يوم العقد ما شفتو نهائي كنت بفتشو في اي مكان رغم إنو قالي ما ح تلقيني بس قلت لازم اشوفو عشان اقدر استحمل اسبوع او زياده من دونو...بس قدر ما فتشت مالقيت💔 البيت كان مليان لي درجة إنو مافي زول فقدتني أصلا ح يكونوا قايلني في الغرفة ...قريب الساعة١٢ قريب العقد يأست وجيت داخلة قعت في أقرب كرسي...
°كنتِ وين من الصباح
دي كانت أمونة قلت ليها: خير دايرة مني شي.... قالت لي: ما شايفة الجوطة دي كلها أمشي غسلي العدة الناس مافاضية هسي وغيرك مافي زول...
ما جادلتها كتير وماعندي نفس عشان اتنافش قمت مشيت المطبخ لقيت العدة دي بالكوم وكانت كتيرة شديد بديت اغسل فيها كل ما اقرب انتهي يجيبوا لي زيادة تعبت شديد ... وأنا من النوع المسكين المابقدر يتكلم أو يشكي فقت أسعد شديد والله .... الأذان اذن نفضت يدي من العدة وقلت امشي أصلي واجي... صليت...لمن جيت لقيت العدة زادت نسبة لي إنو الناس بتجي وتفطر نفسي بس وحدة منهم تساعدني في غسيل العدة...بقيت اغسل فيها وأنا ماقادرة اشيل حيلي... فجأة سمعت ضرب الرصاص وبقولوا عقدوا عقدوا ...الصوت بقي بعيد شديد وكل مرة يبعد كأني واقعة في بير.... تاني ما حسيت بي نفسي إلا وأنا في المستشفى مركبين لي درب كان واقف جنبي اسعد💜 وظاهر عليهو القلق قلت لي بي صوت ضعيف أسعد أنت جيت....قالي بي لهفة مني بقيتِ كيف هسي أنادي ليك الدكتور حاسة بي شي...حركت راسي وقلت لي: لالا أنا كويسة مافي داعي للدكتور...عقد حواجب وقالي: مالك ما فطرتي...سكت ما رديت عليهو .....تاني قالي: الدكتور قال جاك هبوط حاد بي سبب عدم الأكل لي بتعمل في نفسك كدا يا مني مش إتففنا إنك تاكلي تاني...قلت لي: اسعد أنا ما عندي نفس ..قاطعني وقالي: السينيارو ده تاني ما داير اسمعو تمام عشان ما ازعل منك ...قلت لي: خلاص تاني ح أكل ....قالي قبل ما امشي لازم أتأكد إنك فطرتي ...مرق برا جاب معاهو سلة بتاعة الأكل قلت لي: ده شنو قالي: هششش ولا كلمة......مرق منو وشال حبة ومداهو لي قلت لي: داير تاكلني! خليني أكل براي ....قالي: لا بأكلك أنا وإلا بزعل منك ....قلت لي: طيب طيب ....بدا ياكلني لحدي ما حلص وقالي: تاني ما أسمع إنو جاك هبوط بي سبب عدم الأكل تمام ويا مني أنا ح أمشي ومُضطر خليت اي شي وجيت هنا كان ما كدا كان قعت معاك...قلت لي: ما مشكلة قال: ح تقعدي هنا لحدي العصر عشان الدكتور قال لازم ترتاحي وبعدين أمونة ح تجي تسوقك قلت لي: طيب ....باسني في راسي وقالي يلا ما اوصيك بي نفسك ضحكت وقلت لي: ما تخاف علي ...قالي يلا مع سلامة ومشى...
حزنت عشان خلاني بس ده حق من حقوقو قعت لحدي العصر مافي زول جاني طلعت صليت في المسجد انتظرت مسافة برضو ما جاني زول قريب الساعة ٦ جات أمونة قالت لي : يلا ارح ...مشيت معاها بي سكات وصلنا المغرب دخلت صليت ودايرة ارقد اتزكرت كلام اسعد مشيت المطبخ شلت لي أكل ورجعت غرفتي اكلت لمن شبعت قلت تاني أنا ما ح أكون مسكينة بقيت مرت أسعد بقض النظر عن الطريقة الخلتنا نتزوج بس في النهاية بقيت مرتو
