ကျုပ်က ပါရမီရှင် (Chapter 201-400)

Chapter 228

စာစဉ် 16 Chapter 228 Las Vegas

ရုံတင်ပြသမည့် ခွဲတမ်းသတ်မှတ်ချက်က ရုပ်ရှင်ရုံတစ်ခုမှ ရုံတင်ခွင့်အချိုးကို ကိုယ်စားပြုလေသည်။ ရုံတင် ပြသမည့် ခွဲတမ်းသတ်မှတ်ချက် ငါးရာခိုင်နှုန်းသာ ရှိခြင်းက ရုပ်ရှင်ရုံတစ်ခုတွင် တစ်နေ့၌ နှစ်ကြိမ်သာ ပြနိုင်မည် ဖြစ်ပြီး အချိန်ကတည်း အဆိုးဆုံးအချိန်များသာ ဖြစ်ပေသည်။
ဤသည်မှာလည်း ထုတ်လုပ်သည့်အပိုင်း၌ ဝိုင်နှင့် မိုဟာမက် အလီတို့ ပါဝင်သည့် လွှမ်းမိုးမှုကြောင့်သာ ရလာခြင်း ဖြစ်သည်။ ယင်းကို ကြည့်ချင်အားဖြင့် ဟော်ရန်ကျားက ဘယ်လောက် ဝိုင်းကြဉ်ခံထားရလဲ သိသာ လှသည်။
"သာမန် အခြေအနေတွေမှာဆိုရင် အရမ်း နာမည်ကြီးတဲ့ ရုပ်ရှင်တွေ ရုံတင်တာ များနေမှသာ အခြားရုပ်ရှင်တွေက ဒီလိုခွဲတမ်းမျိုး ရတာ"
လီထိုက်က မကျေမနပ် ပြောလာသည်။ ဤသို့သော ခွဲတမ်းနှင့်သာဆိုလျင် ရုပ်ရှင်က ကောင်းနေလျင်တောင်မှ box office ရောင်းအားက သေချာပေါက် ဆိုးရွားပေလိမ့်မည်။
"ရုပ်ရှင်ရဲ့ အရည်အသွေးက ကောင်းတယ်ဆိုရင် ခွဲတမ်းသက်မှတ်ချက်ကလည်း တိုးလာမှာပါ"
ရဲ့လင်းချန် ပြန်ပြောလိုက်သည်။ လက်ရှိအချိန်တွင် သူ့ကိုယ်သူ နှစ်သိမ့်ရန်သာ တတ်နိုင်ပေသည်။
ရုပ်ရှင်က ကောင်းလွန်းလျင် box office ရောင်းအားက အာမခံချက်ရှိသည်ဟု သူ ခံစားမိသော်လည်း ဤကိစ္စကို သူ မစဉ်းစားမိပါ။ ဟော်ရန်ကျားက ပစ်မှတ်ထား၍ အကြဉ်ခံထားရမှန်း သိသာလှ၏။
"အဲ့မှာလည်း ပြဿနာ ရှိတယ်"
လီထိုက်က ပင်ပန်း၍ မတတ်သာမှုတို့ ပြည့်နေသော အသံဖြင့် ပြောလာသည်။
"ရုပ်ရှင်ကို ရုံတင်ပြီးတော့ ဝေဖန်ချက်တွေအများစုက ဆိုးရွားတာတွေပဲ"
"ဆိုးရွားတဲ့ ဝေဖန်ချက်တွေ ဟုတ်လား"
ရဲ့လင်းချန်၏ မျက်လုံးတွင် အေးစက်စက် အလင်းတစ်ချက် ဖြတ်ပြေးသွားသည်။
"တစ်ယောက်ယောက်က မကောင်းပြောတဲ့သူတွေကို ငှားပြီး ကျွန်တော်တို့ ရုပ်ရှင်ကို မကောင်းတဲ့ ဝေဖန်ချက်တွေ ရေးခိုင်းတာလား"
"ဟုတ်တယ်"
လီထိုက် အောင့်သက်သက် ပြုံးလိုက်မိသည်။
"ကျွန်တော်တို့ရဲ့ ရုံတင်ခွင့် ခွဲတမ်းသတ်မှတ်ချက်တင် နည်းနေတာ၊ မကောင်းတဲ့ ဝေဖန်ချက်တွေ ပြည့်နေရင် ကျွန်တော်တို့ ရုံကနေတောင် အချခံရလောက်တယ်၊ အခု အဓိက ရုပ်ရှင်ရုံအားလုံးက ကျွန်တော်တို့ရဲ့ အဆင့်က ၇.၂ အောက် ရောက်နေတယ်"
အစကတည်းက ရုံတင်ခွင့်က နည်းနေပြီး မကောင်းသော ဝေဖန်ချက်များကိုပါ ပေါင်းလိုက်သောအခါ ဟော်ရန်ကျားသည် မကြာခင် ရုံကပင် အချခံရလောက်သည်။
"ကျွန်တော်တို့ ရန်ပုံငွေနဲ့ အဲ့မှာ တောင့်ထားဖို့ ကြိုးစားပါ၊ ကျွန်တော်တို့ မကောင်းတဲ့ ဝေဖန်ချက်တွေ အဲ့လို ဆက်ပုံနေအောင် ထားလို့မရဘူး၊ ကျန်တာကိုတော့ ကျွန်တော် နည်းလမ်း ရှာကြည့်လိုက်ပါ့မယ်"
ရဲ့လင်းချန် ပင့်သက်ရှိုက်လိုက်သည်။ ဤသည်က ဝူဟန်၏ လက်ချက်ဖြစ်ကြောင်း ပြောနေစရာပင် မလိုပါ။
ဖုန်းချလိုက်ပြီးနောက် ရဲ့လင်းချန် မျက်မှောင်ကြုတ်သွားသည်။ သူ၏ အရေးမထားခဲ့မှုကြောင့် ရုပ်ရှင်က ရုံတင်ပြီးနောက် ဤသို့သော အခြေအနေသို့ ကျရောက်သွားခဲ့ရသည်။
Taobao ၏ လက်မှတ်ဝယ်သော ကဏ္ဍကို ဖွင့်လိုက်သောအခါ ဟော်ရန်ကျားက တကယ်ပင် အဆင့်အနိမ့်ဆုံး ဖြစ်နေသည်။
ဟော်ရန်ကျား၏ ဝေဖန်ချက်များကို စစ်ဆေးကြည့်သောအခါ အားလုံးက ကြယ်တစ်လုံးသာ ပေးထားကြသည်။
[ချီးရုပ်ရှင် ... ဆယ်မိနစ် မပြည့်ခင် ငါ ထပြန်လာခဲ့ရတယ်]
[ငါ ကြည့်ရင်း အိပ်ပျော်သွားတယ်၊ သောက်ကျိုးနည်း ဘာတွေ ရိုက်ထားတာလဲ]
[ငါ့ဟန်ဟန်ကို နင် ဘယ်လိုတောင် အထင်သေးခဲ့တာလဲ၊ အမှိုက်ပဲ၊ နင့်အတွက် ဆိုးရွားတဲ့ ဝေဖန်ချက်ပဲ ပေးမယ်]
[ကျေးဇူးပြုပြီး ဒီရုပ်ရှင်ကို ရှောင်ကြပါ၊ ပြီးတော့ ဟန်ဟန်ရဲ့ ငါက သူရဲကောင်းကို အားပေးကြပါ]
[လုံးဝ အဆိုးဆုံး ရုပ်ရှင်ပဲ]
[ဒီရုပ်ရှင်က တော်တော်လေး ကောင်းပါတယ်၊ ဘာလို့ ဆိုးရွားတဲ့ ဝေဖန်ချက်တွေ များနေတာလဲ]
[မကောင်းကြောင်း ရေးတဲ့သူတွေက လိုင်းပေါ်က ငါးကျပ်ပြားတွေ ဖြစ်လောက်တယ်၊ ဒီရုပ်ရှင်က မိုက်တယ်၊ ကြည့်ကြည့်ဖို့ ငါ အပြည့်အဝ ထောက်ခံတယ်]
ကောင်းသော ဝေဖန်ချက်အချို့ ရှိသော်လည်း ၎င်းတို့က မကောင်းသော ဝေဖန်ချက်များအောက်၌ နစ်မြုပ်သွား လေသည်။
ထိုအခိုက်တွင် တစ်ချိန်တည်း ပြသနေသည့် ငါက သူရဲကောင်း ရုပ်ရှင်သည် ဝေဖန်ချက်အဆင့် ၉.၂ ရရှိထားသည်။
[အား ... ဟန်ဟန်က သိပ်ချော်တာပဲ၊ ငါ့ဆီက အမှတ် ဆယ်မှတ်လုံး ယူလိုက်ပါတော့]
[ငါတို့ ဟန်ဟန် တစ်ယောက်တည်းနဲ့တင် ငါ အမှတ်ပြည့် ပေးတယ်]
[သိပ်ကောင်းတာပဲ၊ ငါ ရုပ်ရှင်ကားတစ်ခုလုံးမှာ ဟန်ဟန်ကိုပဲ ကြည့်နေတာ]
[မြေယိုး ... ဒါက သောက်ကျိုးနည်း ဘာကြီးလဲ၊ အထူးပြုလုပ်ချက် ဘာမှမပါဘူး၊ ပြီးတော့ အက်ရှင် အခန်းတိုင်းက ရယ်စရာကောင်းတယ်၊ ဒါက ဘာလို့ အဆင့်မြင့်နေတာလဲ၊ လိမ်နေတာ]
မကောင်းသော ဝေဖန်ချက်များ ရှိသော်လည်း ၎င်းတို့က ချက်ချင်း တိုက်ခိုက်ခံရလေသည်။
ရဲ့လင်းချန် ခေါင်းခါလိုက်ပြီး မတတ်သာသလို ခံစားလိုက်ရသည်။ အမာခံ ပရိသတ်များက တကယ်ပင် ကြောက်စရာ ကောင်းလှသည်။ သူတို့က ကျိုးကြောင်းဆင်ခြင်နိုင်စွမ်း ကင်းမဲ့နေသည်။ လူအများက ငပိန်လေးတွေရဲ့ ခေတ်ဟု‌ ပြောကြသည်က မဆန်းတော့ပေ။ ဤသို့သော ဖိအားအောက်တွင် ဘယ်သူမဆို သူတို့ကို ရှောင်ကြမှာပင်။
ဖုန်းကို သိမ်းလိုက်ပြီးနောက် ရဲ့လင်းချန် တောင်ကျစမ်းရေ အိမ်ရာမှ ထါက်လာလိုက်သည်။ အပြင်တွင် Lincoln ဇိမ်ခံ မှန်လုံကားက သူ့ကို အသင့်စောင့်နေ၏။ လုသားအဖသည်လည်း သူ ရောက်လာသည်ကို စိတ်အား ထက်သန်စွာ စောင့်နေကြလေသည်။
ရဲ့လင်းချန်ကို မြင်သည်နှင့် သူတို့က ချက်ချင်း အနားလာပြီး နှုတ်ဆက်ကြသည်။
"ဆရာရဲ့ ကြိုဆိုပါတယ်"
ရဲ့လင်းချန်က ပုံမှန်အတိုင်း ခေါင်းညိတ်လိုက်ပြီးနောက် သူ့အတွက် ကားတံခါး ဖွင့်ပေးထားသည့်ဘက်မှ ကားပေါ် တက်လိုက်သည်။
ကားက လေဆိပ်သို့ ဖြည်းဖြည်းချင်း မောင်းနှင်သွားလေသည်။ လုလုပ်ငန်းစုက Las Vegas သို့ ထွက်ခွာမည့် လေယာဉ်လက်မှတ်အား ဝယ်ထားပြီးလေသည်။
ထိုအခိုက်တွင် ငါက သူရဲကောင်း၏ စတူဒီယိုဝန်ထမ်းများအားလုံးက စိတ်ဓာတ် တက်ကြွစွာဖြင့် အောင်ပွဲခံ နေကြသည်။
"ဟားဟားဟား မစ္စတာ ဝူဟန်က box office ရောင်းအားအတွက် အကြီးဆုံး အာမခံချက်ပဲ၊ ပထမနေ့ပဲ ရှိသေးတယ်၊ ငါတို့ box office ရောင်းအားက သန်းငါးဆယ်ကို ရောက်နေပြီ၊ ပြီးတော့ ဝေဖန်ချက်တွေကလည်း ကောင်းယတယ်၊ မစ္စတာဝူဟန်ကို ဂုဏ်ပြုပါတယ်"
ရှစ်လေ့က ရယ်၍ အော်ပြောလေသည်။
"ဟုတ်တယ်"
ငါက သူရဲကောင်း၏ ဒါရိုက်တာဖြစ်သော ဝူယုံကလည်း ထရပ်လေသည်။
"အဲ့လူက ဘယ်သူပါလိမ့်၊ ဝိုင်လား ... ဘယ်လိုလုပ် သူက မစ္စတာ ဝူဟန်ကို ယှဉ်နိုင်မှာလဲ၊ ဒီရုပ်ရှင်မှာ ပါပေးတဲ့အတွက် မစ္စတာ ဝူဟန်ကို ငါတို့ ကျေးဇူးတင်ရမယ်၊ ငါတို့ စိတ်ရှိသလို သောက်လိုက်ရအောင်"
"ဝိုင်လား၊ သူတို့က လူစိတ်ဝင်စားခံရအောင် လုပ်နေတဲ့သူ သက်သက်ပဲ၊ အစကတည်းက ဟော်ရန်ကျားက အမှိုက်ပဲလေ၊ ပြီးတော့ ကျုပ် အဓိက ရုပ်ရှင်ရုံတွေအားလုံးနဲ့ စကား ပြောထားပြီးပြီ၊ သူတို့ကို ရုံတင် ပြသခွင့် ခွဲတမ်း ဘယ်လောက်ပေးပဲဖြစ်ဖြစ် ပေးလိုက်တာကတင် ကျုပ်တို့ တော်တော် သဘောထားကြီးနေပြီ"
ဝူဟန်က ကျယ်လောင်စွာ ရယ်လိုက်သည်။
"ကျုပ်ကို အာခံတဲ့ ဘယ်သူမဆို ဘယ်တော့မှ အဆုံးသတ် မကောင်းဘူး"
"မစ္စတာဝူဟန် ပြေတာ မှန်တယ်"
ရှစ်လေ့က ချက်ချင်း ကပ်ပါးရပ်ပါး လုပ်လေသည်။
"မင်း ဝေ့ပေါ်မှာ စကားလေးတစ်ခွန်း ပြောဖို့ပဲ လိုအပ်တာ၊ ပြီးရင် မင်းရဲ့ သန်းချီတဲ့ ပရိသတ်တွေက အပြေးလာပြီး ဟော်ရန်ကျားကို မကောင်းတဲ့ ဝေဖန်ချက်တွေ ပေးတော့တာပဲ၊ အခု ဟော်ရန်ကျားရဲ့ ဂုဏ်သတင်းက ကျောက်ခဲ ရေမြုပ်သလို ဖြစ်နေပြီ၊ ရုံချခံရဖို့ သိပ်မလိုတော့ဘူး"
"ဟဲဟဲ ဒီတစ်ခါတော့ လီထိုက် တော်တော် ထိခိုက်နစ်နာတော့မှာ၊ ရုပ်ရှင်ကား နယ်ပယ်ပဲ ပြောင်းဖို့အတွက် ဝိုင်ကို သူ ယုံကြည်လိုက်တာကိုက သူ့အမှားပဲ"
ဝူယုံက ခနဲ့လေသည်။
"ဒါရိုက်တာဝူ၊ မစ္စတာဝူဟန်၊ ဆရာရှစ်၊ အားလုံးကို ဂုဏ်ပြုပါတယ်၊ ကျွန်တော့်ကို ခင်ဗျားတို့ ရုပ်ရှင်မှာ ရင်းနှီးမြှုပ်နှံခွင့် ပေးတဲ့အတွက် ကျေးဇူးတင်ပါတယ်"
ဝဖို့ဖိုင် ချန်ဖုန့်က ဝိုင်ခွက်ကို ကိုင်၍ ဝက်သဖွယ် ပြုံးနေသည်။
"ကျွန်မကလည်း ရှင်တို့အားလုံးကို ဂုဏ်ပြုပါတယ်"
သူ့အနောက်မှ ယန်ယွဲ့ကလည်း အပြုံးနှင့် ဝင်ပြော၏။
"အဲ့လိုမပြောပါနဲ့ ဒါရိုက်တာချန်၊ မင်းရဲ့ ရင်းနှီးမြှုပ်နှံမှုကလည်း ကျုပ်တို့ကို တော်တော်လေး အကူအညီ ဖြစ်စေခဲ့တာပါပဲ"
ဝူယုံက ပြန်ပြောသည်။
ချန်ဖုန့်၏ မျက်နှာက စိတ်လှုပ်ရှားမှုကြောင့် နီနေ၏။
"ကျွန်တော် လီထိုက်ကို သွားတွေ့ပြီးတော့ သူ့ဆီကနေ အကန်ခံလိုက်ရတာကို မှတ်မိလား၊ သောက်ကျိုးနည်း ပါဗျာ ... သူက ရုပ်သံဇာတ်လမ်းတွဲတစ်ချို့ ရိုက်ဖူးတယ်ဆိုတာနဲ့ သူ့ကိုယ်သူ ဟုတ်လှပြီ ထင်နေတာလား မသိဘူး၊ အဲ့ရှုံးမယ့် ပရောဂျက်မှာ မဝင်ဘဲ ခင်ဗျားတို့ဘက်ကို ရွေးလိုက်မိလို့ တော်သေးတယ်"
"ဟုတ်တယ် ဒါရိုက်တာချန်၊ တကယ်လို့ ဟော်ရန်ကျားမှာ ကျွန်မတို့ ရင်းနှီးလိုက်မိရင် ကျွန်မတို့လည်း ဆုံးရှုံးမှုကြောင့် ငိုနေလောက်ပြီ"
ယန်ယွဲ့၏ မျက်လုံးတွင် သရော်ဟန် ဖြတ်ပြေးသွားသည်။
"ဟိုအရူး လီကျင့်က သူ ဖက်ထားစရာ ပေါင်တုံးကြီး ရပြီလို့ ထင်နေတာလေ၊ ဟွန့် ... အမှိုက်က အမှိုက်ပဲ၊ ဘယ်လိုလုပ် သူက ပြန်ဦးမော့လာနိုင်မှာလဲ"
"မစ္စတာဝူဟန်နောက်ကို လိုက်တာက ပိုကောင်းတယ်၊ ကျုပ်တို့ အမြတ်အများကြီး ရမှာ၊ ဟားဟားဟား ..."
ချန်ဖုန့်က ထပ်သရော်လိုက်သည်။
"လီထိုက် အားလုံး ဆုံးရှုံးသွားတာနဲ့ ငါ သူ့ကို မခံချင်အောင် ပြောဦးမှာ"
...
ထိုနေ့ နေ့လယ်တွင် ရဲ့လင်းချန်က လေဆိပ်မှ ထွက်ခွာသွားပြီး Las Vegas ကို ခရီးနှင်လေတော့သည်။
သူတို့က လေယာဉ်တစ်ခုလုံးကို ငှားထားသဖြင့် အတော်လေး နေရာလွတ်နေ၏။ လေယာဉ်ပေါ်တွင် သောက်စရာ မျိုးစုံကို ထားရှိထားပြီး ခုံများကိုလည်း သားရေအဆင့်ဖြင့် ပြုလုပ်ထားသည်။ သူ စိတ်ကြိုက် ခြေလက်ဆန့်နိုင်ပြီး လေယာဉ်မယ်တစ်ယောက်က သူ့ကို အချိန်တိုင်း ဝန်ဆောင်မှု ပေးလေသည်။
"ဆရာရဲ့ ဒီလေယာဉ်က ရေကူးကန်နဲ့ ရုပ်ရှင်ရုံလည်း ပါပါတယ်၊ ခင်ဗျား ဖျော်ဖြေမှုတစ်ခုခု လိုတယ်ဆိုရင် ကျုပ်တို့ကို အသိပေးပါ"
လုဟောင်က ရဲ့လင်းချန်အား အားတက်သရော အသိပေးပြီး မျက်နှာလုပ်ရန် ကြိုးစားကြသည်။
ရဲ့လင်းချန်က အင်းဟု ပြန်ဖြေလိုက်ပြီး ဆိုဖာပေါ်တွင် လှဲပြီး တရေးအိပ်လိုက်သည်။
လမ်းတစ်လျှောက်တွင် လေယာဉ်က ငြိမ့်ငြိမ့်ညောင်းညောင်း ပျံသန်းနေ၏။ သူတို့ Las Vegas သို့ ရောက်ချိန်တွင် ညဉ့်ပင် အတော်နက်နေလေပြီ။ လေယာဉ်ပေါ်မှ အောက်ကို လှမ်းကြည့်လိုက်သောအခါ ကျယ်ပြောလှသော သမုဒ္ဒရာကို သူ လှမ်းမြင်လိုက်ရသည်။ ရေပြင်ပေါ်တွင် ငါးဖမ်းလှေများမှ မီးရောင်များ လင်းနေပြီး ပင်လယ်ပြင်တွင် ကောင်းကင်မှ ကြယ်များကဲ့သို့ တလက်လက် တောက်ပနေ၏။
ပင်လယ်နားမှ ကုန်းမြေမှာမူ မီးရောင်စုံတို့ဖြင့် ထိန်ထိန်ညီးနေပြီး တန်ဖိုးကြီး၍ ဇိမ်ခံကောင်းပေလောက်သည်။