ارواح جهنميه

الحـلقـه الـرابـعه 4

#أرواح_جـهـنـمـيـة

الـحـلـقـه الـرابـعـه 4

🔥الـكـاتـبـه صـفـاء رجـب🔥.

سفيان فتح عيونه بصدمه: جديات؟؟ وعلاش؟
عائشه ارتبكت: ياسفيان انت عارف جدي حقير
سفيان قرب منها: بس عارفته انه يحبني ومش حيرفضلي طلب صاح؟
عائشه ابتسمت: اهممم
سفيان سمع صوت: خشي جوا وتوا نحكو بعدين
عدت عائشه وكانت فرحانه انها بتاخذ ولد عمها وفي نفس الوقت حبها❤.

ـــــــــــــــــــــــــــــــــــــــــــــــــــــــ

فاتو يومين وجا اليوم المنتظر

الساعه 6 في الفجر

حور تتثاوب: نعسانه
عمر راقيتله: محد قالك امشي
حور: بنمشو معاهم في نفس السياره؟
عمر: لالا برواحنا في سيارتي
حور: احسن عشان نرقد
رمزي يقاطعهم: ركبتو دبشكم؟
عمر: اها ايمتا بتطلعو!
رمزي: توا هيا...
وطلعو وركبو سيارتهم

ـــــــــــــــــــــــــــــــــــــــــــــــــــــــ

الساعه 10 في الصبح

مبروكه تصب في الشاهي لسعيد
سعيد: وين سند ويوسف
غزاله استغربت: مرقدين علاش؟
سعيد: نوضيهم لي نبيهم في شغل
غزاله: تمام ياعمي
مبروكه: كان تلاحظ ياحاج معد التمينا بلكل قعدنا من الجمعه للجمعه
سعيد يفكر: والله صدقتي
مبروكه: قلت نلتمو ونطلعو شي يوم يكون النهار فيه دافي وسمح
سعيد ببرود: ان شاءالله خير

....

ابتسام شهقت بصوت واطي: هيي احلفي؟ يوم عطيب محمود مره وحده
حنين: شوفي يمي نا حكيتلك بس را تطلع منك
ابتسام تفكر: هالمعفنه هذ سراقه الرجاجيل
حنين: نا خاشه نرقد.. وعدت
ابتسام قعدت تفكر كيف تحكي لراجلها عبدالرحمن

ـــــــــــــــــــــــــــــــــــــــــــــــــــــــ

فات الوقت وجت الساعه 10 في الليل

حور: وصلنا ولا لا؟
عمر بتعب: اها اول واخر مره نمشي للغرب يرا شنو هذا عليك طريق طويله
حور تتهزا: بخيل لدرجه ماتبيش تحط فلوسك في طياره
عمر يفكر: يرا ازح ماخطرتش علي وانتي اخت العازه ماتقوليها الا بعد تصير
حور تضحك: ماهو حمار بسلامتك
عمر يشوف لسياره خاله رمزي: يرا هذا وين ماشي.. ورفع التلفون
رمزي: هها؟
عمر: وين ماشي يرا الفندق مش من هنا؟
رمزي ارتبك: لالا في اصحابن لي هنا قالو والله ماتقعد في فندق وحوشنا قاعد
عمر رقيتله: يراا.... لنقنكك.... 
رمزي: يا صايع معش تسب خالك
عمر سكر في وجه
حور: نا ماجابني شي غير المول الي يبي يفتح الاسبوع الجاي
عمر: اها اكيد حيكون زحمه يرا لي كم يوم نشوف في الاعلانات عليه
حور تحمست: ينعليي اححسن جينا اصدافه
عمر: بايخه يرا الغرب شوفي مفيهش اي جو يعني كلها صحراء
حور: مفيش خخير من الجبل وحياتك ريحها ونسمتها معندش حد
عمر وحور قعدو يحكو لعند شافو سياره خالهم وقفت على حوش كبير
عمر: ماتنزليش راجي نرن عليه.. ورفع تلفونه
رمزي: اسمع يوو
عمر: ها؟
رمزي: ماتنزلوش نين نكلمكم.. وخش للحوش
عمر ببرود سكر في وجه وقعد يراقب في الحوش
عمر: شوفي الحواشين الي من عند اجنابه نفس التفصيله وواضح انها تفصيله قديمه بلكل
حور: ازعما يقربو لبعضهم؟
عمر: مانضنيش بلكي هذوم من العرب اللوله يحبو يحافظو على شكل حواشينهم
حور: لما نتزوج حنخلي حوشي قصر
عمر بهزوه: كان خليتك
حور قلبت عيونها... وقعدو عما يقارب نص ساعه برا 
حور: الحيوان الي اسمه خالي كنه هك معش دورنا را نعسانه
عمر يتهزا: وااو كنتي تسوقي الطريق كلها تعبناك
حور تضحك: كنك ححيوان
عمر شاف تلفونه يرن: هها كنك؟
رمزي: تعال وجيب اختك معاك
عمر: وعليش تجي حور معاي
رمزي: جيبها بس وتعال... وسكر
عمر: يرا قلبي مش مريحني من خالك هذ
حور: شن قالك؟
عمر فتح باب السياره: هيا انزلي.. ونزل
حور لحقاته وقعدت تسقم في وشاحها وشافت انه عمر خش قبلها ولحقاته تجري
رمزي استقبلهم فم الباب: خشو خشو
عمر شافله بقرف وخش للمربوعه ويشوف قدامه عرم شباب وشياب وفي وسطهم عجوز ووجوهم صفر مايتفسروش
عمر استغرب: السلام عليكم
الكل: وعليكم السلام
حور خشت وتشوف عمر يأشرلها بمعنى اطلعي
رمزي: كنك انت؟
عمر: يرا تبيها تقعد في وسط رجاله؟
رمزي: لا عادي خليها تخش
عمر رقيتله: تعالي قعمزي تلاي.. وقعمز
حور جت بتقعمز وتطيح عينها على واحد كبير في العمر انصدمت وقعدت تشبه عليه وتشوف فيه يشوفلها وعيونه حمر
عمر يهمس وراقيتله: قعمزيييي
حور قعمزت وقلبت عيونها وتهمس: يرا ايزي يابيبي كنك هك؟
عمر كان يراجي فيهم يحكو اي حاجه
حور قعدت تشوف لنفس الراجل وفتحت تلفونها وخشت على الاستديو وتدور
عمر شافلها بأنتباه: فيش اديري؟
حور تهمس: الراجل الي لابس جلابيه بيضاء حقيته؟
عمر: اها كنه؟
حور: تقريبا مار علي وان شاءالله مايخيبنيش ظني
عمر قعد يشوفله وساكت
رمزي: ءحم اليوم ياعويل بتقعدو انتو هن ونا وحسن وحسين بنمشو
عمر استغرب: وعليش؟
حور رطزت بفرحه: اههوو مش قلتها لك
عمر انحرج من لطقتها وقعد يتحلف فيها
حور صبت من مكانها وفي يدها التلفون وقربت من الراجل
حور مبتسمه: خير ياعمي كيف حالك
الراجل عيونه حمر وصوته مبحوح: الحمدلله وانتي
حور مبتسمه: الحمدلله.. معليش بنسألكشن اسمك؟
الراجل خانوه دموعه:عبدالرحمن
حور استغرب ورفعت التلفون: انت الي في الصوره هذي ولا نا تهيالي
عبدالرحمن عيونه تعبو دموع: اهها
حور لاحظت عليه: يعني تعرف خالي حمزه؟
عبدالرحمن هز براسه
حور ابتسمت: بيش تعرفه صاحبك ولا شنو؟
عبدالرحمن معش تحمل حط يده على راسه ونزل راسه والدموع ينزلو
حور وجعها تحسابه يبكي على خالها... ويقاطع تفكيرها صوت عمر
عمر: تعالي هن
جت حور قعمزت جنبه وقعدت ساكته وتشوف لعبدالرحمن
رمزي بمكر: واو على عرق الحنيه مشاءالله البنت عرفت بوها
حور فتحت عيونها وعيطت: ككيففف؟
عمر انصدم وقعد يشوفله: فيش تخرط ازحح؟
رمزي: جبتكم عشان تتعرفو على بوكم وهله قلت حرام ماشافوكمش بلكل
عمر ابتسم بهزوه وصبا: وححقربي مايفكك مني راجل.. وهجم عليه وخشو بينهم يحزو اما حور قعدت تشوف للراجل الي شافاته مع خالها وطلع بوها💔.
عمر داهش: والله نقتلك يا... نهايتك على يدي
رمزي داهش: امشي يانعن...
عمر شاف لحسن وحسين: دايرين ارواحكم خوتي امشي تفو ععليكم.. وقعد يسب
حسين يشوفلهم بشماته: هيا نمشو نحنا... ناقصتكم حاجه
عمر قعمز ويشوفله بهزوه: تعرفو وربي وربي وربي نخليكم تجوني وتحبو على كرعي على الموقف الحقير الي طلع منكم
حسن يشوفلهم وضميره يأنب فيه
حسين: اعلى مافي خيلك اركبه
عمر يضحك: حتى نا راكبه وحطو في بالكم نا عمر تحسابوني هبل بنصدق انكم بتدهوروني؟ولا اخره على حسابكم؟ وحياتكم مادرت الا الي تعلكم
رمزي منصدم في كلامه: هيا اطلعو اطلعو.. وطلعو حسن وحسين ورمزي وكانو يفكرو في كلام عمر ويتناقشو فيه
عمر رفع عيونه في حور الي منزله راسها: هيا انتي صبي
حور صبت ومسكت في يد عمر وكانت شوي وتبكي
عمر جا بيطلع ويشوف قدامه شاب قاعد على الباب
عمر: حول يرا
الشاب يشوفله ولا كأنه يحكي معاه
عمر جا بيحكي ويقاطعه صوت وراه
سعيد بصوت حاكم: قعمزو وتوا نتفاهمو
عمر بهزوه: ومن تقعد؟
سعيد: جدك
عمر بهزوه: اهها عمر عبدالرحمن سعيد
عبدالرحمن يشوفلهم وعيونه دموع مش مصدق انه دفاتر زمان ردن انفتحن وانه تلاقا مع ضناه💔.
عمر: اختصر بسرعه لانه جاي مسافر وتعبان وماعنديش نيه نناقشكم بلكل
حور تشوفلهم وساكته وملامح الصدمه على وجها
سعيد ببرود: قتلك قعمز نا
عمر قعمز وقعمزت جنبه حور
عمر: بسرعه ماعنديش وقت
سعيد: سند امشي كلم هل الحوش
سند صبا وخش جوا وقعد دقائق وخش وكانو وراه بنات الحوش كلهن وامه وصبايا اعمامه وكانو مش فاهمين شي
سعيد: قعمزن يابنياتي
قعمزن البنات وكلهن يشوفن لعمر وحور
رغد تهمس: ووكك من السمح ههذا؟
ساره: ينعليي منه يهبل
يوسف شافلهم ويتحلف فيهن
عمر منزل راسه: تفضل اخرط شن تبي
سعيد انصدم من اسلوبه: يافرخ احترم نفسك ماتحكيش معاي هك
عمر ببرود ونفس نظره سعيد: ماهو كان تحكي بسرعه عشان تقعد هذي اول واخر مره نتلاقو فيها
سعيد تنهد وخذا نفس وعرف انه عمر يبي يستفزه
سعيد ببرود: جمعتكم هنا عشان نحكيلكم شن صار
ابتسام: ان شاءالله خير ياعمي
سعيد: والله شن نقولك عد حتى الخبر هذا يخصك انتي بالذات
ابتسام: ينعلي احكي ياعمي
سعيد: الشاب والبنت عمر وحور توأم ويقعدو عيال عبدالرحمن
كلهن شقهن وانصدمن
ابتسام شهقت: ينعلييي كيفف؟ من وراي ياعبدالرحمن
حور ماسكه ضحكتها وتهمس لعمر: حي عليك ياعبدالرحمن ليلتك سوده
عمر ابتسم بضحكه وكلهم شافولهم
حنين بهزوه: قصدكم هذم خوتي؟
حور: مانتشرفش نكون اختك
عمر شافلها وكأنه يقوللها نجكلي مسحتي كبدي
حنين سكتت وزمطتها
سعيد: مش عارف شن ندير الصراحه كان عندي علم بيهم بس من ساعه ماجو على الدنيا مش شايفهم
حور بأستغراب: باه احكيلي من البدايه جديات نحكي لانه مش فاهمه شي
سعيد ببرود: كان ولدي الله يسامحه يبي وحده شرقاويه بس نا ماوافقتش زوجته غصبن عنه لوحده تقربلنا وتقعد ام سفيان وسندس
سفيان وسندس شافو لبعضهم ومنصدمين بكلام جدهم 💔.
حور بحماس: وباه كمل؟
سعيد: بعد سنين نسو بعضهم والبنت تزوجت وولدي تزوج وكل واحد قعد عنده عيال نين جا يوم وتوفت مراته الله يرحمها وهي تطلقت
عمر ببرود: يرا تقول نشوف في فيلم هندي اختصر بسرعه
سعيد: مش ميت عشان  نحكيلك
عمر ولا كأنه يسمع فيه
سعيد: بعد فتره تلاقو وتزوجو بدون حتى مانعرفها وقعدو مع بعضهم سنه بالضبط ويوم الي ماتت فيه امكم تقريبا اسمها شروق عرفت انهم تزوجو
حور: بس ماما توفت لما جابتنا
سعيد: ماهو نفس اليوم الي عرفت انها ماتت وجايبه توأم
حور: وباه شن درت انت؟
سعيد: كتمت الموضوع بيني وبينه حتى جديدتك مش عارفتها
عمر: ماعندش حن يا حاج
سعيد قلب عيونه: المهم سكرت على الموضوع وخالكم حمزه خذاكم وقالي مانبيكمش نتشغلو عليهم بلكل وقعد ولي امركم هو
حور تفكر بعمق وبحزن: تعرف لو نقولك انه ماكنش نعرفو شي عليكم وتمنيت ماعرفت شي لعند توا
كلهم انصدمو من كلامها
عمر صبا: المهم هيا تشرفت بيكم ان شاءالله اول واخر مره.. وجا بيطلع
سعيد أشر لسفيان
سفيان جا قدام عمر: قعمز يا راجل ومايصير الا الخير
عمر شافله: حول غادي يرا مانبيش الخير الي منكم
عبدالرحمن بصوت مبحوح: خليكم هن ماعندكمش وين تقعدو
عمر ألتفت وقعد يشوفله بنظرات استحقار
عبدالرحمن نزل راسه وسكت وكان قلبه يوجع فيه متأثر 💔.
حور تقلب في التلفون: تعرف سلم اختك تعرف تتصرف
عمر: لقيتي فندق؟
حور: حتي الحجز حجزت
عمر: هيا اطلعي
سعيد يقاطعهم: تستقر اموركم بس
عمر شافله: كيف؟
سعيد: تستقر اموركم في الغرب تقدرو تروحو
عمر يشوفله: واضح انك من النوعيه الي تحب كلامك يمشي على الناس
سعيد ابتسم: تقدر تقول هك
عمر ضحك بهزوه وكان على شوي ويقتله
سعيد: مبروكه
مبروكه ترجف: نعم
سعيد: فضيلهم الدار الي جنب الحمام توا
مبروكه: هيا يابنات معاي..ومشن معاها ابتهال ورغد وساره
عمر قعمز جنب حور ويتناقشو بهمس
عمر: مش قلتها لك خالك عارفه
حور: اخر مره تتبع راياتي السود فاهم
عمر اصلا حيوانه انتي
حور: وتوا شن بيصير فينا
عمر تنهد: مش عارف نا قلت نقعدو هنا لانه مش عارفين شي تخيلي يقعد الفندق مش تمام ولا تصير حاجه اخره ونا جديات منقدرش نتحمل اخره
حور عيونها على عبدالرحمن: من يقول انه هذا بونا
عمر بهزوه: من يقول انه اصلنا غرباوي
حور تضحك: صدمه صاح؟
عمر: الحمدلله جبت معاي كل حاجه
حور: عدي نزل الشناطي كلهن اصحا ينسرقن
عمر: تمام.. وطلع برا والعيون كلهن عليه
ابتسام تبكي: ياعمي شن يصير فيا توا
عبدالرحمن: تي بري ملحي ماناقص غير انتي... وبعد ثواني انتبه انه حور قاعده وانصدمو كلهم من معاملته لأبتسام الي كانت شايخه عليه
ابتسام تشوفله وبصدمه: بنمشي لحوش هلي
سعيد ببرود: نا مش ماسك حد من يده الباب يفوت جمل
ابتسام كانت متوقعه ردت فعل سعيد بس مزالت منصدمه في عبدالرحمن
حنين: لا ماما مستحيل تسيب الحوش
سعيد: بجوكم
حور مسكت التلفون وقعدت تقلب فيه
عمر خش وماسك شنطتين: يرا تعالي ساعديني
حور: باه.. وجت بتصبي وتشوف سفيان صبا وقعد يساعد فيه استغربت وقعمزت
سعيد كان يشوف للتلفون الي في يدها وعيونه حمر
سعيد: تلفونك هذا؟
حور استغربت: اها
سعيد: اهممم.. وكلهم عرفو انه راقيتله من تلفون حور
بعد دقائق خش عمر ووراه سفيان
عمر: منور تعبتك
سفيان ابتسم: لا عادي
عمر قعمز جنب حور وكان نعسان وحط راسه على كتفها
حور قعدت تراسل في عمر وقرصاته عشان يفتح تلفون
عمر رفع تلفونه وقعد يشوف في رسائلها
حور: "يافرخ لعند ايمتا بنقعدو هنا"
عمر: "لعند الافتتاح والله ماني ماشي ونا مش شايفه"
حور ابتسمت: "نجيه خوي السمح"
سعيد شاف حور تبتسم: ءءحم اسمعي
حور شافتله: نعم؟
سعيد: نحنا عائله عندها قوانين ولازم تمشي عليها واولهن انه البنت مايقعدش عندها تلفون
حور: لما نقعد من عائلتك هذيك الساعه طبق علي قوانينكم الجاهله
سعيد انصدم من ردها
عمر ابتسم: اكحش ياثلب
حور جت عينها في عين بوها الي يشوفلهم بشوق وحنيه💔.
مبروكه: بتعب تفضلو فرشتها لكم
عمر صبا: شكرا عشان استقبلتونا وغصبتونا عشان نقعدو ونتمنا محد يدخل فينا لانه تقريبا مالكمش دخل لا في وكالنا ولا شربنا ولا طلوعنا ولا خشوشنا.. وشاف لسعيد.. ولا حتى تلفوناتنا يعني بأختصار اعتبرونا ضيوف للاسبوع الجاي بس ومش حنضايقوكم
سعيد يسمع في كلامه كيف مثقف ورازن وطايش في نفس الوقت
عمر: معليش نتعبك وين الدار ونبي مفتاحها
مبروكه استغربت: هاك المفتاح.. وطلعت وطلعو وراها بشناطيهم وخشو للدار وسكروها
مبروكه خشت بتعبت: قصدي لازم يصير موضوع زي هذا عشان تحكولنا؟
ابتسام تبكي: معقوله ياعمتي تضحكو عليا وتقولولي انه متزوج مره وحده؟
عبدالرحمن بحزن وراقيتله:......
كلهم انصدمو من اسلوبه ....

🔥الـكـاتـبـه صـفـاء رجـب🔥.

ـــــــــــــــــــــــــــــــــــــــــــــــــــــــ

عمر طاح على الفراش: واككك مش مصدق صار هذا كله
حور قعمزت: معقوله يطلع من خوتي هكي؟
عمر: مش خوتك هذوم احقر من الحقراء يشوف الكافر حقارتهم وححقربي يعلن اسلامه
حور: وشن يبي يصير فينا؟
عمر بخباثه:.... يتبع