°مني متين جيتي
عاينت ليها لقيتها سارة اخت سليمان كانت معاها صحبتها وطوالي لفيت وشي منها دايرة امشي قالت لي: استني قاعد أسألك متين جيتي هنا عشان أنا من قبيل قاعدة وسمعت قالوا ماشة تشوفي قبر خالتو مناسك...قلت ليها: أنا مافاهمة قصدك يا سارة بس اعرفي من هسي انا ما عايزة سليمان تمام....قالت لي: عشان مشيتي تميتي تعليمك دايرة تعملي فيها خلاص يا المافي زول بحصلك دايرك تختي الكلام ده حلق في اضانك أنتِ لي اخوي فاهمة وما لي زول تاني....ما رديت عليها مشيت طوالي كنت مهمومة كيف اتخلص من سليمان ده وسارة ما عارفاها لي قالت لي كدا رغم أنا من قبيل قاعدة هنا وهي يادوب جات ومنو الوراها أصلاً إني ماشة لي قبر امي ...ما اهتميت بي كلامها من الهموم الفيني
من الهم العلي مشيت قعت جنب البحر وأنا سرحانة في همومي أكتر من ساعة أنا قاعدة كدا بعديها قمت ورجعت بي نفس الطريق دخلت لفة بيتنا كداأبوي وخالتي واقفين جنب باب الشارع وقبل ما احصلهم ابوي جاء مندفع وضربني كف وقالي آخر الزمن تصيعي مشيتي وين يا بت مش إنتِ قلتي ماشة تشوفي قبر أمك مشينا ليك لقيناك مافي قولي يلا مشيتي وين كنت ببكي ما رديت عليهو دخلت طوالي لي اوضتي وبقيت ابكي خالتي جاتني وقالت لي: النصيحة يا بتي إنتِ غلطي ما كان في داعي تكذبي قلت ليها: هو لي بتعامل معاي كدا مش انا بتو طيب لي بحب بنات وداد وبكرهني أنا كنت بقول كدا وأنا بشهق من البكي قالت لي: أبوك بحبك يابتي بس إنتِ عارفه إنو عيب الزول يبوح بي مشاعرو سواء كان راجلك ولا أبوك ولا أخوك بحسوا إنو اظهار الحب بنقص الرجولة ...قلت ليها: شفتي عشان التفكير العقيم ده ما دايرة اتزوج من اولاد أهلنا قالت لي: اسكتي يا بت ما يسمعك ابوك خاف المرة دي يقتلك بدون ما يتردد...وتاني شي يا بتي أبوك من قبيل خايف عليك ومقلق يدخل ويمرق وما في شافع في الحلة ما رسلو عشان يفتشك بس إنتِ الصراحة يا بتي زوتيها شويتين في داعي تتأخري .... سكت منها وماردت ليها بس دموعي ابت تقيف قالت لي امسحي دموعك ويلا ارح الغداء قلت ليها: ما جعانة يا خالتي قالت لي: ماشايفة نفسك بقيتي كيف ضعفتي شديد بي سبب عدم الأكل ده يلا قومي وزاتو مرت أبوك واخواتك جاين يتغدوا معانا يلا قومي ساعديني شوية...قلت ليها: طيب قمت وبقيت اساعدها قطعت ليها السلطة وعملت العصير مسافة ناس خالتو وداد يجوا نحنا جهزنا اي شي أبوي كان في الديوان اتغدا وقال مافي زول يصحيني داير انوم ... طبعاً اخواتي من ابوي كلهم معرسين وبي أولادهم إلا ترتيل بس مخطوبة يعني نحنا يخطبوك من صغيرة إلا أنا عشان أمي قالت خلوها تكبر ما دايرة من هسي تشتغل بي أمر ده خطبي وده راجلي وخطوبتنا بس ينضموا فيك وخلاص ....المهم هم وصلوا قعدنا كلنا وبقينا نتغدا إلا تسابيح وهي أختي الكبيرة كانت سرحانة أمها قالت ليها: اكلي يا بت الزعل ما بفيدك خالتي قالت ليها: مالة توتة من قبيل حاسة بيها ما على بعضها...خالتو وداد قالت ليها: والله اتشاكلت هي ومدثر وهسي هو حلف داير يطلقها ويعرس فوقها ....كانوا بتناقشوا عن مدثر وأنا خشمي ما فتحتو ....ما عشان عاجبني الكلام لا بس ما بحب اتكلم في الناس وأكل لحمهم واظن دي تعتبر نميمة وأنا بكرها بعد شبعت قمت طوالي ودخلت جوا كنت زهجانة في قريتنا دي ما عندنا شبكة ولا حتي كهرباء وأنا اتعودة على التلفون بس صحباتي في الجامعة بتصلوا على وكدا
