نهاية الاستفزازية

جفجير

امي لحكتني واني ختلت بالجهه الثانيه من الغرفه واصيح اكعد المفستق اكعد احمي حلاوتنه يردون ياكلوها

خطيه وسام طفر وهو كلشي ممفتهم ولزم امي ويكلها ها عمه ها

وامي تكول هاي اذا ما ادبك جسمها ما ترتاح اطلعي عوفي الولد نايمين اني من شفت وسام لازم امي دفرت برجلي ميار وكتله دكعد رحمه للكعبه صرت مثل بيبيتك مدافع فوك راسك وما تسمع

هو فز بسرعه وهو يصيح شكو يباوع عليه وعلى وسام اليضحك ولازم امي وامي الي تريد تفلت نفسها من وسام وتجيني واني الي لازمه الصينيه تكول عبالك محرره القدس

شلت الصينيه وخليته بيده وكتله امانه لا تاكل بس ثنين وضمها يمك لا تنطيها الاحد هو كلشي ممفتهم مثل الطرن عفته وكمت اشبخ حتى اطلع من الغرفه

ووسام يصيح هاااا ختلتي اهدها كتله ايي هدها قفلت الباب عاد شويه واجتي ادك الباب كسرته تكسر بالجفجير وهي

تكول ولج ابوج اذا كعد والله اخلي يجنزج جنازه
اكلها يمه روحي والله ما اسويها بعد وكمت اصيح بصوت عالي عمه رانيا عمه نسرين عليجن الله صيحنها بعد ما اسويها

خطيه عمتي رانيا كامت تصيح من جوه على امي بقت امي ادردم عليه شويه ونزلت بقيت اني بالغرفه صحت ميار لا تاكل البسبوسه سم ان شاء الله بكلبك اذا اكلت اكثر من ثنين وان شاء الله تنشل اذا انطيت الوسام

عاد سمعت وسام يكول شوف هايه غير اكلناها وخلصناها ضلي انتي ضلي بالغرفه كمت اكمز من العصبيه واني اعيط وسااام الحقيرررر والقران عمتي سوتها الي لا تاكل والكعبةة اتعارك وياك وازاعلك..

شويه وسمعت صوت قريب من الباب شو دفتحي الباب هسه اني شفتهمت اني عود ابويه مشردني البيت خالي من الموت ما يدري بيه ساعه الساعه انجلط واموت .

من حجه هيج صدوك ضحكني فوكفت يم الباب لازمه المفتاح واكله امي نزلت عليك الله احجي الصدوك

كال اي نزلت افتحي الباب
كلت خاف يجذب وبس افتح الباب امي تهد فكتله عليك الله خوما ناصبيلي فخ

يمكن هو ضحك لان بين من صوته وهو يكول دفتحي هو انتي ينخاف يوكع بفخج

سمعت صوت وسام يكول لا تفتحين تره متفق ويه امج كمت اصيح ميار الجلب ليش تجذب كال ولج ثوله وسام الي يجذب

وسام يكول دير بالج اني حذرتج
عاد ميار كال تفتحين لو انطي الصينيه الوسام وضلي الطمي وحدج بالغرفه

اني كلت هي كتله اكبر وانساها كلشي الا الصينيه

فتحت الباب وصدوك طلع وسام جذب شفته واكف ولازم الصينيه ويباوعلي وعيونه منفوخه مال واحد توه كاعد من النوم