدخلوا طلعوها براء وهي بتسأل فيهم مالكم الحاصل شنو أمي مالة بس مافي زول جاوب انتظروا زي ربع ساعة طلعت الممرضة وظاهر من ملامحها إنو في شي ما كويس مني جاتها وملهوفة سألتها أمي بقت كيف الممرضة نزلت راسها وقالت: إنا لله وإنا إليه راجعون مني الصدمة خلتها تقع من حيلها ...
