أنا قبل كل شيء

الجزء 8

🍷الجزء :8🍷

واقف قدام القصر ومتكي علا سيارتو وكايتسناها تنزل شاف ساعتو لقاها بقات دقيقة علا الخمسة پيل وهي مزال منزلات.. دازت دقيقة وجوج وتلاة وهي مزال.. تعصب وبدا كايصوت.. وهو عندو الوقت اثمن حاجة ومكايحمل يضيع تا تانية..

شاف فساعتو بسخط دازت كتر من ربع ساعة ومزال مانزلات وهو يدخل وتم طالع عندها معصب دفع الباب بجهد تا قفزات سميرة لي كانت جالسة عند راسها وكاتفيق فيها..

كايطلع فيها ويهبط كانت لابسة بيجامة سروال وتيشورت وضفيرة فشعرها حينت باقي ماوصل وقت الخدمة الرئيسي ديالها باش تلبس اليونيفورم غير كاتفيق مع أجوان باش توجد ليها الفطور وتفيقها تال التمنية عاد كتبدى خدمتها

غيت : (موجه هضرتو لسميرة) مال هادي مافاقت.. من الصباح وانا نتسنا وهي ناعسة كاتشخر..

سميرة : (حانية راسها ومتوترة وهي كاتفادا تشوف فعينيه لي كايتطاير منهوم الشرار) أأأ قالت ليك.. قالت ليك مابغاتكش نتا لي دربها..

غيت : وكاتشرط من الفوق (قرب ووقف عند راسها ونغزها) وا الشريفة نوضي تهزي ماضيعيش ليا وقتي..

ماتكلماتش ليه واخا كانت فايقة وكاتسمعو وهو يتعصب وضار عند سميرة لي واقفة بعيدة شوية وكاتشوف فيهوم

غيت : سيري جيبي واحد السطل دالما بارد

سميرة : ولكن

غيت : (هز فيها حاجبو ودوا وهو كارز علا سنانو) كيفاش ولكن.. شتك بحالا كاتجاوبي معايا..

حدرات راسها : سمح ليا امسيو غيت

مشات دخلا للدوش وعمرات واحد السطل وخلطاتو بين الما بارد وسخون باش مايضربهاش البرد لا كبو عليها وخرجا عندو لقاتو باقي كاينغز فيها تنوض وهي والو ولا فكرات تاتجاوبو.. قربات وعطاتو ليه ورجعات اللور

غيت : ماغاتنوضيش؟؟

مجاوباتوش وهو يخويه عليها كامل بالجهد تاناضت شاهقة رجعات اللور وهي كاتمسح فوجها وترجع شعرها اللور

اجوان : لا نتا مسطي.. واخا ماعرت اش دير ماغانمشيش معاك تايجي نبيل.. لبارح حگرتي عليا وعضامي كاملهوم كايضروني..

غيت جبد مسدس ووجهو فوجهها

غيت : (ببرود) مغاتنوضيش؟؟

أجوان : (خلعها ولكن تماسكات) راه هضرت التدريب معاك هو لي ماغ...

قبل ماتكملها تيرا حدا رجليها بقرطاسة خلاها مصدومة ماتوقعاتوش يديرها كانت عارفاه مقطع الوراق ويقدر گاع يسلخها ولا يجرها من شعرها ولكن يتيري فيها؟ كون جات فيها فين كانو غايوصو؟ .. ناضت هاربة من فوق الناموسية وهو موجه ليها المسدس