أنا مجرد ما اتخيلت إني ح اخسر ولدي ما قدرت امسك اعصابي وخصوصاً لمن تعبت
كل مرة اقول لي سيد العربية أسرع وهي بتقول لي اسعد أنا ما قادر وأنا ح اموت كنت ماعارف أعمل شنو ومنظرها خلاني افقد عقلي وصلت المستشفى بي سرعة هي جسمها كان بارد وماقادرة تمشي شلتها طوالي ...دخلت قلت ليهم سرعة حالة خاصة هم اتفهموني وخطتيها في النقالة دخلوا بيها جوا وأنا من كترة التوتر ماشي وجاي لمن الدكتور طلع قلت لي في شنو يا دكتور حصل شنو...مرق السماعة وقالي: أنت عارفها حامل البخليك تاكلها عنب شنو...قلت لي: قصدك شنو والعنب مالو قالي: العنب خطر علي الحوامل في فواكة خطرة عليهم وأنت المفروض تعرف بي ده وهسي هي كانت دايرة تخسر ولدها بس الله ستر عل العموم خليها ترتاح حبه لحدي ما كل الفي الخطر يوم منها ح اكتب ليك حبة ادوية تديها ليها وكمان بكتب ليك الفواكة البتنفع مع الحوامل ولو شفت غيرهم إياك تديها ليها ...قلت لي طيب تمام بعد مسافة اداني الروشتة شلتها ومشيت اشتريت الادوية....واشتريت من الفواكه الكتبها لي ....بعديها دخلت عليها كانت تعبانة شديد عاينت لي بي تعب وقالت لي: اسعد قلت ليها: قولي اي شي دايرة شنو عشان اعملو ليك....قالت لي: أنا مهملة صاح كنت دايرة اخسر ولدي دايرة اخسر ولدنا مهملة شديد ....قلت ليها : إنتِ ما مهملة يا تسنيم وما تقولي كدا...هزت راسها وقالت لي: لا مهملة أنا ختيت البرتقال عشان قالوا مفيد للحوامل ما عارف كيف مني جابت لينا العنب ومرقتو من التلاجة لي ...قلت ليها: ماتقولي كدا يا تسنيم إنتِ ما مهملة ومني مابتكون عارفة إنو العنب كعب ...قالت لي: كيف ما بتكون عارف مش قارية طب ...المهم يعني أنا خايفة اخسر ولدي....وبقت تبكي مسحت دموعها وقلت ليها ما تخافي إن شاءالله ما بنفقد ولدنا.... مسكت يدي وقالت إن شاءالله إن شاء الله ....
كلامها كان بدندن في راسي وإنو مني كان عارفة دايرة تقتل ولدي ماعارفة كيف فكرت كدا بس الحالة الكنت فيها ما خلتني أفكر إلا كدا
قعدنا في المستشفى لحدي ما الخطر زحة منها ...كانت تعبانة شديد المشي زي الناس ما قادرة لي وده خلاني اضايق شديد من مني....هي لي عملت فيني كدا ده جزاي ليها....وصلنا البيت وكنت ماسكها ...شفتهم كلهم منتظرني دخلت بي تسنيم جوا ....قعتها في الكورسي من شفت مني .. جبتها واديتها كف وسمعتها كلام فارق امي برضو ماقصرت كلام أمي كان قاسي شديد بس انا كنت في حالة تانية خلتني ما افرق بينا الصاح والغلط استغربت من كلام أمي كيف عرفت ومنو الوراها بس زي ماقلت ليكم ماقدرت افرق بين الصاح والغلط
اليوم كلو ما شفتهت وساعة الغداء أمي قالت لي: بتشيل براها ...قلت كان كدا أحسن عشان ماعندي مزاج اشوفها
اليوم التاني طلعت المدرسة كنت في الحصة أمونة ضربت لي طلعت برا ورديت عليها قالت لي: اسعد مني دي وقعت ماعرفناها مالة...قلت ليها : شنو كيف ومتين طيب دقيقة جاياك قالت لي: مافي داعي تجي من آخر بلد عشان تشوفها انا هسي أجرت ركشة وركبتها جنبي ح اوديها المشتشفي ....قلت ليها: طيب لمن توصلي اضربي لي قالت لي طيب وقفلت....بالي كلو كان مع مني حتي الحصة ما قدرت اشرحها للتلاميذ زي الناس لمن في تلميذ قالي: مالك يا أستاذ في زول مات ليك...نهرتو هو خاف وسكت طوالي ...كلمة موت دي خلتي قلقان خفت اخسرها ولا يحصل ليها شي لاسمح الله كلفتة ليهم الحصة وطلعت قبل الزمن ...ضربت لي أمونة كتير بس مشكلتها ما كان بترد وده زيادة خلاني اتوتر....بعد ربع ساعة رجعت لي شاكلتها وقلت ليها مالك ما ضربتي لي مش قلت ليك لمن توصلي ارجعي لي قالت لي: اهدي ما كان في وقت عشان ارد ليك وصلنا كدا دخلتها وهسي هي كويسة مافيها شي حالة هبوط بس....قلت ليها: من الأكل صاح يعني هي ما اكلت امبارح وإنتوا تقولوا لي اكلت هجت فيها شديد قالت لي: هي مرات بتشيل براها شنو العرفنة إنها ما اكلت وانت كمان ما كنت عارف إذا أنت راجلها ماعرفت نحنا نعرف كيف! ...قلت ليها: طيب طيب كدي اديني ليها داير اطمن عليها....قالت لي: اسعد ياخ نحنا هسي ح نرجع وقلت ليك كويسة اجي ...يلا مع سلامة....وقفلت فيني الخط!! كنت داير اطمن عليها بس ما مشكلة هسي بقيت كويسة ....ارتحت شديد ونفسياتي اتصلحت صحبي قالي: البشوفك قبيل ما يشوفك هسي مالك يا أسعد حكيت لي إنو مرتي تعبت وكدا قالي شكلك بتحبها شديد حظها والله ابتسمت لي بس ....طول اليوم كان بالي مشغول بيها لمن رجعت ما لقيتها كنت داير اسلها داير ادخل غرفتها تسنيم جاتني وقالت لي: أسعد أنا حاسة نفسي لسه ما كويسة قلت ليها مالك قالت لي: ماعارفة خايفة مشيت معاها رقدت كانت كل مرة بتقولي ماتخليني ...فماقدرت أمشي لي مني
