أنا قبل كل شيء

الجزء 19

🍷الجزء:19🍷

راجعين للڪوخ ديالهوم عيانين ڪايجرو فرجليهوم كل وحدة كاتحس بعضامها مدگدگين بكترة ماتخبطو مع الماج .. ماوصلو للڪوخ ديالهوم تاغفر ليهوم ربي دالنوب .. ڪان ديك الساعة غربات الشمس وشعلو الضواو لي فالوطيل من جميع البلايص ولات الدنية مضوية..

دخلات اجوان للڪوخ ديالها جبدات دوبياس جداد ودخلات للدوش ودوشات حيدات داك العيا ولبسات دوبياس ومن فوقهوم بينوار وخرجات جلسات فوق الفوتويات وهزات الفيكس وطلبات عشاها وبقات مقابلة مع البالكون كاتأمل البيسين الصغير مضوي.. وهي تهز تيليفونها كاتقرا فالاخبار لي خرجات علا الحريق لي وقع فالفيلا ديال التازي .. وتعجبات ملي مادكروش سميتو .. ولكن تدكر الحريق والبلاصة وتوصف بأنه كبير وقاس حتا الفيلات الملاسقين تما حينت ماقدروش يسيطرو عليه .. ولكن مكانوش ضحايا غير إصابات خفاف فسكان الفيلا لي هوما فالأصل الحراس ديال التازي ..

سمعات طرقات خفاف فالباب وسدات التيلفون وناضت حلات البان ڪانت بنت لابسة الزي الرسمي دخلات ليها عشاها حطاتو فوق الطبلة وخرجات ..

ڪلات  وطلعات للطابق التاني وتلاحت فوق السرير وهي مرتاحة نفسيا ڪاتشوف فالضو الصفر الخفيف لي فالبولة لي مقابلة مع راسها فالسقف جو كايجيب الاسترخاء ومكرهاتش شي مَساج فديك اللحضة ..

حيدات البانطوفة من رجليها وقربات للشرجم وتكات عليه وهي ڪاطل علا الاڪواخ لي فجنبها ڪان الهدووء والضو لي بين الاكواخ زوين فالصفر علا شڪل خيط فيه عشرات البولات ڪايربط بين الأڪواخ .. بقات ڪاتأمل فالسما حتا ڪاتلمح عينيها واحد الجوج قدام ڪوخ متوسط الحجم گالسين فوق الدروج وڪايتباوسو وعايشين الحب وهي تميق فيهوم ..

أجوان : واو علا منضر قدامي (تأفأفات) تاهوما علا قلة البلايص يدخلو فحالهم ويحتارمو الناس العزابية بحالي .. (تمتمات بصوت خافت لراسها) اووف حتا الحب محرومة منو  ..غير لابغيت نحب خاص يكون عند بابا مصلاحة فيه  ولا مستحيل تكون عندي نهاية سعيدة ..

بقات كاتشوف فيهوم مرة يهضرو مرة يقرب يبوسها مرة يعنقها مرة يهضر معاها وهو كايلعب فشعرها تا عياو وناضو دخلو للكوخ ديالهم وهي تخرج عينيها بصدمة ..

أجوان: هادشي كامل وكانو فنفس الكوخ .. تگول كانو متعمدين يعطيوني مشهد مجاني لحياتهوم الرومانسية ..

دفلات وسدات الشرجم ودخلات ساخطة .. وكاتحس بالوحدة وهي تما ..مكرهاتش شي صدر عريض مبودر تحط عليه راسها بلاصة المخدة .. وتصنط لدقات قلبو بلاصت صوت الصراصير لي دارو ليها الارارة فداك الليل .. وفجأة جا فبالها مول العينين الزرقين والجسم الرياضي لي عندو وهي تبتاسم لا إراديا ..

☆سميرة☆

خرجات من الدوش لي عندها فالغرفة وهي لاوية عليها فوطة قصيرة بيضة وكاتنشف شعرها .. كاتحس بالحيوية رجعات ليها ملي دوشات وحيدات عليها العيا .. مشات للخزانة وجبدات دوبياس بيضين لبساتهوم وسروال ساتان واسع فالبيج مع ضوني كحل ونشفات شعرها بشوشوار ودخلات تخشا فبلاصتها ..