أنا أنا لازم افرقهم من بعض أنا أسعد ده من زمان كنت دايرو يجي بي بساطة يتزوج علي!
°ما إنتِ قلتي دايراهو أمك ورتك قالت ليك يا تسنيم مدام هو شاف حياتو واتزوج معناها ما كان دايرك بس إنتِ براك القلتي دايراهو هل في زول غصبك يا تسنيم مش براك قلتي كدا
^ يا الغبيانة نسيتي ح تسجل بيت بي إسمي اكتر من كدا دايرة شنو أنا
°اممم فهمتك يعني دايرة تتزوجي عشان القروش؟
^ما كدا وبس لا فعلاً أنا دايره اول شي ح اخليهو بي حبه حبه يديني كل ما املك وبعدين يطلق الما بتتسمي ديك
"""""""""""""""""""""""""""""""""""""""""""""""""""""""""""""
#اسعد
امونة ضحكت وقالت لي: شوف فرق زواجك الأول وزواجك هسي أنا للان مافاهمة لي أنت عملت كدا ولي اتزوجت مني دي دايرين نعرف...لي ساكت ما تتكلم...قلت ليها: أمونة أنا ما داير اتناقش معاكم في الموضوع ده ...مني اتزوجتها وخلاص مافي داعي كل مرة تسألني ...قالت لي: حلو والله لالا أعمل الداير تعملو نحنا ما بتدخل تاني...ضربت الطربيزة وقلت ليها: يا أمونة تاني ما اسمعك تتكلمي عنها كدا أحسن ليك احترمي نفسك وخلاص اتزوجتها أين كانت الطريقة بقت مرتي فاهمة ...قلت كدا وطلعت طوالي كنت مضايق شديد من كلامها .... قعت برا مسافة ودخلت أمي قالت لي: ما تهتم بي كلامها يا ولدي براك بتعرف اختك ما بتخت حساب للكلام الدايرة تقولوا...قلت ليها: خليها ما تتكلم وتتنافش مع مني براها متحملة كتير قالت لي قصدك شنو يا ولدي وقصة مني شنو وجبتها من وين واهلها وين ما ممكن نكون زي الطرش في الزفة....سكت ما قدرت اقول ليها شي ...قلت ليها: المهم بقت مرتي وخلاص....قالت لي داير تجنني يا ولد...قلت ليها: يمة ما تجيبي لي السيرة دي تاني خلاص الحصل حصل...قالت لي: طيب لمن اهلك يجوا للعرس نقول ليهم شنو .....قلت ليها: كيف يعني تقولي ليهم شنو قولي ليهم دي مرتي بس....قالت لي: اجي يا ولدي بس مرتك ساي كدا بدون مايعرفوا اهلها...قلت ليها: اظن دي حاجة ما بتخص زول دي خصوصيات ما عندهم شغلة بيها
_
الايام مرت واسبوع العرس جاء واهلنا جوا ...لمن شافوا مني بقوا يسألوني بس ما قلت ليهم الحقيقة ولا ح اقولها بإذن الله أنا جبتها عشان احميها وبس مهما كان السبب ..... أنا ما ح اوقول ليكم إني ما مصدقها أو مصدقها بس انا مصدوم ومني الدرستها زمان ديك ما ممكن تعمل كدا ...وإن شاءالله احساسي يكون صاح
مرة قاعد اتكلم مع صحبي بالتلفون قالي: اها يا عريس كيف أخبار....ضحكت وقلت لي: زول داير يعرس ح يكون كيف يعني....ضحك على كلامي وقالي: يعني خلاص ما ح تكون عذابي تاني أنا ما قادر اصدق اسعد داير يتزوج قلت لي: كدي عرس أول بعدين تعال اتكلم معاي كدا ...ضحك وقالي: خلاص بدينااا ضحكنا الاتنين وبقينا نتونس في امتحانات التلاميذ وكدا بعد قفلت ختيت التلفون وأنا سرحان...هسي انا اموري كلها جايطة مني مسكينة ما عندها زول غيري وانا داير أشوف حياتي واتزوج أنا لازم اعدل بيناتهم ....هسي تسنيم احساسها شنو لمن عرفت خايف تكون زعلانة مني إن شاءالله لمن أعقد عليها وتكون حلالي أراضيها بي اي شي ...هي ما عندها دخل في الحصل وبعد الشافتو لسه متمسكة بي ....اخت نفس عميق وقلت يارب ساعدني عشان اقدر اعدل بينهم وما اظلم وحدة فيهم يارب ساعدني
