🍥((هل يفعلها ؟)) أقوى سلسلة للاستعداد لرمضان🌸
🎯الحلقه الثانيه 🎯😊
👌 الكنز المفقود!
*أنا جاي انهاردة يا شباب أكلّمكم عن فرصة العمر .. فرصة حقيقية بجد، فرصة محدش كان يحلم بيها إنها تكون بالشكل ده .. فرصة لو استغليتها صح ممكن تغيّر حياتك بل مصيرك بالكامل .. وفي نفس الوقت فرصة محدش هيدفع فيها ولا مليم ، ولا هيحتاج واسطة ولا محسوبية علشان يفوز بيها لأنها متاحة للجميع ، الباب مفتوح لكل الناس*
*أنا جاي انهاردة أكلمكم عن "شهر رمضان" ..*
*شهر رمضان اللي أصبح في ذاكرتنا مجرّد شهر بنشيل هَمّه ..*
🔖 *يا ترى الصيام هيبقى في الصيف والحر؟؟ ، ولا هييجي في الشتا السنة دي علشان اليوم يعدّي بسرعة ؟؟*
🔖 *ياترى هنبقى خلّصنا دراسة ولا هييجي وسط الامتحانات ؟!*
🔖 *ياترى هيعملوا مسلسلات جديدة حلوة ولا هتبقى بايخة ومُملّة ؟!*
🔖 *ياترى هنخرج نتفسح فين بعد الفطار السنة دي ؟؟*
🌙* شهر رمضان اللي أصبح عند كتير من المسلمين مُجرّد :
*"طقوس ومظاهر وظواهر رمضانية" !، يدخل رمضان ، الناس تغير نغمة موبايلها لـ "رمضان جانا وفرحنا به" ، ويعلّقوا الزينات والفوانيس ، وييجي الفطار تلاقي الأصناف الرمضانية مما لذّ وطاب، الياميش وقمر الدين والقطايف !! لدرجة إن البعض أصبح لا يشتاق لنفحات رمضان وإنما لمأكولات رمضان !!*
🌟 *وفيه اللي مش عايز رمضان ييجي أصلاً لأنه هيحرمه من السيجارة أو كوباية الشاي أو فنجان القهوة ومزاجه هيتعكر !!!!*
*فأصبح رمضان تقيل على نفوس كتير مننا ، أصبح شهر عادي جداً ، زيّه زي بقية الشهور، مفيش أي اختلاف في نظرة كتير من الناس له ! وإنا لله وإنا إليه راجعون !*
👈* من أكتر المشاهد اللي قعدت أتفكر فيها ، مشهد الناس يوم عرض كارفور !
🍃 *كان فيه offer من فترة في كارفور، عروض وتخفيضات وهدايا على بعض أنواع الموبايلات والأجهزة الكهربائية وشوية رز ومكرونات وسُكّر وزيت ، الناس جريت بسرعة وكانت واقفة طوابير ومفيش موضع قدم لحد !!*
🔆 الدنيا زحمة موت وكله بيتخانق علشان يلحق بسرعة أي حاجة من العرض !!!
*كان منظر عجيب !! الناس بتتخانق علشان تشتري حاجات ممكن متكونش هي عايزاها أساساً ، وده كله علشان تاخد بس التخفيضات والهدايا !!!*
*منظر تهافت الناس ، واقبالهم ، وسرعتهم في اقتناص فرصة دنيوية تافهه زي دي علشان هيوفّر جنيه ولا اتنين في كيس رز ، ولا حتى هيوفّر 1000 جنيه في جهاز كهربائي ، بيعرّفك قد إيه قدر الدنيا وقدر الآخرة في قلوب كتير من الناس !*
👈بيعرّفك الحقيقة المُرّة للأسف !!!
*إنما لما يكون العرض والأوكازيون حسنات ورحمات وبركات ومغفرة وقرب من الله ودعوات مستجابة .. لما يكون العرض رفع درجات في جنة عرضها السماوات والأرض .. لما يكون العرض عتق من نــار وقودها الناس والحجارة ...*
*كام واحد بنشوفه بيجري علشان يلحق العرض ؟؟*
*كام واحد عنده استعداد يقف في طابور ويتزاحم ويتعب علشان يفوز ساعتها ؟؟؟*
*كام واحد هيحزن ويبكي لو فاته العرض وملحقش أي حاجة منه ؟؟!*
*المشهد بتاع كارفور ده بيذكّرني بحديث النبي* :
(والذي نفسي بِيَدِه ، لو يَعلم أحدهم أن يجد عظماً سميناً أو مَرْمَاتين حَسنتين لشَهِدَ العِشاء)
« متفق عليه .
*النبي صلي الله عليه وسلم* بيحلف وبيقول إن لو قولنا إن فيه لحمة هتتوزع في الجامع للّي هيصلّي، هتلاقي الناس جريت على الجامع علشان تصلّي !! ومش أي لحمة ، ده حتى لو شوية عظم !!!*
* يآآآآآآآه ... للدرجة دي هانت الآخرة في قلوب كتير مننا ومبقتش تهمنا ؟؟!
* ده إنت لو واحد بيديلك شنطة فلوس هدية ورفضتها ،
👈 الناس كلها هتقول عليك "مجنون رسمي" !!
أمال اللي بيرفض مِنَح وعطايا وكنوز رمضان الربانية يبقى إيه ؟؟
🌸إمتى يا شباب هنحس بجد إن رمضان فرصة العمر الحقيقية اللي لا تعوض ؟؟؟
🌸 إمتى هيدخل قلوبنا أحاسيس الشوق لرمضان والفرحة بالطاعة والعبادة فيه ؟؟؟
🌸 إمتى هنعرف يعني إيه رمضان ونستشعر أهميته وقيمته ونقدره حق قدره ؟؟؟
🌸 إمتى هنخاف ونبكي ونحزن على فوات رمضان ؟؟!!
🌀ده لو أي حد بيشتغل في شركة فيها نظام الأرباح ، بيبقى قاعد طول السنة مستني الشهر اللي هيقبض فيه الأرباح بفارغ الصبر ..!
🍃 كل يوم بيحلم إمتى هييجي الشهر اللي ممكن بأرباحه يحل مشاكله ويسدد ديونه كلها .. تخيل لو بنهتم برمضان شهر الأرباح الخيالية للتجارة مع الله زي اهتمامنا بأرباح وفلوس الدنيا ؟؟!
* تخيّل كنا هنشتاقله قد إيه ؟؟!
👈كنا هنعدّ الأيام وننتظره ونستعد له إزاي ؟؟؟!
🌸والله العظيم يا حبيب قلبي لو عرفت أرباح رمضان ومكاسب رمضان و قَدر رمضان وأهميته في حياتك والله ما هتسيب سجدة إلا وهتدعي فيها
👈بكل شوق من قلبك وتقول :😍
( اللهم بلغني رمضان واجعلني فيه من الفائزين )🌙
نكمل الحلقة القادمة بمشيئة الله تعالى..
🎁🎁🎁🎁🎁🎁🎁
#هل_يفعلها
#حياتي_دعوة
أنت تقرأ
هل يفعلها ؟!
Spiritual* يا ترى يا شباب لو كل واحد فينا حاول يرجع بالذاكرة شويتين ويتأمل في حياته ويشوف كام فرصة كبيرة وسهلة قابلته .. وكانت فرصة واحدة منها كفيلة إنها تغير مسار حياته كلها و تنقله نقلة نوعية للأفضل ، ولكن للأسف الشديد ضيّعها من إيديه بكل كسل واستهتار ولا...
