لكل شخص حكايه
حلقه47
كاتبه كادي إبراهيم .
قراءه ممتعه
"لا تخفِ ما فعلت بكَ الأشواق، و اشرح هواك فكلنا عُشاقُ، عسى يعينكَ من شكوتَ لهُُ الهوى، في حملهِ فالعاشقون رفاقُ، لا تجزعن فلست أَول مُغرمٍ."
///
زياد رن ع ميار
زياد: نبي نشوفها ماتخلينيش نخش بروحي مش قادر نتحمل
ميار: خودها هي
زياد: عطيها ليا
ميار: زياد
امل مسكت تلفون وتكلم بصوتها مختفي من عياط !
امل:ايوه
زياد: ايوه حبيبي عظم الله اجرك الله يرحمه ويغفر له ويسكنه فسيح جناته
امل: تهندت بضيق دموعها نزلن مازالت مش مستوعبه جمله " عظم الله اجرك".. أجرنا واجرك ع الله يارب وانهارت بكاء
خدت ميار تلفون
زياد يبحت في طول السور : اسمعي اطلعن في جنان من الخلف ضروري نشوفها نرن تطلع
ميار: باه اصبر بس
وصكرت من زياد وحضنت امل
امل: نبي نشوفه
ميار :حتى هو يبي يشوفك ياعمري
امل: نحس في قلبي يرجف
ميار فتحتلها شيشه اميه..
ميار: اشربي
امل مسكت الشيشه بيديها ليرجفو وشربت ورن زياد
ميار: هي
مشت ميار وأمل من حوسه العزاء كل حد لهي في روحه محد مركز عليهن وطلعن
ميار:نراجيك هنا
امل مشت هي دموعها شلال تبي زياد هو وحيد يخفف عليها حزنها من بيخفف عليها شويه غير حبيبها ، تمشي بخطوات ثقيله وخوف مسيطر عليه لو حد شافها.
زياد شافها وقلبه ماتحملش منظرها دموعها عيونها الحمر من بكاء وحزن تسلسل في عيونها واختفت لمعه فرحه الحلوه لفيهن شعرها ملفوف بعشوائيه رغم الحزن كانت احليوه
زياد قرب منها بخطوات وحضنها وقاعدت تبكي في حضنه لدقائق لين تعبت
زياد : بحتي فيا حبيبي
امل: مش مصدقه زياد خلاص بابا سيبني ومشى من ليا بعده
زياد يمسح في دموعها: خلاص حبيبي انا قاعد ومستحيل نسيبك وعمي سليمان الله يرحمه ويغفر له لا اعتراض ع حكمه الله
امل: هو كان يفرح ب العيد امس لم يجن خواته بس مره هذي عدا ماحظرش
زياد: عيده في جنه ادعيله بس توا محتاج دعواتك
استمرت دوتهم نص ساعه وزياد يصبر فيها ويحول يخفف عليها حتى شويه!!
امل: خلاص معاش نقدر اكثر من هكي يفاقدوني
زياد: مهم انتِ كويسه توا؟ معاش نبيك تبكي را بدموعك تعذبيه
امل: حاضر
زياد: عارف مش وقته بس امل افتحي تلفون نطمن عليه حتى شويه مايقعدش بالي عليك مشغول وكولي ياقلبي مش كويس هك
امل: حاضر
زياد: حط ايديه في جيوبه ..زي ماتفقنا
امل : تم ومشت امل قاعد يبحت فيها هو خايف عليها لين اختفت
زياد يبحت في السور: اوف هديت حيلي
وتنطر من فوق السور ومشى لسيارته
وخشت امل ومعاها ميار وفرحت لقتها تحسنت شويه وصابره نوعا ما عن بدري
في زوايه في الخيمه اتنين من صبايا يحكن !
وليه تبحت في يسرى: ماتقوليش هذي بنتهم واخده رقد ريح؟؟هضا منظر راقدت ريح شوفي لبستها وماشاء الله جسمها وجها مدور متريحه شكلها
بحتت فيه : تي لا مش هذي، يسرى واخده ولد عيت الفلاني
وليه عقدت حواجبها لوت فمها: قصدك هذوكم التجار؟ كيف طحت فيه
قوست فمها: وين نندري عليها بس يقولو مريحها معيشها ملكه غير ويش تبي يافلانه ودكتور معروف
وليه: اهمم ماشاء الله ياهذي زيجه يابلاش
وردت عليها : لا شنو اخره صابر عليها مسكين لعند توا بلا ضنوه
فتحت عيونها بصدمه: ههههي كنه مايجوز عليها فلوس وعنده وانتي من ويلك هل معلومات
: يحنه هضا ع كلام الجارات في سهريه امس بعد جو هل دارها
: ولي مجوزه راقد ريح وين
..: مندرعنها وين اختفت بس بدري اول وحده سلمتي عليها
: هههي كنها مش كيف اختها تحسيها رقيقه بككل قريب تختفي وجها تاعب وهندامها مش كيف اختها
...: وفاء ديما حرجانه وتعني في هل الضنوه وشكله راجلها بلهون مش كيف يسرى
..: اهاا صار هكك
وبعدها خشت الجده جوهره وكناتها وجمانه وبنات محمود مسره وساره لانه مامشنش امس
..: بحتي هنا لخشو توا هل دار يسرى
...: ماشاء الله شكلهم صبايا كويسات.
..: اها وشكلها منسجمه معهن
أنت تقرأ
لكل شخص حكايه
Romance(روايه لكل شخص حكايه كل شخص في روايه عنده قصه وعنده ماضي وكل قصه حستفيدو منها روايه كوميديه ودراما وحب وأجواء عائلات الييبه ) بلهجه العامية اليبية الشرقاوية وقليل من لهجه الغرباوية. الكاتبه:- كـــــــادي إبراهيم .
