هل يفعلها ؟!

16

🍥((هل يفعلها ؟))أقوى سلسلة للاستعداد لرمضان🌙

🎁كيف تعيش رمضان بحق..!!!!.. 🎁

🎯الحلقه 16 🎯😊

👌🥇التخطيط فنّ ومهارة !

*👈 يبقى اتفقنا إننا إن شاء الله هنبدأ من دلوقتي نستعد ..
ومحدش يقول معنديش وقت .. نظّم وقتك هتلاقيه اتسع وبقى عندك وقت متاح ..
كل واحد يقعد مع نفسه أو يدخل على النت ويشوف جدول استعداد لرمضان مناسب له ولظروف شغله ..

* 🔅حط خططك لرمضان ،
🔅ارســــــم للجاي في رمضــان ،
🔅ظبط حال قلبك في رمضان ،
🔅ظبـــــــط عــلاقـاتـــــك ،علاقتك بالله ربك ،علاقتك بأهلك ، علاقتك بالناس ،
نظرتك للدنيا ، ..... إلخ ..

* 🔅حط خططك لرمضان .. لأن الخطط هتنظم الوقت ، وهتقلل الجهد ، ولو فيه أي خلل أو مشكلة هتوضحهالك ، وفي النهاية هترسم طريق النجاح ..
فلابد من التخطيط الصح لرمضان .. وإلا هيضيع منا بكل بساطة زي كل سنة ..

👈وعلشان كده قالوا في الحكم :
إما التخطيط ، و إما التخليط والتخبيط !
* وإذا كان التخطيط شرط لازم في كل أمر يريد الانسان إنه ينجح فيه ، فـأساس التخطيط هو تحديد الأهداف المُرادة بدقّة وعناية، وبعد كده ننتقل لمرحلة التخطيط لكيفية تحقيق الأهداف دي ..

*📚 يعني كل مشروع ناجح لابد من توافر شرطان أساسيان فيه :

B أهداف مُحدّدة بعناية ..
C خطة واضحة المعالم لتحقيق الأهداف دي ..

* 👌ورمضان بالنسبة لنا هو مشروع السنة ، بل فرصة ومشروع العمر، ولابد من حُسن التخطيط علشان ننجح فيه ونقدر نستغلّه بأفضل صورة ..
لأن اللي هيضيع منه رمضان ويخسره ، هيكون بسبب إما سوء التخطيط أو عدم التخطيط له من الأصل !

🥇والأمور المطلوبة مننا علشان ننجح في التخطيط لرمضان هي :

🌻أولا: وضوح الأهداف:
يعني لازم الأهداف اللي عايز تحققها تكون واضحة ومحددة ومفيهاش غموض ، يعني متقولش أنا هقرأ قرآن كتير، أو هصلّي كتير، أو هتصدق كتير ...
ولكن لازم تحدد عدد الأجزاء اللي هتقرأها ، والوقت اللي هتقرأها فيه، والكَمّ اللي هتقرأه في كل فترة ، وكذلك عدد الركعات ومواعيدها بعد الظهر أو بين المغرب والعشاء أو في الليل، وكم ركعة هتصلّيها في كل وقت منها، وحتى الصدقة تكون محدد اللي هتتصدق به كل يوم ، أو على مدار الشهر ، ومتسيبش الموضوع للظروف والأحوال..

🌻ثانيا: إمكانية التحقيق: 
يعني متحطش أهداف كبيرة أوي ومُبالغ فيها ، ومش متناسبة مع حالك وشغلك ووقت فراغك وظروف أسرتك ، متقولش مثلاً هختم القرآن كل يوم !!
ده هيخلّي تحقيق الأهداف مستحيل !! وبالتالي هتعجز عن تحقيقها أو عن تحقيق بعضها فيجيلك إحباط وتلاقي نفسك سيبت كل حاجة !

🌻ثالثا: أن تكون أهدافاً مناسبة:
يعني حاجات تستحق أنها تُسمّى أهداف ، يعني مش حاجة سهلة جداً مفيش طموح فيها ولا جهد ..! ولا تكون حاجة قليلة وبسيطة لا تتناسب مع عظمة الشهر ومقامه ..!
وإنما شيء عالي يرفعك في أعلى الدرجات والمستوى الإيماني ..

👈يعني مثلاً متقولش هدفي أصلّي الفروض .. بل تقول هدفي أحافظ على تكبيرة الاحرام طول الشهر علشان آخد براءة من النار ومن النفاق بإذن الله ..

🌻رابعا: وضع الخطط اللازمة لتطبيق الأهداف:
ولابد من توفر أساسيات في الخطط الموضوعة .. منها:

🌸أـ مناسبة الخطة للهدف:

من المعروف إن أهداف الناس مختلفة ، ومقاصد رمضان كتير جداً ، وثمراته متنوعة وغزيرة ، وعلشان كده بتختلف الأهداف على حسب حاجة الإنسان لها أو إرادته ومطلوبه من رمضان ..
يعني اللي عايز التوبة والمغفرة ، مش زي اللي هدفه العتق من النار، مش زي اللي عايز يحفظ القرآن أو يتدبره، إلخ .. كل حاجة من دول المفروض يكون لها خطة غير التانية .. فخطط كل صنف لازم تكون متناسبة مع مقصده ومراده ..

🌸ب ـ إمكانية التطبيق:

فزي ما الهدف لازم يكون في المقدرة والاستطاعة ،  فكذلك الخطة الموضوعة لازم تكون خطة في متناول إيدك وتقدر تترجمها على أرض الواقع ؛ وإلا كانت خيال وأحلام .. فمثلاً الإنسان اللي عايز يحفظ قرآن ولكنه بطيء في الحفظ لازم يكون هدفه متناسبا مع حفظه ، ميقولش هحفظ كل يوم جزء !!
ثم الوقت اللي هيحدده للحفظ والمراجعة لازم يكون مناسب لمقدار الحفظ .. ميقولش مثلاً هحفظ وأراجع في 10 دقايق !!

🌸ج ـ الجدية في التنفيذ:

لابد من المراقبة لمَدَى تطبيق الخطط ، ثم المحاسبة، ثم المعاتبة، ثم المعاقبة ..
يعني لازم تراقب نفسك وتشوف إنت حققت إيه كل شوية علشان تعرف مدى التزامك ، ولو لقيت تقصير تحاسب نفسك عليه، وتعوّضه إن أمكن ، وتعاتب نفسك على التقصير والتفريط  .. ولو لقيت نفسك بتتمادى في التقصير ،        تحط عقوبات تلزمك بالانضباط والالتزام بالخطة الموضوعة ..

* 👈وعلشان تعرف تستمر في تنفيذ أي خطة .. حاول تبدأ خطوة خطوة ، وتخلّي كمية الجهد في كل هدف تزيد بالتدريج ..
👈 التــــدريج أمــــــــر مهــــــــم جــــــداً ..
وأول ما تحس بالتعود عليها .. ابتدي زود الكمً أو الكيف لحد ما توصل لغايتك ومرادك ..

⤵️⤵️
* 👈وأي حد بينام كتييييير ، المفروض من دلوقتي من قبل رمضان يبدأ يظبط مواعيد نومه ، ويقلل عدد ساعات النوم تدريجياً لحد ما يوصل للمطلوب .. نظّم مواعيد نومك من دلوقتي وإلا هتلاقي الدنيا في رمضان كلها ملخبطة معاك !

نكمل  الحلقة القادمة بإذن الله..
🌟🌟🌟🌟🌟
#هل_يفعلها
#حياتي_دعوة