أنا السبب
الكلمة دي كل مرة بتجي في زهني رغم إنو ده مكتوب لينا وربنا كاتبو .... أنا السبب الخلا أسعد في العناية المركزة ما كنت قادرة أعمل شي غير البكاء أمونة كم مرة قالت لي: ماتبكي أدعي ليهو بس... البكاء مابفيد هو هسي محتاج الدعاء ...
لينا أسبوع أنا خرجوني عشان اصابتي أصلاً ما عميقة كانت تفيفة شديد...أما أسعد فكانت في مكان خطر ولي الآن ما فاق من الغيبوبة💔 الدكتور قال لينا حالتو حتى الآن ما متستقرة ونحنا لازم نترغب اي شئ ... امونة قالت لي: أحسن ليك ترجعي البيت إنتِ من ما خرجوك قاعدة هنا .. الدكتور قال ليك اخدي راحتك ما تتعبي نفسك..قلت ليها: كيف اخد راحتى وأسعد هناك أنا ما بمشي من هنا إلا لمن يفوق قالت لي: بطلي البتعمل فيهو ده يا منى ده كلو ما بفيد شي ووجودك هنا ما بغير شي ...ده ربنا الكاتبو لي أخوي عندك اعتراض لي الكتبو ربنا ...قلت ليها: لالا مستحيل بس انا ما بهدي لي بال إلا لمن أشوفو...واراقبو قالت لي: منى!!!! قلت ليها: أمونة الله يرضي عليك.. أنا الخليت أسعد يمشي لي سليمان وبالتالي سليمان طعنو بالسكين
_شنو طعنو بي سببك
...خالتو أسماء جات ووقفت قدامي ضربتني كف وقالت لي: ده كلو بي سببك يعني ولدي في العناية هنا بي سببك ياخ ما بترتاحي إلا تشوفي ميت قدامك ماعندك ضمير إنتِ ...لي بتعملي كدا معاهو..ده جزاهو عشان ساعدك...عشان أنقذ وحدة اهلها جدعوها..هو زاتو مالو في المصائب لا بعرفك لا شي كان عادي يطلقك ويجدعك بس ولدي قلبو حنين بفكر الف مرة قبل مايعمل أي خطوة...وهسي هو في المستشفى وده كلو من عمايلك الوسخة...
زي ماخليتي يطلق تسنيم .... تسنيم يا يمة البت الرزينة ست البنات الحابت ليهو الولد ما وحدة عاقرة زيك.... وحلوة كمان إنتِ حصل شفتي نفسك في المراية!؟؟ وريني ما خجلتي من شكلك ده وبعد ده كلو قال سمراء قال
=يا أمي!!!
أسكتي إنتِ كمان لسه الدور جايك ...تجي تقولي لي اتشاكل مع واحد وطعنو بالسكين وما توريني التفاصيل الجوة ...لي !؟ عشان تدافعي لي واحدة دايرة تقتل أخوك؟! ...بجد خيبتي ظني فيك
كلام خالتو اسماء كان زي السم البكبهوا في الجرح...حسيت مع كل كلمة قالتها قلبي بتقطع حته حته... أنا سببت لي أسعد ماشكل كتيرة...والله أنا ما نفسي أعمل فيهو كدا ولا بحب أشوفو متعذب...هو من اتزوجني ما شاف الراحة أنا لازم أعمل الخطوة الجاية دي عشانو هو وبس.... والله نفسي اعملها بس خلاص بكفي لي متين يتحمل مشاكل ما ليهو دخل فيها ح اوجه مشاكلي براي وح أعمل الخطوة دي عشانو عشانو بس💔
"وغلطتي كانت دوماً أنني لا انسى .. اتذكر جميع التفاصيل واتذكر تلك الكلمات والنظرات حتى اني اتذكر شعوري حينها.".!🖤🥀
*
بعد القرار الاتخذتو ده قعدت جنب الشباك بتأمل في السماء الكانت صافية شديد...اخخخ يارب حياتي إن شاء الله تكون صافية من المشاكل والخطوة الاعملها دي ما تكسرني أنا واثقة فيك يارب إنو أسعد ح يبقي كويس واثقة إنو الايام السمحة ح تجي وإنو مهما اتألمت ح تفرج أنا واثقة إنو البحصل لي ده كلو لي خير زي ما أسعد قاعد يقول لي دائماً
