أنا قبل كل شيء

الجزء 14

🍷الجزء :14🍷

هي هربات ومشات كاتجري لبيتها  وهي كلها كاترعد وحاسة بلي هادي اللخرة ليها.. حلات الباب بزربة ودخلات وسدات عليها وتخشات فراشها وتغمات وقلبها كايضرب فالمية وهي كاطلب بلي يكون كولشي غير حلم ولكن الجلدة ديال راسها وحناكها لي عاطينها الصداع كايتبتو بلي هي فايقة وبلي كولشي حقيقي..

كون غير سمعات للحاسة السادسة ديالها فاش قالت ليها ماتخرجيش تلاقاي معاه ونعسي.. ولكن لي وقع وقع وليوم يدبحوها.. كانو قوانين القصر صارمة فالعلاقات غير الشرعية لدرجة الدراري كاملين ممنوع عليهوم يدخلو شي عاهرة ولا شي وحدة ماجامعاها معاهم تا علاقة شرعية..

وبالنسبة للعلاقات بين الخدم تاهوما كانو محرمين واي وحدين حرقو هاد القاعدة مصيرهوم الموت..

لي حب وبغا يتزوج كايعلم رئيس الخدم وهو بدورو كايعلم خالد وبالفرحات عليهوم يزوجوهوم ويولدو ليهوم عضو جديد ينضم ليهوم باش مايدخلوش البراني.. ولكن اي علاقة خارج إطار الزواج هي من المحرمات فداك القصر علا الجميع..

ولكن سميرة كسرات ديك القاعدة ملي حبات هداك الشاب اليافع الوسيم لي ديما كاتشوفو واقف بحال الحجرة تابت كايأدي المهمة ديالو فالحراسة ومرة مرة كايتبسم ليها فاش كايشوفها دايزة من حداه.. حتا زعم واحد النهار ولاح ليها ورقة كايعبر فيها علا إعجابو بيها وكايسولها علا سميتها وطلبها ملي تجاوبو تخلي لورقة حدا واحد الشجرة..

عجبها الحال وجاوباتو علا رسالتو وتطورات علاقتهوم فسرية تامة وكانو كايتواصلو غير بالكتبة فالوراق.. كان كايخلي ليها رسالة فيها شنو بغا فالبلاصة لي متافقين عليها ولي هي واحد الشجرة فالجردة.. كان شكلها مختالف علا باقي الاشجار وملي كاتهزها وتقراها كاتجوابو وترد الورقة لنفس البلاصة..

كانت عايشة معاه الرومانسية والكلام المعسول فالوراق لي اول مرا تقرا بحال داكشي خصوصا ان إختلاطها مع جنس الدكورة شبه منعدم حينت كل واحد ملتازم بخدمتو..

ومؤخرا ولا كايطلبها تلاقا معاه فالليل يهضرو ملي ينعس كولشي وهي كانت كاترفض حينت ماباغاتش تجبد الصداع لراسها خصوصا ان الحراسة ولات كتيرة مؤخرا فالقصر.. وقالت ليه يمشي يطلبها ويتزوجو.. ولكن هو خيرها بين يايتلاقاو ويهضرو فاص ولا غايبعد منها وتحجج بلي مايمكنش يتزوج بوحدة ماسامعش تاصوتها.. وضطرات تولي تلاقا معاه مرة مرة ويهضرو شوية واخا كان كايتقرب منها ويشد ليها فيديها ومرة مرة كايبوسها ففمها وهي ماعارفاش واش داكشي مخاصوش يدار وهو كايقول ليها راه عادشي نتي مراتي وحنا غانزوجو وهي عند بالها راه عادي وراه حبيبها وقريب يتزوجو حينت تقافتها الجنسية حرفيا زيرو

وليوم عاود طلبها فرسالة باش يتلاقاو واخا مكانتش مرتاحة وحاسة بلي هادشي لي كادير فيه غلط ولكن خافتو يبعد عليها حينت ملي مكابغيش تشوفو كايتقلق وهي مكاتحملش تخاصم معاه..