ارواح جهنميه

الحـلقـه الثـانيـه وعـشـرون 22

#أرواح_جـهـنـمـيـة

الـحـلـقـه الثـانـيـه وعـشرون 22

🔥الـكـاتـبـه صـفـاء رجـب🔥.

وطلعت وجت فتحت الباب وتنصدم بأمجد قدامها
حور ارتبكت: شن جابك؟
امجد قلب عيونه ويمشي بتعب وخش جوا
حور ألتفت وتشوف بقعه كبيره من الدم في دبشه وانصدمت
حور بتردد: امجد
امجد ألتفت وشافلها من غير مايحكي
حور: شن الدم الي في ظهرك؟
امجد عقد حواجبه وجا بيلمس ظهره بس الألم غلبه: شي ماتحكيش لحد
حور رافعه حاجبها: واضح انه شي
امجد مشا وسبيها وخش للحمام
حور تنهدت: يلا ندير فيه اجر.. وخشت للدار شافت عمر راقد خذت العلبه متاعت الادويه وطلعت للصاله تراجي فيه يطلع من الحمام

.

.

.

قاعده تحكي وفرحانه: تي قنين مشيته وشعره اححا وخلاص
لينا تضحك: تواكك حسستيني سبيدر مان نقذك ودارلك جو
وفاء بحماس: انتي ماشبحتيش كيف كان جنتل.. ومسكت المخده وحطتها على وجها وعيطت.. كبدتتت وربي
لينا بهزوه: مش اول مره تكبدي
وفاء عقدت حواجبها: لازم تنكدي عليا طبعا
لينا قلبت عيونها: هذا الواقع
وفاء عضت على فمها: نبي نمشي غدوه عشان نشوفه بلكي يجي
لينا: تخيلي يقعد متزوج ولا خاطب ولا حتى مرتبط
وفاء طمت فمها: اوفف وحقربي نكد فيك مش طبيعي.. وطلعت وسيبتها
لينا رفعت كتوفها بلا مبالاه: شندخلني اصلا.. وقعدت على تلفونها

ــــــــــــــــــــــــــــــــــــــــــــــــــــــــ

امجد طلع من الحمام وشاف حور قدامه

امجد عقد حواجبه: خيرك؟
حور: تعال نداويك على السريع
امجد يشوفلها وكان محتاج الشي هذا.. مشا قدامها وقعمز على الصالون وقعد ساكت
حور قربت منه: اسلح التيشرت متاعك
امجد نفخ: اوفف... وقعد يسلح فيه بالغصب
حور فتحت عيونها بصدمه: كيف صار؟ من ضاربك؟
امجد بحده: ديري شغلك وانتي ساكته
حور ابتسمت على جنب وتمتم: لاكن مسح كبدي
امجد رفع حاجبه: شن قلتي؟
حور: قتلك الخياطه مفتوحه
امجد زفر بقوه: وشن بديري توا؟
حور طمت فمها بحيره: على الاغلب حنخيطها لك
امجد برم وجهه وشافلها بصدمه: تدوي جديات انتي؟
حور قلبت عيونها: اها شن تبيني ندير كان نخليك هك لعند بكرا نلقاك ميت
امجد نفخ: وكيف بتخيطي عندك ادوات؟
حور ابتسمت: عندي حتى بنج
امجد: بسرعه بس
حور رفعت كرعيها فوق الصالون وقعدت واقفه على ركبها وقربت منه وغرست الابره متاعت البنج بخفه بدون مايحس امجد
حور شافتله: توا خليها ربع ساعه هك ونخيطلك
امجد بأبتسامه خفيفه: بدايه موفقه بما انه الابره ماحسيتهش
حور بنفس الابتسامه وغمزتله: نعجبك
امجد نزل راسه بهزوه
حور بفضول ونزلت تحت الصالون وتربعت وحطت يدها على خدها: توا احكيلي شن صار معاك في طرابلس؟
امجد رفع حاجبه: من حكالك انتي؟
حور: مايخفا عليا شي.. احكي بسرعه
امجد نفخ: تعاركت مع واحد غادي رقاها ليا ضربته بالسلاح انفتح راسه بس ردها لي بالموس في ظهري
حور قلبت عيونها: مافيكش جو ثاريت عمر يحكيلي بالتفصيل ويزيد في بهارات من عنده عشان يحمسني اما انت شي برود مش طبيعي
امجد ابتسم: هذوك عمر مش اني!
حور برمت وجها ومعش ردت عليه
امجد: غريبه مازلتو قاعدين
حور: تطرد فينا ولا كيف؟
وقبل مايحكي امجد. قاطعاته حور: حتى كان تعزق في ادواس قاعدين على قلبك
امجد ضحك: براده يعني
حور هزت راسها بأها ورفعت تلفونها وقعدت عليه
امجد يشوف لملامحها: ازعما تشبهي لأمك؟
حور انتبهتله: كيف؟
امجد بأبتسامه خفيفه: ملامحك مش لنا بلكل قلت اكيد تشبهي لأمك
حور ابتسمت: اكيد يعني
امجد ابتسم وسكت ويراجي في الربع ساعه يمشو