نهاية الاستفزازية

ملاك

ميار : عمي احب بت خالي والبارحة قررو يزوجوني اختها
حجيتها والغصه بكلبي وما اعرف ليش حجيتها بس ردت احد يسمعني ويكلي الي راح اسوي صح لو غلط
العم : يبويه الرجال ما ينجبر اذا البت ما تريدك شلك عد خطيتها

ميار : هم ما جبروني ومحد يكدر يجبرني بس صديقي واخويه وابن خالي يحبها وهم رايدها واني ادري هي تحبني بس كلبي ما ينطيني اكسر عضيدي وهم ادري اذا كتلهم ما اريد اختها ما ينطونياها لان ما ترهم بعد
العم : اخخخخ وابن خالك ليش ما خاف الله بكلبك دامك تحبها وهي تحبك

ميار : ابن خالي انسان طيب وعلى نيته ميدري احبها
العم : دام تكول طيب صار الولد مثل ما انت فكرت بي هو هم رايح يفكر بيك ومادامها ما تحبه هي ليش يعطل دربها

ميار : والله يا عمي لو الموضوع يرهم جان كتله هو طيب بس ارعن وطايش على الاقل يجوز هي عدها امل ما تاخذه هسه ومتريده اذا كتله ما استبعد يحس نفسه نغدر ويروح ياخذها غصبا ما عليها وهم اساسا رابين سويه

حسيت الرجال احتار هو ناقص واني اجيت ادور ازيدها
العم : بزمناتي هم حبيت بنت جيرانه كتلت روحي عليها اكعد من ال٦ الصبح الزم ركن حتى بس اشوفها كدامي تروح للمدرسة وهم صحت لو هي لو ما اريد انا ما حجيت وياها ولا سولفيت بس جانت هي من تشوفني اتبسم واني على هالتبسم ينشل حالي شل

وضال اتامل اهلنه كبل ما عدهم البنية بالمدرسة احنه بابة عرب نسوانه تكعد من ٥ الصبح تجيك التنور وتحلب الهايشه وتحش وكلشي تسوي وانا الي تعلك بيها كلبي بت حضر لا عيشتها تناسب عيشتي ولا عيشتي تناسبها كتلت روحي عليها بس ربك ما كاتبها والقسمة من تريد تصير تصير غصبا على اليرضى والمايرضى هم

اخذت بت عمي والحمد الله هسه ابن ابني بكدك يبويه الحياه ما توكف لازم تستمر ادري هسه تستثكل حجاياتي وتضن محد راح يفهمك وتكدر خاطرك مني بس وانا عمك هم مثلك استثكلت حجايات الي كالو تنساها وانهضمت منهن

بس شوفه عينك صارت من الماضي ما اجذب عليك واكللك تنساها تضل دومها حسرة بكلبك يمكن اني اهون منك لان اني ما شفتها بعد انت راح تصير من نسابتك بس الي يرضي الله الله يرضي والي يخلي مصلحة غيرة على نفسة الله ينطي ضعف الي يريدة
( تذكرو هالعبارة )

حسيت حجاياته خففت عني هوايه هو شي صعب ويوجع بس رغم هذا اتوجع بس اني اهون مما اجر ورايه هوايه ناس ورضيت بالامر الواقع وجنت منتظر العوض من الله مثل مكال الرجال وصلني خطيه للشارع وما قبل راحت للكراج ذب سيارته ونزل واصر يجي وياي

كال يريد يزور علي ابن ابي طالب مكدرت امنعه حسيت الله دزلي هالرجال منقذ طول الطريق وهو يحجي وياي ويوعيني اني جنت محتاج ابويه بس هو ماكو بحيث صرت ادور بالناس احد ياخذ بيدي للطريق الصح وحسيت الله اول مجازاه جازاني بيها هو هالرجال بقى ويايه الحد ما وصلنه وكفني وراح جاب لفات مال كص واجه وهو يكول اكل بعد عمك هذا زاد امير المؤمنين يهدي على الروح