دايرة شنو وريني بس دايرة شنو جاية تشمتي علينا صاح؟! اي ما أصلاً إنتِ كدا ما تصدقي لقيتي فرصة عشان تضحكي فينا
_خالتو وداد أنا
=أنا ما خالتك ولا نفسي أكون خالتك ...فاهمة اطلعي برا
_بس
=قلت ليك برااااا ما دايرة أشوفك في وشي يلا اطلعي من هنا
"أمي خليها أنا دايرة أتكلم معاها
=بتقولي في شنو إنتِ دايرة تقولي ليها شنو؟!
"أمي عليك الله خليني أتكلم معاها عليك الله يا أمي
*
خالتو وداد عاينت لي بي غيظ وطلعت ...ترتيل قالت لي بي تعب...منى تعالي اقعدي جنبي...مشيت قعت جنبها وبقيت ساكتة وبعاين ليها ... فجأة كدا بكت...قلت ليها: ترتيل الحاصل ليك شنو ومنو العمل فيك كدا ...ضحكت رغم الحزن الفي وشها...قالت لي بي صوت ضعيف ربنا أخد حقك يا منى ..العملتو ليك كلو رجع لي ...أنا عارفة إني غلطت وغلط كبير أنا بعد العملتو فيك واليوم الشفتك فيهو وإنتِ بي دمك والله العظيم كنت دايرة اوري أبوي ...بس ...بس....سكتت مسافة وقالت لي: بس هسي عرفو اي شي ...عرفوا أنا العملت فيك كدا عرفوا اي حاجة يا منى...
عاينت ليها بي صدمة وقلت ليها كيف؟!! بس عرفوا كيف
سكتت مسافة وقالت لي ....الكان متصور معاي هو الفضحني عارفة لي؟! عشان اتجوزت سليمان...قلت ليها بي خلعة شنو!!!؟ اتجوزتي سليمان!؟ بس لي؟! ...
قالت لي: أنا عذبت صابرين وعملت ليها مشاكل كتتيرة وده كلو عشان سليمان يطلقها بس هو ابا يطلقها...وجرجرت معاهو في المحاكم....
اتجوزتو بعد شهر من الحادثة الحصلت ليكم ... عارفة مافي زول بلغ عليهو لمن ضربكم ولا جات اي شرطة وده كلو عشان إنتوا إنضربتو في قرية مافيها قانون إلا قانون أهلها...عشان أسعد غريب مافي زول وقف معاهو...بتذكر أبوي جاني وقالي .... سليمان قال دايرك وقالي لي جيت اوريك بس عشان نحنا ح نقعد ليك بعد الصلاة طوالي ....أمي عارضت لمن أبوي ضربها كف ...وقفت في نصهم وقلت لي أبوي أنا موافقة....أمي شاكلتني كتتتير وقالت لي ده مجنون وما ح تعيشي مرتاحة أبوي قال ليها: هي دايرة كدا إنتِ مالك ...
بعد الصلاة عقدو علينا وكنت فرحانة شديد بس يا منى ...مهند ...قلت ليها: مهند منو؟! قالت لي: الولد ال الاتصورتي معاهو داك ...كنت بغشو وبقولي ح اتزوجك لمن عرف بي زواجي ...فضحني يا منى فضحني في القرية سليمان ما خلا عضمة سليمة عندي وأبوي كانوا أنا ما بتو كان بعاين لي بس ...ربنا أخد حقك إنتِ وصابرين سامحيني يا منى سامحيني يا أختي وما تنسي تخلي صابرين تسامحيني....نزلت منها دمعة وقالت لي: أنا توبتة يا منى توبته والله بس ما حاسة نفسي ح أعيش ...قلت ليها: ترتيل والله العظيم أنا مسامحاك صاح الشفتو منك ما كان ساهل بس انا ما زعلانة منك يا اختي وما تقولي كدا وإن شاء الله تبقي كويسة
