الزين ود اسماعيل دا قاتلو روح كيفن اهلك يوافقو تعيشي معاهو وانتي دابك في بدايه حياتك تعرسي عرس متل دا الراجل دا شكلو ساي مابتقابل خلي تعيشي معاهو، لا يافطومه لا دي حاجه الزول مابرضاها ولابقدر يقعد فيها،
الزين دا قبل كم شهر كان في سفر، وكان مطول في سفرو سته شهور، ولمن جاء راجل لقا مرتو حامل، وقال دا ماجناهو وعمل مجلس في بيت العمده وقالو يجيبو الدايه وتشوف المره دي فيها جنا كم، عشان الناس كلهم قالو ليهو دا جناك، وفعلا ساقو مرتو سعاد لي الدايه وكانت معاهم سكينه مره مدينه في الحله وناس العمده كانو في الديوان، الدايه لمن كشفت عليها قالت الجنا دا جنا تلاته شهور وورت سكينه جو كلمو العمده بعدها الزين قاليهم انا عارف ان بقا دا جناي والا ماهو جناي، وانا من جيت عرفتو ماهو جناي، وكانت بتبكي وتتعزر وتقول دا جناهو، ولمن قال لي العمده اها عرفتو ماجناي، بعد كدي شن بحصل، العمده قالو نحنا مابنجي نغسلك عارك، غسل عارك بلاك ولحدي هنا انقفل المجلس، الزين جاء راجع في نفس اليوم وقتل مرتو وبي كدا عندنا غسل العار حقو، ودي كانت عقاب الجريمه دي عندنا، بس لمن جاء اتقدم لي فطومه وابوها وافق قلبي ما راد الكلام دا، عشان هو شايل عقاب روحين مرتو والجنا الماعندو دخل في البحصل دا كلو، بقيت حاسه روحي مربطه وانا بعاين لي فطومه وهي ماقادره تسوي شي، وانا كمان في يدي مافي شي
غزال: فطومه، قولي بسم الله، الله كريم الله قادر علي كل شي
فطومه: غزال لكن مافي زول بشتغل بي ولاشي، اصلا قالو خلاص جاين يحددو يوم العرس وبراكي عارفه زولا بشتغل بي مافي
غزال: انا ماعارفه العارض دا جانا من وين اتقول نحنا ناقصين
فطومه: تكون واحده من اخواتو عشان جننا قبل كم يوم
بقينا قاعدين انا وفطومه اي واحده بتشكي من المحنه الوقعت فيها، ومافي زول فينا قادر يغير شي
في بيت العمده:-----
الطيب: يمه كلمتك انا غزال مابدوره ولابعرسا، الكلام دا قلتو ليكي مية مره لكن انتي مابدوري تسمعي مني، شوفيلك بت تاني بس البت دي اختوني منها يمه
حليمه: شنوووو اختاك منها كيفن، هوووي ياولد ابوك قال غزال معناهو غزال، البت ياها دي متعلمه وسمحه واداب واي شي فيها احسن منها ماني شايفه، واصلا كلامك دا ماني شغاله بيهو
الطيب: يمه ابوي دا انا بت عشان تقولي ابوك قال، ولمن هو بدور يقول مالو مابشاورني، والا اي شي يمشي علي كيفو، اي هو العمده لكن في ديوانو هناك لكن ماهو هنا، اتنفض حليمه من محلها وجات جاريه جنبو
حليمه: ياولد براحه، اسي يسمعك زول يكلم ابوك نحنا مانا ناقصين، والكلام البتقول فيهو دا خليهو قلتلك
الطيب: سمح يمه وبتشوفي براكي ان بقيت عرستل غزال،وطلع طوالي
حليمه: انا اسكت كدا لمن نفيسه تشمت فيني لا مابحصل اصلو وطلعت طوالي علي محل العمده،لقت نفيسه قاعده معاهو وبشربو في الشاي اتسحبت طوالي وجات بقت لافه في الاوضه حقتا،
