أنا قبل كل شيء

الجزء 13

🍷الجزء :13🍷

نجلاء :(هزات فيه راسها) ولكن بجوج بدلو التوجه ديالهوم مور ماغبرو عماين كاملين ليكانو ممحين من السيفي ديالهوم وملي سولتهم بجوج عطاو نفس الجواب.. فترة نقاهة باش يقادو أفكارهوم.. ماشي شي حاجة غريبة؟ وعلاش بالضبط ختارو الشركات ديالنا مع انه كاينين بزاف ديال الشركات منافسة لي ناجحة فهاد المجال..

حط الملف من يديه وحيد النضاضر ديالو وضغط علا عينيه بصباعو وتكلم..

غيت : اوك حطي ليا الملف ديالهوم بجوج حتا نراجعو وزيدي جمعي عليهوم المعلومات وقولي لوخرين باش يبداو معانا وجدي ليهوم الكونطرا من بعد ما تتأكدي مزيان من خدمتهوم..

نجلاء : اوك غيـ.. احم حاضر مسيو غيت..

غيت : يلاه خرجي لا ساليتي

نجلاء بقات كاتشوف فيه ومترددة واش تهضر ولا تسكت ولكن نطقات بعد مابان ليها بلي بصح عيان..

نجلاء : تبغي ندير ليك مساج لراسك وكتافك كاتبان ليا عيان امسيو غيت..

غيت :(شاف فيها مطولاََ وهو ينطق) وسربي باش تمشي تقدي شغالك لي قلت ليك

ناضت فرحانة ووقفات موراه وحطات ليها علا نواضرو وهو رخا راسو وبدات كادير ليه مساج بشوية وهو ترخا وكان فعلا محتاجو من كترة العيا لي فيه خصوصا هاد الايام اللخرة لي تجمعات عليه فيها الخدمة فالفترة لي كان كايدرب فيها أجوان.. ولقا بزاف ديال الملفات والوراق خصهوم المراجعة والصفقات غير مكتملة وملي غاب ماخرجاتش السلعة لدرجة السطوك عندهوم عمر..

حينت ممنوع تخرج شي حاجة من الشركات لاما كان حاضر غيت لي كايراقب كولشي خصوصا السلاح لي ماشي شي حاجة ساهلة.. مزال حتا السيارات لاكانت الشحنة عادية وقليلة كايوقف عليها نبيل ولا سالم ولكن نبيل كان تاهو فمهمة ومامساليش..

حس براسو رتاح شوية وهي حسات بيه وهبطات يديها لكتافو وبدات كاتماصيهوم ليه وشافتو مدار تا ردة فعل وهبطات يديها مع كتافو العراض من القدام تال صدرو وكاضور بحركات دائلية بحالا كاتحاول تغريه وهو مداير تا حركة وفلحضة هبطات يديها تال كرشو وراسها عند كتفو وهي تبوسو تابورشاتو وهو يدفعها عليه وناض توگض وخنزر فيها

غيت : (كايهضر وهو معصب) راه قلت ليك عندي الخدمة داك النهار ومامساليش ليك ولا سخن عليك كرك وشداتك الزملة سيري كفتي.. (حمر فيها عينيه) يلاه غبري من قدامي..

نجلاء : (خلعاتها نبرة صوتو) واخا سمح ليا امسيو غيت..

حدرات راسها وهزات وراقها بزربة وخرجات وهي  مراضياش كيفاش ولا كايصدها وهي لي ضنات بلي مور الايام لي دوزوها فالتدريب والتقرب لي تقربو غايولي يحس بشي حاجة من جيهتها

بانت ليها السكرتيرة متبعاها وهي تخنزر فيها وكملات طريقها تال بيروها ودخلات ردخات الباب وهي معصبة..