أنا قبل كل شيء

الجزء 7

🍷الجزء :7🍷

ناضت وهي كاتعرج علا رجل حينت وحدة تقصحات فيها ملي طاحت.. وقفات كاتشوف فيه بحقد

غيت : (قرب ليها خطوة) واخا طيحي تا تاتعياي خاصك ترجعي توقفي علا رجليك من جديد

زاد قرب ليها وضار موراها ودفعها بالجهد تا غوتات من حر الدفعة لي عطاها

غيت : ماعمرك تعطي ضهرك لشي حد حينت كوني متاكدة غاتجيك طعنة فاللور ونتي الخاسرة

رجعات تقادات فالوقفة وهي محاملاش الوضع كيفاش كايتعامل معاها ولكن سكتات وهي جامعة شفايفها بغضب.. رجع وقف قدامها وهو مركز فعينيها

غيت : الا بغا شي حد يضربك بموس شنو اول حاجة غاديري

اجوان : (لاإراديا) غانهرب..

غيت : (هز حاجبو فيها) عاودي ماسمعتش..

اجوان : (تداركات شنو گالت) أأ غانحاول نحيدو ليه..

قرب ليها جوج خطوات وجبد موس من جيبو وحلو وهي تبعد جوج خطوات تا شدها من يديها ووقفها قدامو..

غيت : اول حاجة حاولي تفاداي يقيسك الا كان حاطو ليه علا كرشك شدي ليه يديه ولويها ليه

دار ليها الموس فيديها ووجهو لكرشو ووراها كيفاش تشدو وغفلها ولوا ليها يديها يديها بالجهد وضار عندها وقلبها فالسما مور ضهرو تا طاحت فالارض وهي مقسحة وهو باقي شاد ليها يديها

غيت : بحال هكا تماما يلاه دبا نوضي باش طبقيها

أجوان : (بألم) كان ضروري طيحني بهاد القوة..

ناضت بزز وهي ضهرها كاتحس بيه كايزنزن عليها من القلبة لي قلبها فالارض وواخا كاين الطابي ولكن راه قاسح لا طحتي عليه بالجهد .. وقفات قدامو وهو شاد الموس موجهو جيهتها

غيت : يلاه حيديه ليا.. دافعي علا راسك كولشي مسموح..

قربات وشدات ليه فيديه وبغات تلويها ليه ولكن يدو قاسحة..

اجوان : يديك قاسحة عليا ماقدرتش..

غيت : مكايناش شي حاجة سميتها ماقدرتش.. نهار تكوني قدام الموت وعندك حل واحد ماغاتقوليش ماقدرتش..

بقات معاقرة معاه تاعصباتو وهو هرب يدو وعطاها بمرفقو للوجه تاداخت

غيت : (ببرود) تعطلتي نتي دبا متي كون كان شي حد من غيري لي هاز عليك الموس

اجوان : ( شادة فنيفها لي رعف) راه ماقدرتش كيفاش بغتيني ندير ونتا كاملك كادير جوج مني وباغيني نهزك فوق ضهري..

غيت : كولشي مسموح ليك حيدي الموس ونقدي حياتك ولا موتي ونتي كاتحاولي.. ونهار تكوني فهاد الموقف فالحقيقة ماغاتقوليش ليه لا نتا كبر مني ماقدرتش عليك جيب ليا لي قدي.. هادوك اعدار كادبة كاتختارعيهوم وديري منهوم حاجز لراسك..