بتك جابت العار ياحسين بتك دنقرت شرف القبيله كلو في التراب عارف يعني شنو راسنا بقا في التراب وعارف يعني شنو بت من قبيلتنا تجيب عار دي حاجه مافيها عفو ياحسين دي ماحاجه بسيطه عشان نحنا نجاملك فيها ابداااا ونحنا تاني بقا ماعندنا كلمة وسط الخلق نحنا تاني انتهينا بي سبب بتك وعشان كدا لازم نغسل العار دا والبت دي تموت دي احسن حاجه عشان القبايل كلها تعرف انو نحنا ماعندنا عار بدخلنا وانا قلتا كلامي دا وماني مجامل فيهو كان اتقلبت السماء علي الارض
وقف علي حيلو وكان بعاين وتعابير وشو كلها بدل علي الزعل ونظرات عيونو الكانت مكسوره
حسين:يا الماحي انت عارف البت الحصلها شنو وانت عارف انا تربيتي كيف بس البت مالعبت ولا غيرو كلكم عارفين الحصل شنو كيف تقولو انها تموت العار دا لو حابتو بتجيبو لي انا ابوها مابتجيبو لي زول تاني ابعدو مني وخلوني في حالي بس وانا مجلسكم دا تاني ماني قاعد فيهو ولاداير منكم شي
الماحي وقف عليهو وضرب العكاس في الارض ووقف معاهو المجلس كلو وكانو ساكتين مافي زول قادر يتكلم او يقول حاجه
الماحي:الحصل نحنا ماهامينا بي شي البهمنا انها جابت العار بس العار جاء كيف دا مانا دايرين نعرفو ونحنا العار بقا حقنا كلنا مو حقك براك والكلام القلنا ياهو البحصل وانت ياتغسل عارك براك يانحنا بنتصرف نحنا لحدي اسي بنتكلم معاك بي روقه
لكن لو داير تكمل عمايلك دي انت تاني بتبقا ماك مننا وانا ماني داير اخسرك ياحسين وانت زاتك ولادتك مافيها رجال عشان كان فيها رجال دا ماكان حالنا اسي، وكان بتكلم بي زعل وصوت عالي
حسين كان بسمع في الكلام بس تفكيرو كان في حته تانيه عاين لي الماحي جوه عيونو
حسين: لحدي هنا ويا الماحي خلاص ماعندك كلام معاي
محمد: هووووي ياحسين اعرف حدك، شوف نفسك بتقول في شنو انت بتتكلم مع العمده اتكلم بي احترام
الماحي: يامحمد خليهو هو فضل فيها احترام من يوم بتو جابت العار لاهو ضبحا ولا واحد من الضكور العندو ضبحا وغسل العار نحنا من الوقت دا فقدنا الاحترام
حسين عاين ليهم كلهم وخلاهم واقفين وطلع طوالي
حسين معروف في القريه زول حاره وحلال مشاكل وزول واجب وكرم وكانت كل القريه بتشهد بي تربيتو بس الحصل دا خلا القريه كلها تعاين ليهو بطريقه كعبه شديد وفقد الاحترام، حتي الشفع في الحله كانو بعاينو ليهو وبقولو شوف عمك حسين البتو حامل بي الحرام، ماكان بتكلم كتير وعندو بتين وولدين
الكبيره كانو عاقدين ليها والعرس حقها قريب شديد اسمها ريان والتانيه اسمها ريم وهي سبب المشكله حاليا، عندو محمد ومعاويه
كنت راقده جوه لمن ابوي جاء داخل وشايفه امي مشت ليهو وكان بتكلم معاها كلام كتتتير شديد بس ماكنت سامعه حاجه، الوقت ماكان بمر حياتي اتقلبت في ساعه من بت كان بضرب بيها المثل في العفاف والادب لي واحده لافه وحامل بي الحرام، لحدي اسي ماني ماقادر انسا اليوم المشؤم داك
