🍥((هل يفعلها ؟)) 🍥✴️أقوى سلسلة للاستعداد لرمضان ✴️
💎🎁كيف تعيش رمضان بحق..!!!!.. 🎁
🎯الحلقه السابعة 🎯😊
قوانين وقواعد مهمة. Important Rule
🔅 * لازم قبل ما تنزل ملعب اللقاء تعرف كويس أوي القواعد والقوانين الخاصة بالحاجة اللي هتعملها .. وإلا هتلاقي واحد بيمسك الكورة بإيديه أو واحد بيضرب واحد وينطرد ويخسر ويرجع يقولك أصل مكنتش أعرف إن كده ممنوع ..!!!!
🔅* وشهر رمضان يا شباب لازم نعرف إن له قواعد وقوانين شديدة و حاسمة ، لازم تعرفها وتدرسها وتحفظها وتحطها قدام عينيك ، علشان تكون بإذن الله مع الفائزين ..
✅* تعالوا مع بعض نشوف بعض قواعد رمضان :
💡 القاعدة الأولى : لا مجال للخسارة !!!
🌻* يعني إيه ؟؟ يعني أي حاجة فيها مكسب وخسارة ..
واللي بيتهزم في أي مباراة ممكن يخسر المركز الأول بس يبقى اسمه خد المركز التاني .. ممكن يخسر في دور الذهاب ويعوّض في دور العودة .. ممكن يعوّض في بطولة تانية وتالتة .. إنما في شهر رمضان مينفعش يكون فيه أي احتمال للخسارة !!
🌻* للدرجة دي ؟؟؟أيوه للدرجة دي وأكتر كمان .. عارفين ليه شباب ؟؟
لأن الخسارة في رمضان = النـار !!
🌻* أيوه يا شباب .. رمضان يعني تحديد مصير .. رمضان يا إما جنة أو نار ! مفيش خيار تالت ! مفيش حاجة وسط !
🍃 ورمضان مرة واحدة في السنة .. مفيش فيه ذهاب وعودة ، مفيش تعويض في رمضان الجزء التاني .. ويَكفِينا دلالة على خطورة الموضوع الحديث الخطير ده :
» عن أبي هريرة * أن النبي * صعد المِنبَر فقال : (آمين آمين آمين)، قيل : يا رسول الله ، إنك صعدت المنبر فقلت : (آمين ، آمين ، آمين) ، فقال النبي * : إن جبريل * أتاني فقال : من أدرك شهر رمضان فلم يُغفَر له ، فدخل النار ، فأبعده الله ، قل آمين ، فقلتُ آمين « صححه الألباني
🌟* العلماء بيقولوا في تفسير " فأبعده الله " عدّة معاني خطيرة !
🌟* العلماء بيقولوا "فأبعده الله" : أي أبعده الله عن الجنة
أو أبعده الله عن رحمته أو أبعده الله في النار في قاع جهنم !
👈*ياترى فيه حد ممكن يستحمل أي عقوبة من دي؟
👈وفي رواية للحديث : »رغم أنف امرئ أدرك رمضان فلم يُغفَر له«
* رغم أنف يعني أنفه هتبقى في التراب والطين .. وده دعاء عليه بلزوم الذل والصغار ! فجدير بأن يُهان و يُحقَّر شأنه عند ربه والعياذ بالله !
👈وفي رواية أخرى : »بُعدًا لِمَن أدرك رمضان فلم يُغفَر له«
*بُعدًا يعني دعاء عليه بالبُعد عن الرحمة والمغفرة والخير
👈وفي رواية أخرى : » شَقِي عبدٌ أدرك رمضان فانسَلَخ منه ولم يُغفَر له «
* شَقِي يعني خاب وخسر .. يعني حياته كلها هتبقى شقاء وتعاسة وهم وغم !!!
🌟كل رواية من الحديث لفظها أشد وأصعب من التاني !
وده علشان الناس تفوق وتعرف إن رمضان مش لعبة !!
🌻* اللي ربنا هيفتحله أبواب الجنة كلها ويسيبها ويرفضها علشان مسلسل ولا بنت ولا أي شهوة كانت ، هيدخل إمتى تاني ؟؟؟
👈لما يكون كل يوم فيه فرصة للعتق والنجاة من النار ويسيبها ، هينجو إمتى تاني ؟؟؟
* فـ اللي هينتهي رمضان وهو لسّه لم يُغفر له وخرج منه خسران فده من الأشقياء ..
وهو ده الخسران المبين !!
👌* يا شباب .. إبعاد اللي مش هيتغفر له فى رمضان فى النار هو خطر بيهدّد كل واحد بيستهين برمضان ومش بيستعد له استعداد حقيقي ..
✅يعني اللي لازم نعرفه إن الفوز بالمغفرة فى الشهر ده مش حاجة هامشية ممكن نستغنى عنها ، بحيث إننا لو حصلنا عليها يبقى خير ، ولو محصلّنهاش مش هنخسر شيء ؛ لأ طبعاً !!
👈ده إنت يا إما هيتغفر لك ، يا إما هتُبعد في النار وهتكون من الخاسرين وأنفك هتبقى في الطين زي ما شوفنا في الأحاديث !!
فلا يوجد أي مجال للخسارة في رمضان ..
🍥 القاعدة التانية : لابد من الأداء الجيد لتحقيق الفوز
🌻* يعني إيه ؟؟ يعني ممكن بعض الفرق يكون مستواها سئ جداً وملعبتش طول الماتش وبرغم كده تفوز، سواء بغلطة حارس مرمى أو خطأ تحكيمي أو كورة طايشة!
وعلشان كده أوقات كتير تلاقيهم بيقولوا "مش مهم الأداء ، المهم النتيجة" !!
والكلام ده طبعاً مينفعش في رمضان بكل المقاييس !
🌻* لازم في رمضان أداء كويس علشان تكون النتيجة كويسة..
مينفعش تبقى قاعد مقضيها طول الشهر ومفكر إن المغفرة هتجيلك لحد عندك !!!
مينفعش تجتهد أول يومين وباقي الشهر ولا إنت هنا !!!
لازم يا حبيب قلبي تأدي كويس وتعمل مجهود من أول دقيقة ولحد صفارة النهاية مع أذان آخر مغرب في الشهر ، لازم تتعب علشان تفوز بجوائز رمضان ..
🌻* ولازم تتيقن إن مفيش مجهود هتعمله بيضيع عند ربنا أبداً!
قال الله تعالى :
فَاسْتَجَابَ لَهُمْ رَبُّهُمْ أَنِّي لَا أُضِيعُ عَمَلَ عَامِلٍ مِّنكُم مِّن ذَكَرٍ أَوْ أُنثَى?
وقال تعالى : * وَمَا كَانَ اللَّهُ لِيُضِيعَ إِيمَانَكُمْ
وقال تعالى : فَمَنْ يَعْمَلْ مِثْقَالَ ذَرَّةٍ خَيْرًا يَرَهُ
⤵️ يتبع بعد ⤵️
👈* فكل اللي هتعمله هتلاقيه هتلاقيه ..
👈* كل سجدة هتسجدها .. كل تسبيحة هتقولها .. كل حرف هتقراه في كتاب الله .. كل دمعة هتنزلها من خشية الله .. هتلاقي كل شئ .. بل هتلاقيه أضعاف أضعاف ما تتخيل .. فاشتغل واجتهد وهات آخـــــــــرك..
👈* وأنا مش عايز أجيبلك نمازج وأمثلة من اجتهاد وعمل الصحابة والتابعين والصالحين ، وأقعد أقولك إن فيه واحد كان بيختم 60 ختمة ، وواحد كان بيقوم الليل بالقرآن كله .....، إلخ .. لأن ده ممكن يعقدّك ويُحبطك ..!
💪أنا عايزك تجتهد على قد طاقتك ومقدرتك إنت .. تجيب آخرك وتبذل أقصى ما مقدرتك وتشتغل بكل قوتك وطاقتك ، وربنا يعلم ما في قلبك إنك نفسك تعمل أكتر من كده ولكن هو ده آخر ما في وسعك ، فيجازيك بنيّتك أضعاف عملك ..
🍥 اجتهد وإنت كلك أمل ورجاء ويقين وحسن ظن في الله إنه بكرمه وفضله ورحمته وجوده هيتقبل منك وهيوفقك ويهديك ويغفرلك ويعتقك من النار ويبلغك ثواب ليلة القدر .. فهو أهل الفضل والجود والكرم ..
نكمل الحلقة القادمة بإذن الله..
🌟🌟🌟🌟🌟
#هل_يفعلها
#حياتي_دعوة
أنت تقرأ
هل يفعلها ؟!
Spiritual* يا ترى يا شباب لو كل واحد فينا حاول يرجع بالذاكرة شويتين ويتأمل في حياته ويشوف كام فرصة كبيرة وسهلة قابلته .. وكانت فرصة واحدة منها كفيلة إنها تغير مسار حياته كلها و تنقله نقلة نوعية للأفضل ، ولكن للأسف الشديد ضيّعها من إيديه بكل كسل واستهتار ولا...
