نهاية الاستفزازية

رضا

كتلهم والله هاي مايا المسودنه لان اخذت كبايتها نكلبت جلب وبيبي تتعهدلها بالعوجيه متت ضحك

وخطيه مره خالو استحت وهي تكول جاهله اخذها على كد عقلها

وخالي يكول يلا همزين خلتلك علامه ملكيه يعني بعد انت صرت منه وبينه

كتله خالي هاي بنت اخوك حرام والله تنام بغرفه لازم تربطوها بالباب ولا حرامي يفوت للمنطقه بعد

ضلو يضحكون وبيبي تكول غير اخوها الجبير انت وتشاقيك

كتله بيبي اكول ليش اخترعو لقاح الجلاب تالي من وره شقاها

سهى ضلت تضحك وهي تخلي الجاي وتكول خطيةة هاي عبالها انت وسام وتتحمل جانت قبل هي وسام تصير مكافش من الشعر ويكعدون عمامي يفاكوكهم كوه

ضحك خالو رضا وحجالي مره على عركتها هي وسام وشون لازمه شعره بيدها ومتقبل تهده

بيبي ضحكت وكالت هو وسام ما يخلص منها تاليها ياخذها ياخذها عود من يزوجون يعقلون ..

هو الصراحه اني هم جنت اضحك بس وكفت ضحك وكعدت افكر واكول يعني وسام خالي عينه على مايا اكول ليش الجلب مكلي البارحة

كعدت اكل بسكوت هو الصراحه مو على شي بس حزت بنفسي يعني عود ليش مكال

كملت اكل خالي كال انو يروح للسوك جلبت بي كتله رجلي على رجلك اني هم ملان واريد اطلع خوما اضل محبوس بالبيت

بيبي كالت خاف تكعد امك وما تلكاك ويضل بالها

كتلها كليلها ويه رضا حارس شخصي

ضربني خالي على ركبتي وهو يكول ابن النعال شو انت اضرب من وسام شنو حارس والله لو يلزموك ويدكوك كدامي ولا افزعلك

كتله والله خالي تضل لعد بدون مرسال للاردنيه خو انت بعد تعرف اني اذا متت منو يجيبلك اخبار

ضل يضحك وهو يكول يلا لعد كوم كوم قبل متكعد امك وتلزمنه سيطره..

بيبي كالت خايب رضيو بس لا حاط عينك على وحيده مو من ثوبنه

صاح خالي الله واكبر حصرة نشاقه بحجايةة

بيبي كالتله جاا ليش مضرب عن العرس سالفتك مو خالية يبن بطني احلف عليك

خالي بس راد يفلت طلعنه بسرعه رحنه تسوكنه وضحكنه وغيرنه جو

رجعنا فتحلنه احمد الباب وشفت سهى تغسل بالطرمه ابتسمتلها لان هي هم باوعت عليه وابتسمت ودنكت