أنا قبل كل شيء

الجزء 23

🍷الجزء 23🍷

بدا كايحل عينيه الزرقين علا الشعا لي داخل من البالكون ديال الصباح لي طلع ..او الصباح المزيف لي مامأكدينش منو .. بقا كايشوف فالسقف ديال الغرفة .. ضور راسو جيهت أجوان وهو يلقاها معنقاه من كرشو وحاطة عليه رجليها وغارقة فسابع نومة .. كانت كاتبان بحال شي طفلة صغيرة وهي حالة فمها باش تاخد اكبر كمية ديال الاكسجين وشعرها البني مليوح موراها .. بقا كايشوف فيها حس بيها بحال شي قطة مخشية فيه..

بدا كايحيد ليها يديها ورجليها بشوية حتا تفك وهو ينوض خرج للبالكون كايشوف شنو ضاير بيه .. لقا
كولشي كيفما هو والمتاهة ماتحركاتش .. هادشي كايعني بلي مكاتحركش بالليل فقط فالصباح ..

شاف لتحت فالارض لي كانت بعيدة وطلع راسو شاف الفوق .. خاصو يحدد وجهة يمشيو ليها قبل ماتحرك المتاهة وفكر يتسلق الفوق باش يعرف مزيان الطريق وخا معندوش وجهة مضبوطة ويسهال عليه الرجوع عند أجوان تالا تحركات المتاهة ..عكس لا كان لتحت وتحركات وتسدات الطريق صعيب يرجع لنفس لبلاصة ..

فاقت أجوان بعدما تبنج عليها حنكها من البرودة ديال الأرض وبقات كاتشوف فالبالكون ساهيا وهي كاتمسح اللعاب لي كان سايل من جنب فمها .. لقات راسها بوحدها عرفاتو غايكون خرج ناضت كاتحك فعينيها .. وشافت السلة ديال الماكلة لقاتو ماكلاش فقط هز معاه قرعة دالما .. وهي تجرها عندها وكلات ديك التفاحة والطريف دالخبز سدوو ليها جزء بسيط من الجوع لي كان فيها ..

ناضت وبدات كاضور فداك التجويف لي كايشبه لغرفة علا شكل مستطيل .. ملي دخل الضو من البالكون وضاحت الرؤيا كتر وبان ليها فالجنب بحال الباب ديال شي خزانة مربعة صغيرة حلاتها ولقات بحال الماسحة ديال البصمات تعجبات وبقات مترددة واش تحط فيها يديها ولا لا ...

مدات يديها ببطئ والتردد غالب عليها ولكن قررات تحطها .. وهو يتسمع صوت موراها..

أرياس : شكاديري؟؟

حطات يديها وتلفتات عندو ويلاه بغات تجاوب وهي تلمح واحد الضو كايسكاني ليها البصمات ووقف عند البراسلي بحالا كايقرا المعلومات لي فيه وشعل ضو خضر تحت يديها .. وحسو بهزة أرضية عنيفة .. خلاتهوم يطيحو فالارض.. والارض تحت منهوم كاتحرك وضور بسرعة خيالية ..

ماقدراتش أجوان تهز راسها بالدوخة لي شداتها وبغات ترض ولكن معدتها شبه خاويا .. وماخرج والو وكاتحس براسها غاتجيف وهي شادة فراسها لي كايضور .. وبدات كاتعيط لأرياس بالجهد وهو مكانش قل منها كايحس بدماغو باغي يحل الجمجمة ديالو يخرج من السرعة باش كاضور بيهوم الارض.. حتا فقدو الوعي بجوج..

دازت مدة وبدات كاتحل عينيها راسها كايحرقها ..
حلات عينيها كاتشوف شنو ضاير بيها .. والرئية عندها مضببة وكولشي كايضور .. وضاحت ليها شنو قدامها وهي تهز راسها وبدات كاتكحز تاوصلات لأرياس لي باقي غائب علا الوعي .. ضرباتو ضربات خفاف لوجهو ..