#غزال4
سميه عثمان
دا مجرد ود حرام عارف يعني شنو ود حرام يعني تلقا ليك واحد واقع في الشارع وتلمو وتعمل ليهو قيمه وتخلي بني ادم يجيك اليله داير يطاول علي اسيادو، غلطان انا الشلتو من الشارع وربيتو اصلا ود الحرام طول عمرو حايكون ود حرام هو لو كان نافع صحي كان اهلو جدعو الغلط مني انا استاهل البحصل دا كلو، لا وكمان انت جاي تتكلم معاي ياولد انت ماعارف نفسك بتتكلم مع منو والا بتقول في شنو طير من وشي يلا بس كدي اسمعك تجيب لي سيرتو والا تجيب اسمو في وشي الله لاجاب باقيكم،اسمع هنا ياولد كويس من اليله ما اشوف زول في البيت دا بتكلم في الموضوع دا،وحسن امك دي تخلي الامور الفارغه البتسويها فيها هي امك زاتا ناقصه ليها جنا ياهو انتووكوم وردوم استفدنا منكم شنو لمن هي جايه تتبكاء في ود الحرام امشي عليها شوفا يا تاج الدين وتعال فوق دربك دا عندي حسابات دايرك تراجعا اسي
فتحت عيونا وكانت راقده في السرير اتلفت لقت علي جنبها عاينت ليهو وكانت متاكده انو علي حايمشي من نظراتو ليها فهمتو انو مستحيل يقعد بعد الحصل دا كلو، بس كانت بتحاول بكل الاصرار العندها انو تخلي يقعد
علي: امي انتي كويسه؟
نفيسه: الحمدلله ياولدي كويسه، ماكانت مركزه مع زول من الحولينا ولاكنت بترد لي زول فيهم كانو مافي زول اصلا، اتلفتت لي علي وعاينت ليهو شديد
نفيسه: علي انا عندي بيوت كتيره بديك فيها بيت وبمشي معاك نطلب غزال من ابوها مابقولنا لا وانا بقعد معاك انا هنا تاني ماني قاعده
علي: امي قولي بسم الله، وماتخربي بيتك عشاني ولاتخلي اولادك غزال ابوها مابديني ليها دي حاجه انا بقيت واثق منها هو ابوي الرباني قالي كدي ابوها بقول شنو دي مابدور سؤال
حليمه كانت بتعاين لي نفيسه وكانت متمنيه علي يوافق عشان تطلع ليها من البيت وهي تمسك زمام الامور وتبقا ست الشي وكل شي لكن بعد كلام علي حست انو حايقدر يقنع امو
نفيسه: لكن يا ولدي
علي: من غير اي لكن يمه مافي زول بنسا امو ولابتنازل من اخوانو، انا بمرق يمه وبشوف بسوي شنو انتي ابقي نصيحه وانا تاني مابدور شي، قامت علي حيله وبدت تعاين ليهو والدموع ماليه عيونا حضنتو عليها شديد كانت حاسه انو علي تاني مابجي باس ليها راسا
علي: اطمني يمه تاني بجيك ودعتك الله
قبل علي اخواتو الكانت العيون ماليه عيونم سلم عليهم واحده واحده وطلع بره الطيب وتاج الدين كانو في الباب
علي: هوي مافي رجال ببكو، بطلو الامور دي انا تاني بجي قايلني ماشي وين يعني
الطيب: لو كان كلامك صاح انت لي بتبكي
بعد كلمتو دي علي اتفجر بي البكاء ومسكم عليهو
علي: خلو بالكم من امي، انا حاولتا اخليها تصبر شويه يا الطيب وياتاج بس انا تاني مابدوس العتبه دي، ماتشيلو في قلبكم من ابوي ولاتزعلو منو، هو ماقصر فيني،انا قضيت النهار دا كلو عشان ما امشي وهي مارضيانه علي
