هل يفعلها ؟!

24

🍥((هل يفعلها ؟)).. اقوي سلسلة للاستعداد لشهر رمضان 🌟

💎🎁كيف تعيش رمضان بحق..!!!!.. 🎁

🎯الحلقه 24 🎯😊

😯هدف عكسي !.. Own Goal !.. الجزء الثاني 2️⃣🥈

👈 تعالو نشوف بعض الحاجات اللي ممكن تكون أهداف عكسية خطير.. وتكون سبب خسارتنا في رمضان علشان ناخد بالنا منها ونحاول نبعد عنها ونتجنبها نهائياً بإذن الله :

1️⃣وسوء الخلق والتعامل في رمضان !!🌻

👈تلاقي الواحد منهم وهو صايم مكشّر وقرفان وعمّال ينفخ ، ومن غير ما حد يلمسه تلاقيه شايط وغضبان ، ويتعصب ويتنرفز ويتخانق لأتفه سبب ، وكأن الصيام ده حاجه بتشيط الأعصاب و بيبوظ الأخلاق و بيتسبب في سوء المعاملات عياذاً بالله !! والناس تقولك "يا عم سبيه معلش أصله صايم" !!!!!*

👈صيام إيه بس ؟؟؟؟؟!! الصيام تقوى لله وحسن خلق .. الصيام صبر وتحكم في النفس وكظم غيظ وعفو وتسامح وأدب وذوق وبِرّ ورحمة وعطف واحترام  ..

🔅فـ واحدة واحدة كده عوّد نفسك على حُسن الخلق ، وخلّيك دايماً فاكر حديث النبي صلى الله عليه وسلم :(ما من شيء أثقل في ميزان المؤمن يوم القيامة من خــــــــلق حســـــــــن، وإن الله تعالى يبغض الفاحش البذيء)* صححه الألباني.

2️⃣ تعطيل مصالح الناس في رمضان !!🌻

👌 المفروض إن مقدار العمل الوظيفي بيبقى قليل في رمضان ، وكمان الحكومات بتقلّل عدد ساعات العمل ، ومع ذلك بنلاقي معظم الموظفين بيروحوا الشغل متأخر بحجّة الصيام ، ويزوّغوا من الشغل قبل معادهم بحجّة الصيام ، واللي بينام أثناء الشغل ويعطل مصالح الناس واللي مش عايز يشتغل أصلاً بحجّة إنه صايم وتعبان ويقولك معلش فوت علينا يا افندي بعد رمضان !!

🌟يا أخي لو الصيام بيتعبك جامد أوي كده ومش بيخليك قادر تمسك القلم وتخلّص مصالح الناس يبقى خد أجازة وأقعد في البيت ، إنما متفتكرش إن الصيام هيكون مُبرر وحجّة لما ربنا يحاسبك ويسألك عن الضرر والتعب والمشاكل اللي سببتها للناس لأنك عايز تنام وترتاح !!

👈 فـ اتق الله .. وأتْقِن عملك ، وحلّل الفلوس اللي هتاخدها آخر الشهر !!     
 👈 اتق الله ويسّر على الناس وانجز لهم مصالحهم ..

👈وخد النيّة الجميلة دي وخلّيها دافع لك مع كل واحد بتساعده أثناء شغلك ، قال النبي صلى الله عليه وسلم : (من نَفَّسَ عن مؤمن كُربة من كُرب الدنيا ، نَفَّسَ الله عنه كُربة من كُرب يوم القيامة ، ومن يَسّر على مُعسِر ، يَسّر الله عليه في الدنيا والآخرة ، ومن سَتر مؤمناً ، سَتره الله في الدنيا والآخرة ، والله في عون العبد ما كان العبد في عون أخيه )* رواه مسلم

3️⃣ الخفافيش في رمضان !!🌻

 👈 تلاقي الواحد منهم بمجرد دخول رمضان تنقلب حياته رأسًا على عقب ، فيتحول إلى (خُفّاش) ليله نهار ونهاره ليل !! رمضان بالنسبة له شهر السهر والدلع والترفيه والفرفشة !!