يعني نسيبك دا زول بعرف الدين، كيفن يسوي كدي في بتو البنيه دي رماها عديل في النار، يعرسا لي راجل قدرو، وشوفي البنيه قدر كيف انا غايتو مابجي اي عرس ياريان ولابكضب عليكي، عشان ماتزعلي مني
امي: يابت دا كلام شنو البتسوي فيهو دا، بتمشي وبالغصب ولادايره اسمع حسك في الكلام دا، امشي شوفي وراكي شنو
غزال: سمح يمه، انتو اصلكم كدا الشي الصاح بتعملو روحكم مابتشوفو، وطلعت طوالي
ريان: يمه غزال كلاما صاح، بس شن بنسوي نحنا
امي: هوي ياريان اكفي خيرك شرك وماتدخلي فيهم البلد دي كلها كدي عشان انتي وريان ابوكي ابا يعرس ليكن صغار قايلات كل الناس كدي،خليكي من دا والله انا عندي خبر سمح بي الحيل
ريان:قولي يمه،الخبر السمح مابسكتو لي قدر كدي
امي:سمعتا قالو العمده بدور غزال لي الطيب ولدو
ريان وشها ضرب وسكتت مسافه وبدت تتمتم بي الكلام،شنو ش ش يمه الطيب
امي:يابت مالك انقهمتي،تلقاك ماكي مصدقه،والله انا زاتي ماني مصدقه وقلبي دا بدور يطير،غزال بتعيش عيشة الملوك بتلبس الدهب ويشتغلو ليها الخدم،الله ادانا والله ي ريان
ريان:يمه غزال عارفه؟؟
امي:لا ماها عارفه،العمده رسل لي ابوكي قبيل ومالقاها،وقال بجيهو بعدين بعد المغرب،عشان ينضم معاهو في الموضوع
ريان:لكن يمه غزال سالتوها
امي:يابت نسالها شنو كمان دي مافيها قول،وهي دي زاتا جاتنا علي طبق من دهب
كنا قاعدين بعد المغرب وكانو ناس ريان بايتين معانا، محمد جاء داخل قال لي امي جهزو لينا شاي وزلابيه العمده دا جاي علينا وفات طوالي
غزال: العمده داير شنو يمه؟؟
امي: ماني عارفه كدي لمن يجي
بقيت مامرتاحه لي جيت العمده وحاسه انو في حاجه وانا ماعارفها، امي سوت ليهم الشاي وشالو محمد لي الديوان العمده كان معاهم بعد ساعه العمده فات وماركزتا معاهو كتير اتجاهلتا الموضوع مع انو حاجه غريبه العمده يجينا في البيت زمان اي شي بكون في الديوان حقو، جاء محمد قعد جنبنا، غزال قومي سوي لي الشاي، الشاي داك مانفعني واعمليهو تتتقيل خلي يحل كويس وجيبي اسرعي، مشيت اعملو وحسيت انو محمد بوزع فيني، قبل الشاي يجهز جيت وكانو بتكلمو
محمد: يمه العمده قال دايرين العرس في اسرع زمن جهزو حالكم
بقيت واقفه وماقادره اجمع، رجعتا جبتا الشاي واديتو ليهو
محمد: ياسلاااااام يااخ، اقعدي ياغزال بدورك في كلام
غزال: خير يا محمد
