هل يفعلها ؟!

19

🍥((هل يفعلها ؟))أقوى سلسلة للاستعداد لرمضان🌙

🎯الحلقه 19 🎯😊

🌸 حواء في رمضان  🌸

🌻أما بالنسبة لبناتنا وأخواتنا وأمهاتنا الفضليات ..

🌸أولاً :
بندعيلهم ربنا يحفظهم ويبارك في عمرهم ويجازيهم كل خير على المجهود اللي بيبذلوه في العطاء لكل بيت وكل أسرة .. وكفاية إنهم مع صيامهم بيكونوا شايلين شغل البيت كله ، ده غير اللي عندهم أولاد ومطلّعين روحهم ، ده غير باقي ظروف الحياة الصعبة ! فـ ربنا يقوّيهم ويكون في عونهم ..اللهم آمين ..

🌸ثانياً :
عايزين نبشرّهم ونفرّحهم بثوابهم العظيم وأجرهم على كل حاجة بيعملوها في البيت ، لأن كتير من أخواتنا بيزعلوا جامد على الوقت اللي بيضيع في المطبخ والبيت .. بنقولهم ده مش وقت ضايع اطلاقاً .. بالعكس تماماً .. ده ممكن يكون كل لحظة من الوقت ده عبادة كأنك بتقرأي قرآن أو بتصلّي ، بل إن ثوابها ممكن يكون أكبر من ثواب عبادات تانية كتير .. وده بكل بساطة عن طريق إنك تجددي نيّتك كل شوية وتحتسبي كل اللي بتعمليه لله عز وجل .. وبإذن الله هتلاقي كل تعبك ومجهودك في شغل البيت والمطبخ في موازين حسناتك يوم القيامة.

*👈 فعايزينك تعدّدي النوايا علشان تاخدي أكبر قدر من الأجر .. ومنها على سبيل المثال لا الحصر :
نية تفطير الصائمين «من فطر صائماً، كان له مثل أجره، غير أنه لا ينقص من أجر الصائم شيء» ، يعني هتاخدى عن كل فرد فى أسرتك أجر صيامه ..
👈ومنها نيّة اطعام الطعام ، ونيّة نفع الناس وادخال السرور على قلوبهم .. ونيّة البر بالوالدين والزوج ، ونيّة إعانة الأهل وتقويتهم على عبادة الله .. وغيرها من النوايا الطيبة اللي ممكن تحتسبيها بإذن الله ..

*👌 والبشرى الجميلة اللي عايز أقدمهالك هدية يا أختي هي حديث للرسول صلى الله عليه وسلم  ، عن أنس  قال: كنا مع النبي صلى الله عليه وسلم في السفر فمنا الصائم، ومنا المفطر ، فنزلنا يَوْمًا مَنْزِلاً حارًّا، وأَكْثَرُنَا ظِلاًّ صَاحِبُ الْكِسَاءِ، ومنا من يَتَّقِى الشمس بيده ، فَسَقَطَ الصُّوَّامُ وَقَامَ الْمُفْطِرُونَ فَضَرَبُوا الأَبْنِيَةِ وَسَقَوْا الرِّكَابَ، فقال النبي صلى الله عليه وسلم  : ( ذَهَبَ الْمُفْطِرُونَ الْيَوْمَ بِالأَجْرِ ) متفق عليه .
👈والمعنى هنا : ذهب المفطرون اليوم بأجر يزيد على أجر الصائمين .. "ذهب المفطرون اليوم بالأجر" لأن أجر العامل بقدر عمله ، وكلما كان نفع العمل مُتعدّياً كان أكتر في الأجر ، لارتباطه بمصالح الخلق .. وبكده يا أختي يكون ليكي أجر صيامك ؛ ومعاه أجر القائم على الصائم ..

*👌وكمان تقدري تستغلي الوقت ده في " الغنيمة السهلة " ؛ وهى كثرة الذكر والتسبيح والاستغفار والدعاء طول ما إنتي بتشتغلي في البيت أو المطبخ ..

* 🌸ثالثاً :
ياريت تشتري حاجة رمضان اللي ممكن تتخزن مُجمعة من أول الشهر ، مش كل يوم تنزل السوق وترجعي مُرهقة وتعبانة وتضيعي وقت ، وكمان لو تقدري تشتري لبس العيد واحتياجاته بدل ما تضيعي وقتك في اللف على المعارض والمحلات في العشر الأواخر من رمضان اللي المفروض ميضعش منهم أي لحظة ..

*🌸 رابعاً :
حاولي على قد ما تقدري يكون فيه اعتدال وتنويع في تحضير الأكل .. وياريت يكون تحضير الفطار وقت الظهر ، وخلّي اللمسات النهائية قبل المغرب بربع ساعة ، علشان تقدري تستغلي الوقت بعد العصر في عبادات تانية
وبلاش تقضي اليوم كله قدام برامج وقنوات وفديوهات الطبخ ، الأكلة اللي عايزة تتعلميها يبقى من قبل رمضان علشان تحافظي على وقتك ...

*🌸 خامساً :
  مش معنى إنك مش بتنزلي تصلي في المسجد إنك تأخري الصلاة عن وقتها ، لحد ما تحضّري الأكل وتشطّبي المطبخ وتخلصي اللي وراكي ، وفجأة تلاقي أذان العصر بيأذن والظهر راح منك !!
🍃 سُأل النبي صلى الله عليه وسلم : أي العمل أحب إلى الله؟ فقال: "الصلاة على وقتها" .. يعني الأفضل طبعاً واللي ربنا بيحبه إن وقت الأذان تكوني مجهزة نفسك وقاعدة على سجادة الصلاة ..

*🌸 سادساً :
  اللي عندها أولاد تحاول وتجتهد إنها تقوم بكل واجباتها المنزلية أثناء استيقاظ الأولاد ؛ علشان تستغل فترة نومهم في العبادة وتعرف تتلذذ بها ..

* 🌸سابعاً :
العزومات والزيارات في رمضان حاجة جميلة جداً ومن صلة الرحم اللي مطالبين بها، وكذلك بتزوّد الود والألفة بين الناس ، ولكن ياريت بلاش التوسع في الولائم !! بلاش مهرجان الأكل اللي بنشوفه في العزومات!

* 👈وبلاش علشان عندك عزومة تقعدي من قبلها بأسبوع بتحضري لها ، وشاغلة وقتك وهمًك وتفكيرك كله وتضيّعي منك حاجات تانية غالية أوي كان ممكن تعمليها

* 🚫واحذري كل الحذر من "الجلسات النسائية" و"القعدات البناتيتية" اللي كل الكلام فيها فلانة قالت وفلانة عملت وفلانة اتخانقت مع خطيبها وفلانة جوزها ضربها !!!
وغالباً مش هتخرجي منها غير بغيبة ونميمة وبهتان وكلام في أعراض الناس !!!
ويبقى بتضيّعي صيامك وتفرّطي في ثواب كل عباداتك علشان حاجة متستاهلش !!

⤵️⤵️
🌸 ثامناً :
الحيض والنِّفاس في رمضان وقت مستقطع .. ولكن لاشك إن ربنا لا يُشرِّع أمر إلا وهو في صالح عباده ، سواء عرفنا الحكمة من ده أو معرفناش .. فياريت تتفاءلي وبلاش تكتئبي ، وأبشري بحديث النبي صلى الله عليه وسلم :
( إذا مرض العبد أو سافر ، كُتِبَ له مثل ما كان يعمل مُقيماً صَحيحاً ) رواه البخاري 👈👈يعني لو استحضرتي النيّة هتاخدي ثواب كل اللي كنتي بتعمليه قبل كده بفضل الله.

*🌸👈وحتى يا أختي لو كنتي تركتي الصلاة والصيام ، فعندك عبادات تانية كتير جداً متاحة ، زي الذكر والدعاء وقراءة القرآن والصدقة واطعام الطعام وتفطير الصائمين .. وغيرها من أبواب البر و التقوى ..
* فـ أبشــــــــــــــــــــــــــــــــــــــــــــري ..🌷

نكمل  الحلقة القادمة بإذن الله..
🌟🌟🌟🌟🌟
#هل_يفعلها
#حياتي_دعوة